Leena Joshi Column: ತುಂಡು ತುಂಡು ಟೆಂಡರ್ʼನಿಂದಾಗಿ ಮೆಟ್ರೋ ಯೋಜನೆಗಳು ವಿಳಂಬ
ಭಾರತದ ನಗರಗಳು ವೇಗವಾಗಿ ಬೆಳೆಯುತ್ತಿವೆ. ಟ್ರಾಫಿಕ್ ದಟ್ಟಣೆ, ವಾಯುಮಾಲಿನ್ಯ ಮತ್ತು ಪ್ರಯಾಣದ ಸಮಯವನ್ನು ಕಡಿಮೆ ಮಾಡಲು ‘ಮೆಟ್ರೋ’ ರೈಲು ವ್ಯವಸ್ಥೆಗಳು ಅತ್ಯಗತ್ಯ ಮೂಲಸೌಕರ್ಯಗಳಾಗಿ ಹೊರಹೊಮ್ಮಿವೆ. ಬೆಂಗಳೂರು, ದೆಹಲಿ, ಮುಂಬೈ, ಚೆನ್ನೈ, ಜೈಪುರ, ಲಖನೌ, ಕಾನ್ಪುರ, ಕೊಚ್ಚಿನ್, ಹೈದರಾಬಾದ್, ಆಗ್ರಾ, ಅಹಮದಾಬಾದ್, ನೋಯ್ಡಾ, ಭೋಪಾಲ್, ಇಂದೋರ್, ನಾಗಪುರ, ಪಟನಾ, ಪುಣೆ, ಗುರ್ಗಾಂವ್, ಕೋಲ್ಕತ್ತಾ ಸೇರಿದಂತೆ ಹಲವು ನಗರಗಳಲ್ಲಿ ಮೆಟ್ರೋ ಜಾಲಗಳು ಈಗಾಗಲೇ ಕಾರ್ಯನಿರ್ವಹಿಸುತ್ತಿವೆ ಅಥವಾ ನಿರ್ಮಾಣ ಹಂತದಲ್ಲಿವೆ.
-
ಕಳಕಳಿ
ಲೀನಾ ಜೋಶಿ
ಭಾರತದ ನಗರಗಳು ವೇಗವಾಗಿ ಬೆಳೆಯುತ್ತಿವೆ. ಟ್ರಾಫಿಕ್ ದಟ್ಟಣೆ, ವಾಯುಮಾಲಿನ್ಯ ಮತ್ತು ಪ್ರಯಾಣದ ಸಮಯವನ್ನು ಕಡಿಮೆ ಮಾಡಲು ‘ಮೆಟ್ರೋ’ ರೈಲು ವ್ಯವಸ್ಥೆಗಳು ಅತ್ಯಗತ್ಯ ಮೂಲಸೌಕರ್ಯಗಳಾಗಿ ಹೊರಹೊಮ್ಮಿವೆ. ಬೆಂಗಳೂರು, ದೆಹಲಿ, ಮುಂಬೈ, ಚೆನ್ನೈ, ಜೈಪುರ, ಲಖನೌ, ಕಾನ್ಪುರ, ಕೊಚ್ಚಿನ್, ಹೈದರಾಬಾದ್, ಆಗ್ರಾ, ಅಹಮದಾಬಾದ್, ನೋಯ್ಡಾ, ಭೋಪಾಲ್, ಇಂದೋರ್, ನಾಗಪುರ, ಪಟನಾ, ಪುಣೆ, ಗುರ್ಗಾಂವ್, ಕೋಲ್ಕತ್ತಾ ಸೇರಿದಂತೆ ಹಲವು ನಗರಗಳಲ್ಲಿ ಮೆಟ್ರೋ ಜಾಲಗಳು ಈಗಾಗಲೇ ಕಾರ್ಯನಿರ್ವಹಿಸುತ್ತಿವೆ ಅಥವಾ ನಿರ್ಮಾಣ ಹಂತದಲ್ಲಿವೆ.
