Vishweshwar Bhat Column: ಯಿಡ್ಡಿಷ್‌ ಭಾಷೆ ವೈಶಿಷ್ಠ್ಯ

ಸಂಪಾದಕರ ಸದ್ಯಶೋಧನೆ

ನೀವು ಯಿಡ್ಡಿಶ್ ಭಾಷೆ ಬಗ್ಗೆ ಕೇಳಿರಬಹುದು. ನಾನು ಇಸ್ರೇಲಿಗೆ ಹೋದಾಗ ಆ ಭಾಷೆ ಬಗ್ಗೆ ಕೇಳಿದ್ದೆ. ಆ ಭಾಷೆಗೆ ಹೀಬ್ರೂ ಅಕ್ಷರಗಳನ್ನೇ ಬಳಸುತ್ತಾರೆ. ಯಿಡ್ಡಿಶ್ ಭಾಷೆಯ ವೈಶಿಷ್ಟ್ಯವೇನೆಂದರೆ ಅದರ ಬಹುತೇಕ ಪದಗಳಿಗೆ ಒಂದಕ್ಕಿಂತ ಹೆಚ್ಚು ಅರ್ಥಗಳಿವೆ. ಆಯಾ ಸನ್ನಿವೇಶ ಮತ್ತು ಸಂದರ್ಭಕ್ಕೆ ತಕ್ಕಂತೆ ಪದಗಳ ಅರ್ಥ ಬದಲಾಗುತ್ತಾ ಹೋಗುತ್ತದೆ. ಇದಕ್ಕೆ ಸಂಬಂಧಿಸಿದಂತೆ ಒಂದು ಜೋಕನ್ನು ನಾನು ಆ ದೇಶದಲ್ಲಿದ್ದಾಗ ಕೇಳಿದ್ದೆ. ಒಮ್ಮೆ ಇಬ್ಬರು ಸೇಲ್ಸ್‌ ಮೆನ್‌ಗಳು ತಮ್ಮ ತಮ್ಮ ಮಾತಾಡುತ್ತಿದ್ದರು.

ಅವರಬ್ಬ ಬಹಳ ಚಾಲಾಕಿಯಾಗಿದ್ದ. ತನ್ನ ಮಾತು ಮತ್ತು ಹಾಸ್ಯ ಮನೋವೃತ್ತಿಯಿಂದ ಎಲ್ಲರ ಮನಸ್ಸನ್ನು ಸೆಳೆಯುತ್ತಿದ್ದ. ಎಲ್ಲರೂ ಆತನ ಸ್ನೇಹ-ಸಾಮೀಪ್ಯವನ್ನು ಬಯಸುತ್ತಿದ್ದರು. ಆತ ಇದ್ದಲ್ಲಿ ನಗುವಿನ ಹೊನಲು. ಇದನ್ನು ನೋಡಿ ಮತ್ತೊಬ್ಬನಿಗೆ ತನ್ನ ಬಗ್ಗೆಯೇ ಕೀಳರಿಮೆ ಮೂಡ ಲಾರಂಭಿಸಿತು.

ಎಲ್ಲರೂ ಅವನನ್ನು ಇಷ್ಟಪಡುತ್ತಾರೆ, ತನ್ನ ಕಡೆ ಮೂಸಿಯೂ ನೋಡುವುದಿಲ್ಲ ಎಂದು ಅನಿಸಿತು. ಇದನ್ನು ಆತನ ಮುಂದೆಯೇ ತೋಡಿಕೊಂಡ. ಅದಕ್ಕೆ ಆತ ತನ್ನ ಸ್ನೇಹಿತನನ್ನು ಸಮಾಧಾನ ಪಡಿಸಲು ಯತ್ನಿಸಿದ. ‘ನೋಡು, ಅದು ನನ್ನ ಮನೋಭಾವ. ನಾನು ಎಲ್ಲರನ್ನೂ ನಗಿಸುತ್ತೇನೆ, ಅದು ನಿನಗೆ ಸಾಧ್ಯವಾಗದಿರಬಹುದು.

ಇದನ್ನೂ ಓದಿ: Vishweshwar Bhat Column: ಒಂದೇ ವರ್ಷದಲ್ಲಿ ನಮ್ಮ ಬದುಕನ್ನು ಬದಲಿಸಿಕೊಳ್ಳಬಹುದೇ ? ಅದು ಹೇಗೆ ?

ಅಷ್ಟಕ್ಕೆ ಬೇಸರವಾಗಬಾರದು. ನಿನ್ನಲ್ಲೂ ಏನಾದರೂ ವಿಶೇಷ ಗುಣವಿರಲೇಬೇಕು. ಆ ಮೂಲಕ ನೀನೂ ಎಲ್ಲರ ಗಮನ ಸೆಳೆಯಬಹುದು’ ಎಂದು ಪ್ರೇರಣೆಯ ಮಾತುಗಳನ್ನು ಹೇಳಿದ. ಆದರೆ ಎರಡನೇ ಸೇಲ್ಸ್‌ ಮನ್‌ಗೆ ಏನೂ ಅನಿಸಲಿಲ್ಲ. ‘ಇಲ್ಲ, ನನ್ನಲ್ಲಿ ಅಂಥ ಯಾವ ಗುಣವೂ ಇಲ್ಲ. ನಾನು ಬೋರಿಂಗ್ ಪರ್ಸನಾಲಿಟಿ. ನೀನೇ ಹೇಳು, ನಾನು ಏನು ಮಾಡಬೇಕೆಂದು. ನಾನೂ ನಿನ್ನ ಹಾಗೆ ಎಲ್ಲರ ಗಮನ ಸೆಳೆಯಬೇಕು’ ಎಂದು ವಿನಂತಿಸಿಕೊಂಡ.

