ಪಿಎಫ್ ಬಡ್ಡಿ ಮೊತ್ತ ಖಾತೆಗೆ ಜಮೆಯಾಗಿದೆಯೇ? ಪರಿಶೀಲಿಸುವುದು ಎಲ್ಲಿ, ಹೇಗೆ?

ಬೆಂಗಳೂರು: ದೇಶಾದ್ಯಂತ ಇರುವ ಸುಮಾರು 34 ಕೋಟಿ ಜನರ ಭವಿಷ್ಯ ನಿಧಿ ಖಾತೆಗೆ ಬಡ್ಡಿ ಮೊತ್ತವನ್ನು ಜುಲೈ 15ರೊಳಗೆ ಜಮೆ ಮಾಡಲಾಗುವುದು. ಹೀಗಾಗಿ ಆ ಬಳಿಕ ಭವಿಷ್ಯ ನಿಧಿ ಖಾತೆ ಹೊಂದಿರುವ ಉದ್ಯೋಗಿಗಳು ಬಡ್ಡಿ ಮೊತ್ತ ತಮ್ಮ ಖಾತೆಗೆ ಜಮೆ ಆಗಿದೆಯೇ ಇಲ್ಲವೇ ಎಂಬುದನ್ನು ಪರಿಶೀಲಿಸಬಹುದು ಎಂದು ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವ ಡಾ. ಮನ್ಸುಖ್ ಮಾಂಡವಿಯಾ ತಿಳಿಸಿದ್ದಾರೆ. ಈ ಕುರಿತು 'ವಿಶ್ವವಾಣಿ ಮನಿ' (Vishwavani money) ಯುಟ್ಯೂಬ್‌ ಚಾನೆಲ್‌ನಲ್ಲಿ ಮಾಹಿತಿ ನೀಡಿದ ಕೇಶವ್ ಪ್ರಸಾದ್ ಅವರು ಈ ಬಾರಿ ಒಟ್ಟು 1.44 ಕೋಟಿ ರೂಪಾಯಿಗೂ ಅಧಿಕ ಪಿಎಫ್ ಬಡ್ಡಿ ಮೊತ್ತವು 34 ಕೋಟಿ ಜನರ ಖಾತೆಗೆ ಜಮೆಯಾಗಲಿದೆ. ೨೦೨೬ರ ಹೊಸ ನಿಯಮದ ಅನ್ವಯ ಒಟ್ಟು ಪಿಎಫ್ ನಿಧಿಯ ಶೇ. 75ರಷ್ಟನ್ನು ಉದ್ಯೋಗಿಗಳು ನೇರವಾಗಿ ಯುಪಿಐ ಮೂಲಕ ಪಡೆಯಬಹುದಾಗಿದೆ. ದೇಶಾದ್ಯಂತ ಇರುವ 9 ಕೋಟಿ ಪಿಎಫ್ ಖಾತೆಗಳು ಮಾತ್ರ ಚಾಲ್ತಿಯಲ್ಲಿದೆ. ಉಳಿದ ಸದಸ್ಯರು ಯುಎಎನ್ ಆಧಾರಿತ ಖಾತೆಗಳಿಗೆ ಜೋಡಿಸುವಂತೆ ಸೂಚಿಸಿದೆ. ಅಲ್ಲದೇ ಜುಲೈ 15ರ ಬಳಿಕ ಪಿಎಫ್ ನ ಅಧಿಕೃತ ವೆಬ್ ಸೈಟ್ ಅಥವಾ ಉಮಂಗ್ ಆಪ್ ಮೂಲಕವೂ ಪಿಎಫ್ ಖಾತೆಗೆ ಜಮೆ ಆಗಿರುವ ಬಡ್ಡಿ ಮೊತ್ತವನ್ನು ಪರಿಶೀಲಿಸಬಹುದಾಗಿದೆ ಎಂದು ಅವರು ಹೇಳಿದರು.