ಆದರೆ, ಅನೇಕ ಮೆಟ್ರೋ ಯೋಜನೆಗಳು ತಮ್ಮ ನಿಗದಿತ ಸಮಯಕ್ಕಿಂತ ಬಹಳಷ್ಟು ವಿಳಂಬವಾಗಿ ಪೂರ್ಣಗೊಳ್ಳುತ್ತಿವೆ ಮತ್ತು ಅಂದಾಜು ವೆಚ್ಚವನ್ನು ಮೀರಿ ಹಣಕಾಸಿನ ಹೊರೆಯನ್ನೂ ಹೆಚ್ಚಿಸು ತ್ತಿವೆ. ಈ ವಿಳಂಬಕ್ಕೆ ಹಲವಾರು ಕಾರಣಗಳಿರಬಹುದು, ಆದರೆ ಬಹುಮುಖ್ಯ ಕಾರಣಗಳಲ್ಲಿ ಒಂದು ‘ತುಂಡು ತುಂಡು ಟೆಂಡರ್’ (Fragmented tender) ವ್ಯವಸ್ಥೆ.
ಭಾರತದ ಮೆಟ್ರೋ ಯೋಜನೆಗಳ ಟೆಂಡರ್ ವ್ಯವಸ್ಥೆ ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಕೊಂಚ ಅವಲೋಕಿಸೋಣ. ನಮ್ಮಲ್ಲಿ ಮೆಟ್ರೋ ಯೋಜನೆಗಳನ್ನು ಸಾಮಾನ್ಯವಾಗಿ ‘ವಿವಿಧ ಮಾರ್ಗಗಳು’ ಮತ್ತು ಪ್ರತಿ ಮಾರ್ಗದಲ್ಲಿ ‘ವಿವಿಧ ವ್ಯವಸ್ಥೆಗಳು’ ಎಂದು ವಿಭಜಿಸಿ ಟೆಂಡರ್ಗಳನ್ನು ಆಹ್ವಾನಿಸಲಾಗುತ್ತದೆ.
೧. ಮಾರ್ಗವಾರು ವಿಭಜನೆ: ಮೊದಲಿಗೆ, ಒಂದು ನಗರದಲ್ಲಿ ಹಲವು ಮೆಟ್ರೋ ಮಾರ್ಗಗಳನ್ನು ಯೋಜಿಸಲಾಗುತ್ತದೆ (ಉದಾಹರಣೆಗೆ, ಹಸಿರು ಮಾರ್ಗ, ನೇರಳೆ ಮಾರ್ಗ). ಪ್ರತಿ ಮಾರ್ಗವನ್ನು ಪ್ರತ್ಯೇಕ ಯೋಜನೆಯಂತೆ ಪರಿಗಣಿಸಲಾಗುತ್ತದೆ.
ಇದನ್ನೂ ಓದಿ: Leena Joshi Column: ನಮ್ಮ ಮೆಟ್ರೋ ನಿರ್ಮಾಣ: ಇಷ್ಟೊಂದು ಬೇಜವಾಬ್ದಾರಿ ಏಕೆ ?
- ವ್ಯವಸ್ಥೆವಾರು ವಿಭಜನೆ: ಇದರೊಳಗೆ, ಪ್ರತಿ ಮೆಟ್ರೋ ಮಾರ್ಗವನ್ನು ಮತ್ತಷ್ಟು ಉಪ-ವಿಭಾಗಗಳಾಗಿ ವಿಂಗಡಿಸಲಾಗುತ್ತದೆ. ಇವುಗಳಿಗೆ ಪ್ರತ್ಯೇಕ ಟೆಂಡರ್ಗಳನ್ನು ಕರೆಯಲಾಗುತ್ತದೆ:
ಸಿವಿಲ್ ಕಾಮಗಾರಿಗಳು: ಸುರಂಗಗಳು, ಎಲಿವೇಟೆಡ್ ವಯಡಕ್ಟ್ಗಳು, ನಿಲ್ದಾಣಗಳ ನಿರ್ಮಾಣ. ಇದನ್ನು ಮತ್ತಷ್ಟು ಹಲವಾರು ಸಣ್ಣ ಪ್ಯಾಕೇಜ್ಗಳಾಗಿ ವಿಭಾಗಿಸಬಹುದು.