ಮೊದಲ ಸೇಲ್ಸ್‌ ಮನ್ ಯೋಚನೆಗೆ ಬಿದ್ದ. ತನ್ನ ಸ್ನೇಹಿತನಿಗೆ ಹೇಗಾದರೂ ಸಹಾಯ ಮಾಡಬೇಕು ಎಂದು ನಿರ್ಧರಿಸಿದ. ‘ನೋಡು, ನಿನ್ನೆ ಪತ್ರಿಕೆಯಲ್ಲಿ ಓದಿದ್ದೆ. ನಗರದ ಸರ್ಕಸ್ ಕಂಪನಿಯನ್ನು ಮುಚ್ಚುತ್ತಿದ್ದಾರಂತೆ. ಆ ಕಂಪನಿಯಲ್ಲಿ ಒಂದು ಒಂಟೆ ಇದೆಯಂತೆ. ಅದನ್ನು ನೀನೇಕೆ ರೀದಿಸಬಾರದು?’ ಎಂದು ಕೇಳಿದ. ಎರಡನೇಯ ಸೇಲ್ಸ್‌ ಮನ್, ‘ಒಂಟೆ ಖರೀದಿಸಿ ನಾನೇನು ಮಾಡಲಿ?’ ಎಂದು ಕೇಳಿದ.

ಅದಕ್ಕೆ ಮೊದಲನೆಯವ, ‘ನೀನು ಒಂಟೆಯ ಮೇಲೆ ಹೋಗುವಾಗ ಎಲ್ಲರೂ ನಿನ್ನನ್ನು ನೋಡು ತ್ತಾರೆ. ನೀನು ಎಲ್ಲರ ಗಮನಸೆಳೆಯಬಹುದು’ ಎಂದ. ಆತನಿಗೆ ಐಡಿಯಾ ಹಿಡಿಸಿತು. ಸರಿ ಎರಡನೆಯವ ಹೋಗಿ ಒಂಟೆಯನ್ನು ಖರೀದಿಸಿದ. ಮರುದಿನವೇ ಒಂಟೆಯನ್ನೇರಿ ನಗರದಲ್ಲಿ ತಿರುಗಾಡಲಾರಂಭಿಸಿದ. ಜನರೆ ಅವನನ್ನೇ ನೋಡಲಾರಂಭಿಸಿದರು.

ಅವನ ಬಿಸಿನೆಸ್ ಸಹ ಹೆಚ್ಚಿತು. ಅವನ ಆನಂದಕ್ಕೆ ಪಾರವೇ ಇಲ್ಲದಂತಾಯಿತು. ಈ ಮಧ್ಯೆ ಒಂದು ದಿನ ಅವನ ಒಂಟೆ ಏಕಾಏಕಿ ನಾಪತ್ತೆಯಾಯಿತು. ಆತ ಕಂಗಾಲಾದ. ‘ಒಂಟೆ ಕಾಣೆಯಾಗಿದೆ’ ಎಂದು ಸ್ಥಳೀಯ ಪತ್ರಿಕೆಯಲ್ಲಿ ಜಾಹೀರಾತು ನೀಡಲು ನಿರ್ಧರಿಸಿದ. ‘ಅದು ಗಂಡು ಒಂಟೆಯೋ, ಹೆಣ್ಣು ಒಂಟೆಯೋ?’ ಎಂದು ಜಾಹೀರಾತು ವಿಭಾಗದವ ಕೇಳಿದ.

‘ಅದು ಗಂಡೋ, ಹೆಣ್ಣೋ ನನಗೆ ಹೇಗೆ ಗೊತ್ತಾಗಬೇಕು?’ ಎಂದು ತಲೆ ಕೆರೆದುಕೊಂಡ. ಒಂದು ಕ್ಷಣದ ನಂತರ, ‘ಅದು ಹೆಣ್ಣು ಒಂಟೆ’ ಎಂದು ಹೇಳಿದ. ಅದಕ್ಕೆ ಜಾಹೀರಾತು ವಿಭಾಗದವ, ‘ಹೇಗೆ ಹೇಳುತ್ತೀರಿ ಅದು ಹೆಣ್ಣು ಒಂಟೆ ಅಂತ?’ ಎಂದು ಕೇಳಿದ. ಅದಕ್ಕೆ ಒಂಟೆ ಸವಾರ ಸೇಲ್ಸ್‌ ಮನ್ ಹೇಳಿದ - ‘ಪ್ರತಿ ಸಲ ನಾನು ಬೀದಿಯಲ್ಲಿ ಹೋಗುವಾಗ, ಒಂಟೆ ಮೇಲಿರುವ schmuck ನನ್ನು ನೋಡಿ ಎಂದು ಜನ ಕಿರುಚುತ್ತಿದ್ದರು. ಅದನ್ನು ನೋಡಿ ಒಂಟೆಗೂ ಸಂತಸವಾಗುತ್ತಿತ್ತು. ಹೀಗಾಗಿ ಅದು ಹೆಣ್ಣು ಒಂಟೆಯೇ ಆಗಿರಬೇಕು.’ ಅಷ್ಟಕ್ಕೂ ಯಿಡ್ಡಿಶ್ ಭಾಷೆಯಲ್ಲಿ schmuck ಅಂದ್ರೆ ಮೂರ್ಖ ಮತ್ತು ಶಿಶ್ನ ಎಂದರ್ಥ.