ಅಮೆರಿಕ-ಇರಾನ್ ಸಂಘರ್ಷ ಮತ್ತೆ ಆರಂಭವಾಗುತ್ತಿದ್ಧಂತೆ ಗಗನಕ್ಕೇರಿದ ತೈಲ ದರ: ಜುಲೈ ನಂತರ ಮೊದಲ ಬಾರಿಗೆ 100 ಡಾಲರ್ ಗಡಿ ದಾಟಿದ ಬೆಲೆ

ಟೆಹರಾನ್, ಸೆ. 9: ಮಧ್ಯ ಪ್ರಾಚ್ಯದಲ್ಲಿ ತೈಲ ಮೂಲಸೌಕರ್ಯ ಮತ್ತು ಹಡಗುಗಳ ಸಂಚಾರದ ಮೇಲೆ ನಡೆದ ಇತ್ತೀಚಿನ ದಾಳಿಗಳಿಂದಾಗಿ (Middle east crisis) ಜಾಗತಿಕ ತೈಲ ಪೂರೈಕೆಗೆ ಮತ್ತಷ್ಟು ಅಡಚಣೆಯಾಗುವ ಭೀತಿ ಎದುರಾಗಿದೆ. ಇದರ ಪರಿಣಾಮವಾಗಿ ಕಚ್ಚಾ ತೈಲದ ಬೆಲೆಯು ಸತತ ಆರು ವಾರಗಳಲ್ಲೇ ಮೊದಲ ಬಾರಿಗೆ ಪ್ರತಿ ಬ್ಯಾರೆಲ್‌ಗೆ 100 ಡಾಲರ್‌ಗಿಂತಲೂ (Crude Oil Crosses $100) ಅಧಿಕಕ್ಕೆ ಏರಿಕೆಯಾಗಿದೆ.

ಜಾಗತಿಕ ತೈಲದ ಮಾನದಂಡವಾಗಿರುವ ಬ್ರೆಂಟ್ ಕಚ್ಚಾ ತೈಲದ ಬೆಲೆಯು ಬುಧವಾರ (ಸೆಪ್ಟೆಂಬರ್‌ 9) ಮುಂಜಾನೆ ಶೇಕಡಾ 2.3ರಷ್ಟು ಏರಿಕೆಯಾಗಿದ್ದು, ಜುಲೈ ನಂತರ ಮೊದಲ ಬಾರಿಗೆ ಅತ್ಯಲ್ಪ ಅವಧಿಗೆ ಪ್ರತಿ ಬ್ಯಾರೆಲ್‌ಗೆ 100 ಡಾಲರ್ ತಲುಪಿ, ನಂತರ ಸ್ವಲ್ಪ ಮಟ್ಟಿಗೆ ಕುಸಿತ ಕಂಡಿದೆ. ಇದೇ ವೇಳೆ ಅಮೆರಿಕ ಕಚ್ಚಾ ತೈಲದ ಬೆಲೆಯು ಶೇಕಡಾ 1.3ರಷ್ಟು ಏರಿಕೆಯಾಗಿ ಪ್ರತಿ ಬ್ಯಾರೆಲ್‌ಗೆ 94 ಡಾಲರ್‌ಗೆ ತಲುಪಿದೆ.

ತನ್ನ ಯುದ್ಧನೌಕೆಯೊಂದರ ಮೇಲೆ ನಡೆದ ಕ್ಷಿಪಣಿ ದಾಳಿಯ ಯತ್ನಕ್ಕೆ ಪ್ರತಿಯಾಗಿ ತಾನು ಇರಾನ್‌ನ ಐದು ತೈಲ ಟ್ಯಾಂಕರ್‌ಗಳ ಮೇಲೆ ದಾಳಿ ನಡೆಸಿರುವುದಾಗಿ ಅಮೆರಿಕದ ಮಿಲಿಟರಿ ಘೋಷಿಸಿದ ಬೆನ್ನಲ್ಲೇ ಈ ಬೆಲೆ ಏರಿಕೆ ಕಂಡುಬಂದಿದೆ. ಇದರೊಂದಿಗೆ, ಇರಾನ್ ಬೆಂಬಲಿತ ಹೌತಿ ಬಂಡುಕೋರರು ನಡೆಸಿದ ಪ್ರತ್ಯೇಕ ದಾಳಿಗಳು ಸೌದಿ ಅರೇಬಿಯಾದ ತೈಲ ಘಟಕಗಳಲ್ಲಿ ಭಾರಿ ಬೆಂಕಿ ಅವಘಡಕ್ಕೆ ಕಾರಣವಾಗಿದ್ದು, ಇದು ಮಧ್ಯ ಪ್ರಾಚ್ಯದ ತೈಲ ಉತ್ಪಾದನೆ ಮತ್ತು ಸಾಗಣೆ ಮಾರ್ಗಗಳ ಒಟ್ಟಾರೆ ಭದ್ರತೆಯ ಮೇಲಿನ ಆತಂಕವನ್ನು ಇನ್ನಷ್ಟು ಹೆಚ್ಚಿಸಿದೆ.