ಟ್ರ್ಯಾಕ್ ವP: ರೈಲು ಹಳಿಗಳ ಅಳವಡಿಕೆ. ರೋಲಿಂಗ್ ಸ್ಟಾಕ್: ರೈಲು ಬೋಗಿಗಳ ತಯಾರಿಕೆ ಮತ್ತು ಪೂರೈಕೆ.
ಸಿಗ್ನಲಿಂಗ್ ಸಿಸ್ಟಮ್: ರೈಲುಗಳ ಸುರಕ್ಷಿತ ಚಲನೆ ಮತ್ತು ಸಂಚಾರ ನಿಯಂತ್ರಣಕ್ಕೆ ಸಂಬಂಧಿಸಿದ ತಂತ್ರಜ್ಞಾನ. ಇಲೆಕ್ಟ್ರಿಫಿಕೇಷನ್/ಪವರ್ ಸಪ್ಲೈ: ರೈಲುಗಳಿಗೆ ವಿದ್ಯುತ್ ಪೂರೈಸುವ ವ್ಯವಸ್ಥೆ.
ಟೆಲಿಕಮ್ಯುನಿಕೇಷನ್: ಸಂವಹನ ವ್ಯವಸ್ಥೆಗಳು.
ಸ್ವಯಂಚಾಲಿತ ಶುಲ್ಕ ಸಂಗ್ರಹಣೆ/ಟಿಕೆಟಿಂಗ್: ಟಿಕೆಟ್ ಮತ್ತು ಗೇಟ್ ವ್ಯವಸ್ಥೆಗಳು.
ಸ್ಕೇಡಾ (SCADA- Supervisory Control and Data Acquisition): ಸಂಪೂರ್ಣ ಮೆಟ್ರೋ ಕಾರ್ಯ ಚರಣೆಯನ್ನು ಮೇಲ್ವಿಚಾರಣೆ ಮಾಡುವ ನಿಯಂತ್ರಣ ವ್ಯವಸ್ಥೆ.
ಲಿಫ್ಟ್ʼಗಳು ಮತ್ತು ಎಸ್ಕಲೇಟರ್ಗಳು
ಪ್ಲಾಟ್ ಫಾರ್ಮ್ ಸ್ಕ್ರೀನ್ ಡೋರ್ಗಳು: ಈ ಪ್ರತಿಯೊಂದು ಉಪ-ವಿಭಾಗದ ಟೆಂಡರ್ಗಳಲ್ಲೂ ರಾಷ್ಟ್ರೀಯ ಮತ್ತು ಜಾಗತಿಕ ಮಟ್ಟದ ಕಂಪನಿಗಳು ಭಾಗವಹಿಸುತ್ತವೆ ಮತ್ತು ಗೆಲ್ಲುತ್ತವೆ. ಒಂದು ಮೆಟ್ರೋ ಮಾರ್ಗವನ್ನು ನಿರ್ಮಿಸಲು 10-15 ವಿವಿಧ ಕಂಪನಿಗಳು ಭಾಗಿಯಾಗಿರುತ್ತವೆ, ಪ್ರತಿಯೊಂದೂ ವಿಭಿನ್ನ ತಂತ್ರಜ್ಞಾನವನ್ನು ಹೊಂದಿರುತ್ತವೆ.
