Roopa Gururaj Column: ಅಂಧಕಾರದ ನಡುವೆ ಜ್ಞಾನದ ಹಸಿವು: ದ್ರೌಪದಿ ಮುರ್ಮು

ಒಂದೊಳ್ಳೆ ಮಾತು

ಒಂದು ಪುಟ್ಟ ಮಗುವಿನ ಅತಿ ದೊಡ್ಡ ಕನಸು ಏನಾಗಿರಬಹುದು? ಆಟಿಕೆಗಳು? ಬಣ್ಣ-ಬಣ್ಣದ ಬಟ್ಟೆಗಳು? ಅಥವಾ ಐಷಾರಾಮಿ ಜೀವನ? ಆದರೆ, ಒಡಿಶಾದ ಮಯೂರ್ ಭಂಜ್ ಜಿಲ್ಲೆಯ ಒಂದು ಪುಟ್ಟ ಹಳ್ಳಿಯ ಆ ಹೆಣ್ಣು ಮಗುವಿನ ಕನಸು ಮಾತ್ರ ಅತ್ಯಂತ ಸರಳವಾಗಿತ್ತು. ಆದರೆ, ಅಷ್ಟೇ ದುಬಾರಿಯಾಗಿತ್ತು. ಆಕೆಯ ಕನಸು ಕೇವಲ ಒಂದು ತರಗತಿಯ ಒಳಗೆ ಕುಳಿತು ಪಾಠ ಕೇಳುವು ದಾಗಿತ್ತು. ಇದು ಭಾರತದ ರಾಷ್ಟ್ರ ಪತಿಗಳಾದ ದ್ರೌಪದಿ ಮುರ್ಮು ಅವರ ಅಸಂಖ್ಯಾತ ಅಡೆ-ತಡೆಗಳ ನಡುವೆ ಅರಳಿದ ಅದಮ್ಯ ಚೇತನದ ಭಾವನಾತ್ಮಕ ಪಯಣ.

ಒಡಿಶಾದ ಸಾಂತಾಲ್ ಬುಡಕಟ್ಟು ಸಮುದಾಯದಲ್ಲಿ ಜನಿಸಿದ ದ್ರೌಪದಿಯವರ ಬಾಲ್ಯ ಹೂವಿನ ಹಾಸಿಗೆಯಾಗಿರಲಿಲ್ಲ. ಬಡತನ ಎಂಬುದು ಅಲ್ಲಿ ಕೇವಲ ಶಬ್ಧವಾಗಿರಲಿಲ್ಲ, ಪ್ರತಿ ಕ್ಷಣದ ನೋವಾ ಗಿತ್ತು. ಅಂದಿನ ಕಾಲದಲ್ಲಿ ಒಂದು ಬುಡಕಟ್ಟು ಹೆಣ್ಣು ಮಗು ಶಾಲೆಗೆ ಹೋಗುವುದು ಅಸಾಧ್ಯದ ಮಾತಾಗಿತ್ತು.

ಸಂಪನ್ಮೂಲಗಳಿಲ್ಲ, ಸರಿ ಯಾದ ರಸ್ತೆಗಳಿಲ್ಲ. ಆದರೆ, ಆಕೆಯ ಕಣ್ಣುಗಳಲ್ಲಿ ಮಾತ್ರ ಶಿಕ್ಷಣದ ಬಗ್ಗೆ ಅಪಾರ ಹಂಬಲವಿತ್ತು. ನಾನು ಬಂದ ಹಳ್ಳಿಯಲ್ಲಿ ಕನಿಷ್ಠ ಶಿಕ್ಷಣ ಪಡೆಯುವುದು ಕೂಡ ಒಂದು ದೊಡ್ಡ ಕನಸಾಗಿತ್ತು ಎಂದು ಅವರು ನಂತರ ನೆನೆದಿದ್ದಾರೆ. ಆದರೆ, ಆ ಹೆಣ್ಣು ಮಗಳು ಸೋಲೊಪ್ಪ ಲಿಲ್ಲ.