ಇರಾನ್‌ ವಿರುದ್ಧ ಸೋಷಿಯಲ್‌ ಮೀಡಿಯಾ ಮೂಲಕವೂ ಅಮೆರಿಕ ದಾಳಿ: ಇರಾನ್ ನಕ್ಷೆಯಲ್ಲಿ ಡೊನಾಲ್ಡ್ ಟ್ರಂಪ್ ಮುಖ ಬಳಕೆ

ಬ್ರೆಂಟ್ ಕಚ್ಚಾ ತೈಲ ಬೆಲೆಯು ಈ ವರ್ಷ ಮೊದಲ ಬಾರಿಗೆ ಮಾರ್ಚ್ 12ರಂದು ಪ್ರತಿ ಬ್ಯಾರೆಲ್‌ಗೆ 100 ಡಾಲರ್‌ಗಿಂತಲೂ ಅಧಿಕ ಮಟ್ಟದಲ್ಲಿ ಸ್ಥಿರಗೊಂಡಿತ್ತು. ಇದು 2022ರಲ್ಲಿ ರಷ್ಯಾವು ಉಕ್ರೇನ್ ಮೇಲೆ ಆಕ್ರಮಣ ಮಾಡಿದ ಸಮಯದ ನಂತರ ದಾಖಲಾದ ಅತ್ಯಂತ ಗರಿಷ್ಠ ಮಟ್ಟವಾಗಿತ್ತು. ಏಪ್ರಿಲ್ ಮತ್ತು ಮೇಯಲ್ಲಿ ಭಾರಿ ಪ್ರಮಾಣದಲ್ಲಿ ತೈಲ ಬೆಲೆ ಏರಿಕೆಯಾದ ನಂತರ, ಅಮೆರಿಕ ಮತ್ತು ಇರಾನ್ ಹೊರ್ಮುಜ್ ಜಲಸಂಧಿಯನ್ನು ಮರು-ತೆರೆಯಲು ಒಪ್ಪಂದಕ್ಕೆ ಬಂದಿವೆ ಎಂದು ಘೋಷಿಸಲಾಗಿತ್ತು. ಇದರ ಬೆನ್ನಲ್ಲೇ ಜೂನ್‌ನಲ್ಲಿ ಬ್ರೆಂಟ್ ಕಚ್ಚಾ ತೈಲದ ಬೆಲೆಯು ತೀವ್ರವಾಗಿ ಕುಸಿದು, ಪ್ರತಿ ಬ್ಯಾರೆಲ್‌ಗೆ 72 ಡಾಲರ್‌ನಷ್ಟು ಕನಿಷ್ಠ ಮಟ್ಟಕ್ಕೆ ತಲುಪಿತ್ತು. ಆದರೆ ಸಂಘರ್ಷ ಮುಂದುವರಿದಂತೆ ಬ್ರೆಂಟ್ ಬೆಲೆ ಮತ್ತೆ ಏರಿಕೆ ಕಂಡಿತು. ಜುಲೈಯನಲ್ಲಿ ಮತ್ತೆ ಬ್ಯಾರೆಲ್‌ಗೆ 100 ಡಾಲರ್ ದಾಟಿತು.

ಜಾಗತಿಕ ತೈಲ ಮಾರುಕಟ್ಟೆಗೆ ಅತ್ಯಂತ ಸೂಕ್ಷ್ಮವಾಗಿರುವ ಇಂತಹ ಸಂದರ್ಭದಲ್ಲೇ ಈ ಹೊಸ ಬೆಳವಣಿಗೆ ಸಂಭವಿಸಿದೆ. ತೈಲ ಉತ್ಪಾದನೆ, ಸಂಗ್ರಹಣಾ ಘಟಕಗಳು ಅಥವಾ ಟ್ಯಾಂಕರ್ ಹಡಗುಗಳ ಸಂಚಾರಕ್ಕೆ ದೀರ್ಘಕಾಲದವರೆಗೆ ಯಾವುದೇ ಅಡಚಣೆಯುಂಟಾದರೂ, ಅದು ತೈಲ ಪೂರೈಕೆಯನ್ನು ತಗ್ಗಿಸಬಹುದು ಮತ್ತು ಬೆಲೆಗಳನ್ನು ಮತ್ತಷ್ಟು ಗಗನಕ್ಕೇರಿಸಬಹುದು. ಅದರಲ್ಲೂ ವಿಶೇಷವಾಗಿ, ಈ ಸಂಘರ್ಷವು ಪ್ರಮುಖ ಹಡಗು ಸಾಗಣೆ ಮಾರ್ಗಗಳು ಅಥವಾ ಪ್ರಮುಖ ತೈಲ ಉತ್ಪಾದನಾ ಮೂಲಸೌಕರ್ಯಗಳ ಮೇಲೆ ಪರಿಣಾಮ ಬೀರಲು ಪ್ರಾರಂಭಿಸಿದರೆ ಪರಿಸ್ಥಿತಿ ಇನ್ನಷ್ಟು ಉಲ್ಬಣಗೊಳ್ಳಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.