ವಿಳಂಬಕ್ಕೆ ಕಾರಣವಾಗುವ ಅಂಶಗಳು
೧. ಅಂತರ-ಕಾರ್ಯನಿರ್ವಹಣೆ ಸಮಸ್ಯೆಗಳು: ವಿವಿಧ ಕಂಪನಿಗಳು ಪೂರೈಸಿದ ವ್ಯವಸ್ಥೆಗಳು ಸುಗಮವಾಗಿ ಪರಸ್ಪರ ಸಂವಹನ ನಡೆಸಬೇಕು. ಉದಾಹರಣೆಗೆ, ಒಂದು ಕಂಪನಿಯ ಸಿಗ್ನಲಿಂಗ್ ವ್ಯವಸ್ಥೆ ಇನ್ನೊಂದು ಕಂಪನಿಯ ರೈಲು ಬೋಗಿಗಳು ಮತ್ತು ನಿಯಂತ್ರಣ ಕೇಂದ್ರದೊಂದಿಗೆ ಸಂಪೂರ್ಣವಾಗಿ ಹೊಂದಿಕೊಳ್ಳಬೇಕು. ವಿವಿಧ ಕಂಪನಿಗಳು ವಿಭಿನ್ನ ಮಾನದಂಡಗಳು ಮತ್ತು ಪ್ರೋಟೋಕಾಲ್ʼಗಳನ್ನು ಬಳಸಿದಾಗ, ಏಕೀಕರಣ ಒಂದು ದೊಡ್ಡ ಸವಾಲಾಗಿ ಪರಿಣಮಿಸುತ್ತದೆ.
ಇದರಿಂದಾಗಿ ಹೊಂದಾಣಿಕೆ ಪರೀಕ್ಷೆಗಳು ಮತ್ತು ದೋಷನಿವಾರಣೆಗೆ ಅಪಾರ ಸಮಯ ವ್ಯಯ ವಾಗುತ್ತದೆ. ಸಣ್ಣ ಅಸಮರ್ಪಕತೆಯು ಸಹ ಇಡೀ ವ್ಯವಸ್ಥೆಯ ಕಾರ್ಯಕ್ಷಮತೆಯನ್ನು ಕುಂಠಿತಗೊಳಿಸಬಹುದು.
- ಇಂಟರ್ ಫೇಸ್ ನಿರ್ವಹಣೆ ಸಂಕೀರ್ಣತೆ: ಹಲವಾರು ಗುತ್ತಿಗೆದಾರರ ನಡುವೆ ಜವಾಬ್ದಾರಿ ಗಳನ್ನು ಸ್ಪಷ್ಟವಾಗಿ ವಿಭಜಿಸುವುದು ಕಷ್ಟ. ಒಂದು ವ್ಯವಸ್ಥೆ ಇನ್ನೊಂದು ವ್ಯವಸ್ಥೆಯೊಂದಿಗೆ ಎಲ್ಲಿ ಸಂಪರ್ಕಿಸುತ್ತದೆ (interface) ಎಂಬುದು ಮುಖ್ಯ. ಈ ಇಂಟರ್ ಫೇಸ್ ಹಂತದಲ್ಲಿ ಸಮಸ್ಯೆ ಎದುರಾದಾಗ, ಯಾವ ಗುತ್ತಿಗೆದಾರರು ಇದಕ್ಕೆ ಜವಾಬ್ದಾರರು ಎಂಬುದನ್ನು ನಿರ್ಧರಿಸುವುದು ಕಷ್ಟವಾಗುತ್ತದೆ. ಇದು ಪರಸ್ಪರ ದೂಷಣೆಗೆ, ಸರಣಿ ಸಭೆಗೆ ಮತ್ತು ಪರಿಹಾರ ಕಂಡುಕೊಳ್ಳು ವಲ್ಲಿನ ವಿಳಂಬಕ್ಕೆ ಕಾರಣವಾಗುತ್ತದೆ. ಮೆಟ್ರೋ ಪ್ರಾಧಿಕಾರವು ಈ ಎಲ್ಲಾ ಇಂಟರ್ ಫೇಸ್ ಗಳನ್ನು ನಿರ್ವಹಿಸಲು ಭಾರಿ ಸಂಪನ್ಮೂಲಗಳನ್ನು ಮತ್ತು ಸಮಯವನ್ನು ವ್ಯಯಿಸಬೇಕಾಗು ತ್ತದೆ. ಇದು ಒಂದು ಆರ್ಕೆಸ್ಟ್ರಾ ವಾದ್ಯವೃಂದದಂತೆ, ಸರಿಯಾದ ನಿರ್ವಾಹಕನಿಲ್ಲದೆ ಪ್ರತಿಯೊಬ್ಬರೂ ತಮ್ಮದೇ ಇಷ್ಟಕ್ಕೆ ವಾದ್ಯ ನುಡಿಸಿದಂತೆ.