ಇದನ್ನೂ ಓದಿ: Roopa Gururaj Column: ಸಾವನ್ನು ನಗುತ್ತಲೇ ಗೆದ್ದ ಅಪ್ರತಿಮ ವೀರ: ಸ್ಯಾಮ್‌ ಮಾಣಿಕ್‌ʼಶಾ

ಮೈಲುಗಟ್ಟಲೆಯ ದೂರವನ್ನು ಕಾಲ್ನಡಿಗೆಯಲ್ಲಿ ಕ್ರಮಿಸುತ್ತಾ, ಹರಿದ ಪುಸ್ತಕಗಳನ್ನೇ ಆಸ್ತಿಯಾಗಿಸಿ ಕೊಂಡು ವಿದ್ಯಾಭ್ಯಾಸ ಮುಂದುವರಿಸಿದರು. ಭುವನೇಶ್ವರದ ರಮಾದೇವಿ ಮಹಿಳಾ ಕಾಲೇಜಿಗೆ ಕಾಲಿಟ್ಟಾಗ, ಅವರು ತಮ್ಮ ಇಡೀ ಹಳ್ಳಿಯಿಂದ ಕಾಲೇಜು ಮೆಟ್ಟಿಲು ಹತ್ತಿದ ಮೊದಲಿಗರಾಗಿದ್ದರು.

ಅದು ಕೇವಲ ಒಬ್ಬ ಹೆಣ್ಣುಮಗಳ ಸಾಧನೆಯಾಗಿರಲಿಲ್ಲ; ಒಂದು ಇಡೀ ಸಮುದಾಯದ ಭವಿಷ್ಯಕ್ಕೆ ಸಿಕ್ಕ ಮೊದಲ ಬೆಳಕಿನ ಕಿರಣವಾಗಿತ್ತು. ಶಿಕ್ಷಣದ ನಂತರ ಅವರು ಜೂನಿಯರ್ ಅಸಿಸ್ಟೆಂಟ್ ಆಗಿ, ನಂತರ ಶಿಕ್ಷಕಿಯಾಗಿ ಸೇವೆ ಸಲ್ಲಿಸಿದರು. ಯಾವುದೇ ಪ್ರಭಾವವಿಲ್ಲದೆ, ಯಾವುದೇ ಅಡ್ಡದಾರಿ ಹಿಡಿ ಯದೆ ಕೇವಲ ಪರಿಶ್ರಮವನ್ನೇ ನೆಚ್ಚಿಕೊಂಡರು. ಅವರ ವೈಯಕ್ತಿಕ ಜೀವನವು ಅನೇಕ ಏರಿಳಿತ ಗಳನ್ನು ಕಂಡಿತು.

ಪ್ರೀತಿಯ ಪುತ್ರರು ಮತ್ತು ಪತಿಯನ್ನು ಕಳೆದುಕೊಂಡಾಗ ಆಕೆ ಪಟ್ಟ ನೋವು ಹೇಳತೀರದು. ಒಬ್ಬ ಸಾಮಾನ್ಯ ವ್ಯಕ್ತಿಯಾಗಿದ್ದರೆ ಬಹುಶಃ ಅಲ್ಲಿಗೇ ಬದುಕು ಅಂತ್ಯವಾಯಿತು ಎಂದು ಭಾವಿಸುತ್ತಿದ್ದರು. ಆದರೆ, ದ್ರೌಪದಿ ಮುರ್ಮು ಅವರು ಆ ನೋವನ್ನೇ ಶಕ್ತಿಯನ್ನಾಗಿಸಿಕೊಂಡರು. ಮೌನವಾದ ದೃಢ ಸಂಕಲ್ಪ ಅವರ ಜೀವನದ ಮಂತ್ರವಾಯಿತು. ವರ್ಷಗಳು ಉರುಳಿದವು.

ಅದೇ ಹಳ್ಳಿ ಹುಡುಗಿ ಇಂದು ಭಾರತದ ಅತ್ಯುನ್ನತ ಸಾಂವಿಧಾನಿಕ ಹುದ್ದೆಯಾದ ರಾಷ್ಟ್ರಪತಿ ಭವನ ದೊಳಗೆ ಹೆಜ್ಜೆ ಇಟ್ಟಿದ್ದಾರೆ. ಭಾರತದ ಮೊದಲ ಬುಡಕಟ್ಟು ಮಹಿಳಾ ರಾಷ್ಟ್ರಪತಿಯಾಗಿ ಆಯ್ಕೆ ಯಾದಾಗ, ಅದು ಕೇವಲ ರಾಜಕೀಯ ವಿಜಯವಾಗಿರಲಿಲ್ಲ, ಅದು ಭಾರತದ ಪ್ರಜಾಪ್ರಭುತ್ವದ ಅತಿದೊಡ್ಡ ಗೆಲವಾಗಿತ್ತು.

