ಅಂಪೈರ್ ಜತೆ ವಾದ: ನಿತೀಶ್ ರಾಣಾಗೆ ಭಾರೀ ದಂಡ, ನಿಧಾನಗತಿಯ ಓವರ್‌ಗೆ ಚೆನ್ನೈ ನಾಯಕನಿಗೂ ದಂಡದ ಬರೆ

ಚೆನ್ನೈ, ಎ.12: ಅಂಪೈರ್ ಜೊತೆ ವಾದಕ್ಕಿಳಿದ ಕಾರಣಕ್ಕಾಗಿ ಡೆಲ್ಲಿ ಕ್ಯಾಪಿಟಲ್ಸ್(CSK vs DC) ತಂಡದ ಬ್ಯಾಟ್ಸ್‌ಮನ್ ನಿತೀಶ್ ರಾಣಾ(Nitish Rana) ಅವರಿಗೆ ಪಂದ್ಯ ಸಂಭಾವನೆಯ ಶೇಕಡಾ 25 ರಷ್ಟು ದಂಡ ವಿಧಿಸಲಾಗಿದೆ. ಜತೆಗೆ ಒಂದು ಡಿಮೆರಿಟ್ ಪಾಯಿಂಟ್ ನೀಡಲಾಗಿದೆ.

ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಡೆಲ್ಲಿ ಕ್ಯಾಪಿಟಲ್ಸ್ ತಂಡವು 213 ರನ್‌ಗಳ ಗುರಿಯನ್ನು ಬೆನ್ನಟ್ಟುತ್ತಿತ್ತು. ರನ್ ಚೇಸ್‌ನ ಕೊನೆಯ ಹಂತಗಳಲ್ಲಿ, ಡೆಲ್ಲಿ ತಂಡದ ಟ್ರಿಸ್ಟಾನ್ ಸ್ಟಬ್ಸ್ ತಮ್ಮ ಗ್ಲೌಸ್ ಬದಲಾಯಿಸಲು ಕೇಳಿಕೊಂಡರು. ಆದಾಗ್ಯೂ, ಆಟದ ವಿಳಂಬವನ್ನು ತಡೆಯುವ ಉದ್ದೇಶದಿಂದ ನಿಯಮಗಳನ್ನು ಉಲ್ಲೇಖಿಸಿ ಆನ್-ಫೀಲ್ಡ್ ಅಂಪೈರ್‌ಗಳು ವಿನಂತಿಯನ್ನು ನಿರಾಕರಿಸಿದರು. ಈ ವೇಳೆ ನಿತೀಶ್ ರಾಣಾ ನಾಲ್ಕನೇ ಅಂಪೈರ್ ಜೊತೆ ವಾಗ್ವಾದ ನಡೆಸಿದರು. ಇದು ಐಪಿಎಲ್ ನೀತಿ ಸಂಹಿತೆಯ ಉಲ್ಲಂಘನೆಯಾಗಿದೆ. ಆದ್ದರಿಂದ‌ ಅವರಿಗೆ ದಂಡ ಮತ್ತು ಡಿಮೆರಿಟ್‌ ಅಂಕ ನೀಡಲಾಗಿದೆ ಎಂದು ಮ್ಯಾಚ್‌ರೆಫರಿ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ. ರಾಣಾ ಐಪಿಎಲ್‌ನ ಆಟಗಾರರ ನೀತಿ ಸಂಹಿತೆಯ ಲೆವೆಲ್ 1 ಅನ್ನು ಉಲ್ಲಂಘಿಸಿದರು.

ಚೆನ್ನೈ ನಾಯಕ ಗಾಯಕ್ವಾಡ್‌ಗೂ ದಂಡ

ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಋತುರಾಜ್ ಗಾಯಕ್ವಾಡ್ ಅವರಿಗೆ ದಂಡ ವಿಧಿಸಲಾಗಿದೆ. ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ನಿಧಾನಗತಿಯ ಓವರ್‌ ದರ ಕಾಯ್ದುಕೊಂಡಿದ್ದಕ್ಕಾಗಿ ಅವರಿಗೆ ದಂಡ ವಿಧಿಸಲಾಗಿದೆ. ಐಪಿಎಲ್ ನೀತಿ ಸಂಹಿತೆಯ ಆರ್ಟಿಕಲ್ 2.22 ರ ಅಡಿಯಲ್ಲಿ ಇದು ಅವರ ತಂಡದ ಮೊದಲ ಅಪರಾಧವಾಗಿತ್ತು. ಇದರ ಪರಿಣಾಮವಾಗಿ, ಗಾಯಕ್ವಾಡ್‌ಗೆ ರೂ. 12 ಲಕ್ಷ ದಂಡ ವಿಧಿಸಲಾಗಿದೆ.

MI vs RCB: ವಿರಾಟ್-ರೋಹಿತ್‌ ಆಟ ನೋಡಲು ಅಭಿಮಾನಿಗಳ ಕಾತರ

ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧದ ಗೆಲುವಿನೊಂದಿಗೆ, ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಈ ಋತುವಿನ ಮೊದಲ ಗೆಲುವು ದಾಖಲಿಸಿತು. ಋತುವಿನ ಮೊದಲ ಎರಡು ಅಂಕಗಳೊಂದಿಗೆ, ಐದು ಬಾರಿಯ ಚಾಂಪಿಯನ್‌ಗಳು ಅಂಕಪಟ್ಟಿಯಲ್ಲಿ ಒಂಬತ್ತನೇ ಸ್ಥಾನಕ್ಕೆ ಏರಿದ್ದಾರೆ, ಕೋಲ್ಕತ್ತಾ ನೈಟ್ ರೈಡರ್ಸ್ 10 ನೇ ಸ್ಥಾನಕ್ಕೆ ಕುಸಿದಿದೆ.

ಪಂದ್ಯದ ಬಗ್ಗೆ ಹೇಳುವುದಾದರೆ, ಮೊದಲು ಬ್ಯಾಟ್‌ ಮಾಡಿದ ಚೆನ್ನೈ ಸ್ಯಾಮ್ಸನ್‌(115* ರನ್‌)ರ ಸ್ಫೋಟಕ ಆಟ ನೆರವಿನಿಂದ. 20 ಓವರಲ್ಲಿ 2 ವಿಕೆಟ್‌ಗೆ 212 ರನ್‌ ಗಳಿಸಿತು. ಡೆಲ್ಲಿ ಉತ್ತಮ ಆರಂಭ ಪಡೆದರೂ, ಅದರ ಲಾಭವೆತ್ತಲು ಸಾಧ್ಯವಾಗಲಿಲ್ಲ. 189 ರನ್‌ಗೆ ಆಲೌಟ್‌ ಆಯಿತು.