- ವೇಳಾಪಟ್ಟಿ ಸಂಘರ್ಷಗಳು ಮತ್ತು ಅನಿಶ್ಚಿತತೆ: ಸಿವಿಲ್ ಕೆಲಸಗಳು ಪೂರ್ಣಗೊಳ್ಳುವ ಮೊದಲೇ ಟ್ರ್ಯಾಕ್ ಕೆಲಸಗಳು ಪ್ರಾರಂಭವಾಗುವುದಿಲ್ಲ. ಟ್ರ್ಯಾಕ್ ಮತ್ತು ವಿದ್ಯುತ್ ಕೆಲಸಗಳು ಪೂರ್ಣಗೊಂಡ ನಂತರವೇ ಸಿಗ್ನಲಿಂಗ್ ಮತ್ತು ರೈಲು ಬೋಗಿಗಳ ಪರೀಕ್ಷೆ ಪ್ರಾರಂಭವಾಗುತ್ತದೆ. ಒಬ್ಬ ಗುತ್ತಿಗೆದಾರನ ಕೆಲಸದಲ್ಲಿನ ವಿಳಂಬವು ಇತರ ಎಲ್ಲಾ ಗುತ್ತಿಗೆದಾರರ ಕೆಲಸದ ಮೇಲೆ ಸರಪಳಿ ಪ್ರತಿಕ್ರಿಯೆಯನ್ನು ಉಂಟುಮಾಡುತ್ತದೆ.
ಒಂದು ಸಣ್ಣ ವಿಳಂಬವೂ ಮೆಟ್ರೋ ಯೋಜನೆಯ ಒಟ್ಟು ವೇಳಾಪಟ್ಟಿಯನ್ನು ಹಲವಾರು ತಿಂಗಳು ಗಳಷ್ಟು ಮುಂದಕ್ಕೆ ತಳ್ಳಬಹುದು. ಹೆಚ್ಚುವರಿಯಾಗಿ, ನಿರ್ಮಾಣ ಸ್ಥಳಕ್ಕೆ ಲಭ್ಯತೆ ಮತ್ತು ಸಂಪನ್ಮೂಲ ಹಂಚಿಕೆ ಕುರಿತು ಗುತ್ತಿಗೆದಾರರ ನಡುವೆ ಸಂಘರ್ಷಗಳು ಉಂಟಾಗಬಹುದು.