ಅವರು ದೀರ್ಘಕಾಲ ಶಿಕ್ಷಕಿಯಾಗಿ ಸೇವೆ ಸಲ್ಲಿಸಿದ್ದರು. ಒಡಿಶಾದ ರಾಯರಂಗ್ಪುರದ ಶ್ರೀ ಅರವಿಂದೋ ಇಂಟೆಗ್ರಲ್ ಎಜುಕೇಶನ್ ಸೆಂಟರ್‌ನಲ್ಲಿ ಗೌರವ ಶಿಕ್ಷಕಿಯಾಗಿ ಕೆಲಸ ಮಾಡಿದ್ದರು. ಅದಕ್ಕೂ ಮೊದಲು ಒಡಿಶಾ ಸರಕಾರದ ನೀರಾವರಿ ಇಲಾಖೆಯಲ್ಲಿ ಕಿರಿಯ ಸಹಾಯಕರಾಗಿಯೂ ಕಾರ್ಯನಿರ್ವಹಿಸಿದ್ದರು.

ಒಟ್ಟಾರೆಯಾಗಿ, ಒಬ್ಬ ಶಿಕ್ಷಕಿಯಾಗಿ ವೃತ್ತಿ ಜೀವನ ಆರಂಭಿಸಿ, ನಂತರ ಕೌನ್ಸಿಲರ್, ಶಾಸಕಿ, ಸಚಿವೆ ಮತ್ತು ರಾಜ್ಯಪಾಲ ರಾಗಿ ಹಂತ-ಹಂತವಾಗಿ ಬೆಳೆದು ದೇಶದ ಅತ್ಯುನ್ನತ ಸಾಂವಿಧಾನಿಕ ಹುದ್ದೆ ಯನ್ನು ಅಲಂಕರಿಸಿದ್ದಾರೆ. ಶಿಕ್ಷಣಕ್ಕಾಗಿ ಹಂಬಲಿಸಿದ ಹುಡುಗಿಯಿಂದ ಇಡೀ ದೇಶದ ಸೈನ್ಯದ ಮಹಾದಂಡ ನಾಯಕಿಯಾಗುವವರೆಗೆ ಅವರ ಹಾದಿ ಸ್ಪೂರ್ತಿದಾಯಕ.

ನಮ್ಮ ಹಿನ್ನೆಲೆ ನಮ್ಮ ಭವಿಷ್ಯವನ್ನು ನಿರ್ಧರಿಸುವುದಿಲ್ಲ, ಬದಲಿಗೆ ನಮ್ಮ ನಿರ್ಧಾರಗಳು ನಮ್ಮ ದಾರಿಯನ್ನು ರೂಪಿಸುತ್ತವೆ. ಒಂದು ಪುಟ್ಟ ಹಳ್ಳಿಯ ಶಾಲೆಯ ತರಗತಿಯಲ್ಲಿ ಕುಳಿತುಕೊಳ್ಳಲು ಬಯಸಿದ್ದ ಆ ಮಗು ಇಂದು ದೇಶದ ಮೊದಲ ಪ್ರಜೆಯಾಗಿ ಇಡೀ ಜಗತ್ತಿಗೆ ಮಾದರಿಯಾಗಿದ್ದಾರೆ.

ಕೆಲವರು ಅಧಿಕಾರವನ್ನು ಪರಂಪರೆಯಿಂದ ಪಡೆಯುತ್ತಾರೆ. ಆದರೆ, ಕೆಲವರು ನೋವಿನ ಹಾದಿ ಯಲ್ಲಿ ನಡೆದು ಅದನ್ನು ಸಾಧಿಸುತ್ತಾರೆ. ದ್ರೌಪದಿ ಮುರ್ಮು ಅವರ ಈ ಪಯಣ ಎಂದಿಗೂ ಮರೆಯ ಲಾಗದ ಮತ್ತು ಕೋಟ್ಯಂತರ ಭಾರತೀಯರ ಹೃದಯದಲ್ಲಿ ಭರವಸೆ ಮೂಡಿಸುವ ಒಂದು ಸುಂದರ ಕಾವ್ಯ. ಸಣ್ಣ ಕನಸುಗಳೇ ದೊಡ್ಡ ಇತಿಹಾಸವನ್ನು ನಿರ್ಮಿಸುತ್ತವೆ. ಆದರೆ, ಕನಸು ಕಾಣುವ ಮನಸ್ಸನ್ನು ನಾವು ಎಂದು ಜೀವಂತವಾಗಿ ಇರಿಸಿಕೊಳ್ಳಬೇಕು.