- ಪರೀಕ್ಷೆ ಮತ್ತು ಕಾರ್ಯಾರಂಭದ ಸವಾಲುಗಳು: ಮೆಟ್ರೋ ವ್ಯವಸ್ಥೆಯು ಕೇವಲ ಪ್ರತ್ಯೇಕ ಭಾಗಗಳ ಜೋಡಣೆಯಲ್ಲ, ಬದಲಿಗೆ ಒಂದು ಸಮಗ್ರ, ಅಖಂಡ ಘಟಕವಾಗಿ ಕೆಲಸ ಮಾಡಬೇಕು. ಸಿವಿಲ, ಟ್ರ್ಯಾಕ್, ಸಿಗ್ನಲಿಂಗ್, ಇಲೆಕ್ಟ್ರಿಫಿಕೇಷನ್ ಮತ್ತು ರೋಲಿಂಗ್ ಸ್ಟಾಕ್- ಇವೆಲ್ಲವೂ ಒಟ್ಟಾಗಿ, ಸುರಕ್ಷಿತವಾಗಿ ಮತ್ತು ದಕ್ಷತೆಯಿಂದ ಕಾರ್ಯನಿರ್ವಹಿಸಬೇಕು. ಪರೀಕ್ಷಾ ಹಂತದಲ್ಲಿ ಹತ್ತಾರು ಸಮಸ್ಯೆಗಳು ಒಟ್ಟಾಗಿ ಹೊರಹೊಮ್ಮುತ್ತವೆ. ಪ್ರತಿಯೊಂದಕ್ಕೂ ಮೂಲಕಾರಣವನ್ನು ಕಂಡು ಹಿಡಿಯುವುದು ಮತ್ತು ಅದನ್ನು ಸರಿಪಡಿಸಲು ಹಲವಾರು ಕಂಪನಿಗಳ ಸಹಕಾರವನ್ನು ಪಡೆಯುವುದು ಸಮಯ ತೆಗೆದುಕೊಳ್ಳುವ ಪ್ರಕ್ರಿಯೆ. ಇದು ಸಂಪೂರ್ಣ ವ್ಯವಸ್ಥೆಯ ಕಾರ್ಯಾರಂಭವನ್ನು ವಿಳಂಬಗೊಳಿಸುತ್ತದೆ.
- ವೆಚ್ಚ ಹೆಚ್ಚಳ: ಯೋಜನೆಯಲ್ಲಿನ ಪ್ರತಿಯೊಂದು ವಿಳಂಬವೂ ಹೆಚ್ಚುವರಿ ವೆಚ್ಚವನ್ನು ಹುಟ್ಟು ಹಾಕುತ್ತದೆ. ಗುತ್ತಿಗೆದಾರರ ಸಿಬ್ಬಂದಿ ಮತ್ತು ಯಂತ್ರೋಪಕರಣಗಳ ನಿಷ್ಕ್ರಿಯ ಸಮಯ, ಸಾಮಗ್ರಿ ಗಳ ಬೆಲೆ ಏರಿಕೆ, ಬಡ್ಡಿ ವೆಚ್ಚಗಳು ಮತ್ತು ಮರು-ಪರೀಕ್ಷೆಯ ಅಗತ್ಯತೆಗಳು ಯೋಜನೆ ಯ ಒಟ್ಟು ವೆಚ್ಚವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತವೆ. ಕೆಲವು ಸಂದರ್ಭಗಳಲ್ಲಿ, ತಾಂತ್ರಿಕ ಹೊಂದಾಣಿಕೆ ಸಮಸ್ಯೆಗಳನ್ನು ಪರಿಹರಿಸಲು ದುಬಾರಿ ’ customize ’ ಮಾಡಿದ ಪರಿಹಾರ ಗಳನ್ನು ಅಭಿವೃದ್ಧಿ ಪಡಿಸಬೇಕಾಗುತ್ತದೆ.
ಜಾಗತಿಕ ಮೆಟ್ರೋ ಯೋಜನೆಗಳೊಂದಿಗೆ ಹೋಲಿಕೆ: ಸಿಂಗಾಪುರ, ಲಂಡನ್, ಪ್ಯಾರಿಸ್, ಶಾಂಘೈ, ದುಬೈ ಮುಂತಾದ ಪ್ರಮುಖ ಜಾಗತಿಕ ನಗರಗಳಲ್ಲಿ ಮೆಟ್ರೋ ಯೋಜನೆಗಳು ಅತ್ಯಂತ ವೇಗವಾಗಿ ಮತ್ತು ಸಮಗ್ರವಾಗಿ ಅನುಷ್ಠಾನಗೊಳ್ಳುತ್ತವೆ. ಇದಕ್ಕೆ ಹಲವು ಕಾರಣಗಳಿವೆ:
- ಏಕೀಕೃತ ಯೋಜನೆ ಮತ್ತು ನಿರ್ವಹಣೆ: ಅಲ್ಲಿನ ಮೆಟ್ರೋ ಪ್ರಾಧಿಕಾರಗಳು ಸಂಪೂರ್ಣ ಮೆಟ್ರೋ ಜಾಲವನ್ನು ಒಂದು ದೊಡ್ಡ, ಸಮಗ್ರ ಯೋಜನೆಯಾಗಿ ಪರಿಗಣಿಸಿ, ಏಕೀಕೃತ ತಾಂತ್ರಿಕ ಮಾನದಂಡಗಳಲ್ಲಿ ಯೋಜನೆಗಳನ್ನು ರೂಪಿಸುತ್ತವೆ. ವಿಭಜಿತ ಟೆಂಡರ್ಗಳ ಬದಲಿಗೆ, ಒಟ್ಟಾರೆ ವ್ಯವಸ್ಥೆಗಾಗಿ ಒಂದು ಗುತ್ತಿಗೆದಾರರೊಂದಿಗೆ ದೀರ್ಘಾವಧಿಯ ಒಪ್ಪಂದ ಮಾಡಿಕೊಳ್ಳಲಾಗುತ್ತದೆ.
- ತಾಂತ್ರಿಕ ಏಕರೂಪತೆ: ಇಡೀ ಮೆಟ್ರೋ ಜಾಲದಲ್ಲಿ ಒಂದೇ ರೀತಿಯ ತಂತ್ರಜ್ಞಾನವನ್ನು ಅಳವಡಿಸಲಾಗುತ್ತದೆ. ಇದರಿಂದಾಗಿ, ನಿರ್ವಹಣೆ, ದುರಸ್ತಿ, ಮತ್ತು ಅಪ್ಗ್ರೇಡ್ಗಳು ಸುಲಭ ವಾಗುತ್ತವೆ. ಹೊಸ ಮಾರ್ಗಗಳನ್ನು ನಿರ್ಮಿಸಿದಾಗ, ಅವು ಹಳೆಯ ಮಾರ್ಗಗಳೊಂದಿಗೆ ಸುಲಭವಾಗಿ ಹೊಂದಿಕೊಳ್ಳುತ್ತವೆ.
- ದಕ್ಷ ಟೆಂಡರ್ ಪ್ರಕ್ರಿಯೆ: ಟೆಂಡರ್ ಪ್ರಕ್ರಿಯೆಗಳು ಪಾರದರ್ಶಕ, ತ್ವರಿತ ಮತ್ತು ನಿಯಮಾನು ಸಾರ ನಡೆಯುತ್ತವೆ. ಭ್ರಷ್ಟಾಚಾರ ಮತ್ತು ಅನಗತ್ಯ ಕಾನೂನು ಸವಾಲುಗಳಿಗೆ ಅವಕಾಶ ಕಡಿಮೆ.
4.ಸಮಯಪಾಲನೆಗೆ ಆದ್ಯತೆ: ಯೋಜನೆಯಲ್ಲಿನ ವಿಳಂಬವು ಆರ್ಥಿಕ ನಷ್ಟ ಮಾತ್ರವಲ್ಲದೆ, ಸಾರ್ವಜನಿಕರ ಅಸಮಾಧಾನಕ್ಕೂ ಕಾರಣವಾಗುತ್ತದೆ ಎಂಬುದನ್ನು ಅರಿತು, ನಿಗದಿತ ಸಮಯದೊಳಗೆ ಯೋಜನೆ ಪೂರ್ಣಗೊಳಿಸಲು ಹೆಚ್ಚಿನ ಒತ್ತು ನೀಡಲಾಗುತ್ತದೆ.
5.ಸಂಯೋಜಿತ ಯೋಜನೆ: ಮೆಟ್ರೋ ನಿರ್ಮಾಣವನ್ನು ನಗರದ ಇತರ ಮೂಲಸೌಕರ್ಯ ಯೋಜನೆಗಳಾದ ರಸ್ತೆ, ಸೇತುವೆ, ಯುಟಿಲಿಟಿ ಲೈನ್ಗಳ (ನೀರು, ವಿದ್ಯುತ್, ಇಂಟರ್ನೆಟ್) ಸ್ಥಳಾಂತರ ದೊಂದಿಗೆ ಸಂಯೋಜನೆ ಮಾಡಲಾಗುತ್ತದೆ. ಇದರಿಂದ, ವಿವಿಧ ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಲು ಮತ್ತು ಅನಗತ್ಯ ಅಡೆತಡೆಗಳನ್ನು ತಪ್ಪಿಸಲು ಸಾಧ್ಯವಾಗುತ್ತದೆ. ಭಾರತದಲ್ಲಿ ‘ತುಂಡು ತುಂಡು’ ಟೆಂಡರ್ ವ್ಯವಸ್ಥೆಯನ್ನು ಹಲವು ಕಾರಣಗಳಿಗಾಗಿ ಅಳವಡಿಸಿಕೊಳ್ಳಲಾಗಿದೆ.
ಅವುಗಳೆಂದರೆ: ಹೆಚ್ಚಿನ ಸ್ಪರ್ಧೆ ಮತ್ತು ಕಡಿಮೆ ವೆಚ್ಚ: ಪ್ರತ್ಯೇಕ ಪ್ಯಾಕೇಜ್ʼಗಳು ಸಣ್ಣ ಕಂಪನಿ ಗಳಿಗೂ ಭಾಗವಹಿಸಲು ಅವಕಾಶ ನೀಡುತ್ತವೆ, ಇದು ಸ್ಪರ್ಧೆಯನ್ನು ಹೆಚ್ಚಿಸಿ ಆರಂಭಿಕ ಹಂತದಲ್ಲಿ ವೆಚ್ಚವನ್ನು ಕಡಿಮೆ ಮಾಡುತ್ತದೆ ಎಂದು ಭಾವಿಸಲಾಗುತ್ತದೆ!
ವೈವಿಧ್ಯಮಯ ತಂತ್ರಜ್ಞಾನಗಳು: ಜಗತ್ತಿನ ಉತ್ತಮ ತಂತ್ರಜ್ಞಾನಗಳನ್ನು ಆಯ್ದುಕೊಳ್ಳುವ ಅವಕಾಶ.
ಅಪಾರದರ್ಶಕತೆ ನಿವಾರಣೆ: ದೊಡ್ಡ ಏಕೀಕೃತ ಟೆಂಡರ್ʼಗಳಿಗಿಂತ ಸಣ್ಣ ಟೆಂಡರ್ಗಳು ಹೆಚ್ಚು ಪಾರದರ್ಶಕವಾಗಿರುತ್ತವೆ ಎಂಬ ನಂಬಿಕೆ.
ಆದರೆ, ಈ ಆರಂಭಿಕ ಲಾಭಗಳು ವಿಳಂಬದಿಂದಾಗಿ ಉಂಟಾಗುವ ಹೆಚ್ಚುವರಿ ವೆಚ್ಚ ಮತ್ತು ಸಾರ್ವ ಜನಿಕರಿಗೆ ಆಗುವ ಅನಾನುಕೂಲತೆಗಳನ್ನು ಸರಿದೂಗಿಸುವುದಿಲ್ಲ ಎಂಬುದು ಸ್ಪಷ್ಟ.
(ಲೇಖಕಿ ಬಹುರಾಷ್ಟ್ರೀಯ ಕಂಪನಿಯಲ್ಲಿ ಉದ್ಯೋಗಿ)
