MLA Bhimanna Nayak: ಅತಿಕ್ರಮಣ ಜಾಗದ ಆಸ್ತಿ ತೆರಿಗೆ ವಿವಾದ-ಕೇಂದ್ರದ ಸುತ್ತೋಲೆ ಬಹಿರಂಗಪಡಿಸುವಂತೆ ಬಿಜೆಪಿ ಆಗ್ರಹ

​ಶಿರಸಿ: ಗ್ರಾಮೀಣ ಅತಿಕ್ರಮಣ ಜಾಗದಲ್ಲಿರುವ ಆಸ್ತಿಗಳನ್ನು ತೆರಿಗೆ ಪಟ್ಟಿಯಿಂದ ಕೈಬಿಡಲು ಕೇಂದ್ರ ಸರಕಾರದ ಯಾವ ಆದೇಶವಿದೆ ಎಂಬುದನ್ನು ಶಾಸಕ ಭೀಮಣ್ಣ ನಾಯಕ್(MLA Bhimanna Naik) ಅವರು ಬಹಿರಂಗ ಪಡಿಸಬೇಕು ಎಂದು ಬಿಜೆಪಿ ಜಿಲ್ಲಾ ವಕ್ತಾರರಾದ ಸದಾನಂದ ಭಟ್ ನಿಡಗೋಡ ಒತ್ತಾಯಿಸಿದ್ದಾರೆ.

​ರಾಜ್ಯ ಕಾಂಗ್ರೆಸ್ ಸರಕಾರವು ಪಂಚಾಯತ್ ರಾಜ್ ಅಧಿನಿಯಮಕ್ಕೆ ತಿದ್ದುಪಡಿ ತಂದು, ಅತಿಕ್ರಮಣ ಜಾಗದ ಆಸ್ತಿಗಳನ್ನು ತೆರಿಗೆ ಪಟ್ಟಿಯಿಂದ ಕೈಬಿಡಲು ಆದೇಶಿಸಿದೆ. ಈ ಜನವಿರೋಧಿ ಆದೇಶವನ್ನು ಸಮರ್ಥಿಸಿಕೊಳ್ಳಲಾಗದೆ ಶಾಸಕರು ಕೇಂದ್ರ ಸರಕಾರದ ಮೇಲೆ ಗೂಬೆ ಕೂರಿಸುತ್ತಿದ್ದಾರೆ ಎಂದು ಅವರು ತೀವ್ರವಾಗಿ ಟೀಕಿಸಿದ್ದಾರೆ.

ಇದನ್ನೂ ಓದಿ: MLA Bhimanna Naik: ನಾನು ಯಾವುದೇ ಸಂದರ್ಭದಲ್ಲೂ ಸ್ಥಾನಕ್ಕಾಗಿ ಹಠ ಹಿಡಿದವನಲ್ಲ: ಶಾಸಕ ಭೀಮಣ್ಣ ನಾಯ್ಕ್

​ಪ್ರಮುಖ ಮುಖ್ಯಾಂಶಗಳು:

​ಕೇಂದ್ರದ ಸುತ್ತೋಲೆ ಬಹಿರಂಗಪಡಿಸಿ: ರಾಜ್ಯ ಸರ್ಕಾರದ ಆದೇಶಕ್ಕೆ ಕೇಂದ್ರ ಸರ್ಕಾರದ ನಿರ್ದೇಶನವೇ ಕಾರಣ ಎಂದಿರುವುದು ಸತ್ಯವಾಗಿದ್ದರೆ, ಶಾಸಕರು ಆ ಕೇಂದ್ರದ ಸುತ್ತೋಲೆಯನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಲಿ.

​ಕಾನೂನು ಅಧ್ಯಯನಕ್ಕೆ ಸಲಹೆ: ಶಾಸಕರು ಈ ಕುರಿತಾದ ರಾಜ್ಯ ಸರ್ಕಾರದ ಕಾನೂನು ತಿದ್ದುಪಡಿ ಹಾಗೂ ಆದೇಶವನ್ನು ಸರಿಯಾಗಿ ಓದಿ, ನುರಿತ ಕಾನೂನು ತಜ್ಞರೊಂದಿಗೆ ಚರ್ಚಿಸಿ ಅರ್ಥೈಸಿಕೊಳ್ಳಲಿ ಎಂದು ವಕ್ತಾರರು ವ್ಯಂಗ್ಯವಾಡಿದ್ದಾರೆ.

​ಸಂಸದರ ಹೋರಾಟಕ್ಕೆ ಬೆಂಬಲ: ಅತಿಕ್ರಮಣದಾರರನ್ನು ತೆರಿಗೆ ಪಟ್ಟಿಯಿಂದ ಕೈಬಿಡುವುದನ್ನು ವಿರೋಧಿಸಿ ಸಂಸದ ವಿಶ್ವೇಶ್ವರ ಹೆಗಡೆ ಕಾಗೇರಿ ಅವರು ಜನಜಾಗೃತಿ ಮೂಡಿಸುತ್ತಿರುವುದನ್ನು ಸಹಿಸದೆ ಶಾಸಕರು ಕೇಂದ್ರದ ಕಡೆ ಬೊಟ್ಟು ಮಾಡುತ್ತಿದ್ದಾರೆ.

​ಪಟ್ಟಾ ಕೊಡಿಸಲು ಒತ್ತಡ: ಸಂಸದರಿಗೆ ಬಡವರ ನೋವು ಗೊತ್ತಿಲ್ಲ ಎಂದು ಆರೋಪಿಸುವ ಶಾಸಕರು, ರಾಜ್ಯ ಸರ್ಕಾರದ ಮೇಲೆ ಒತ್ತಡ ತಂದು ಸಮಾಜ ಕಲ್ಯಾಣ ಇಲಾಖೆ ಮೂಲಕ ಕಾನೂನುಬದ್ಧವಾಗಿ ಅತಿಕ್ರಮಣದಾರರಿಗೆ ಪಟ್ಟಾ ಕೊಡಿಸಲಿ ಮತ್ತು ತಾವು ಇದಕ್ಕೆ ಎಷ್ಟು ಸ್ಪಂದಿಸಿದ್ದೇವೆ ಎಂಬುದನ್ನು ಸ್ಪಷ್ಟಪಡಿಸಲಿ.

​ಗ್ಯಾರೆಂಟಿ ಘೋಷಣೆಗೆ ಸವಾಲು: ಒಂದು ವೇಳೆ ಅತಿಕ್ರಮಣದಾರರಿಗೆ ತೆರಿಗೆ ವಿನಾಯತಿ ನೀಡಲಾ ಗಿದೆ ಎಂದಾದರೆ, ನಿಮ್ಮ ಗ್ಯಾರೆಂಟಿ ಯೋಜನೆಗಳ ಪಟ್ಟಿಯಲ್ಲಿ ಅತಿಕ್ರಮಣದಾರರಿಗೆ ಮನೆ ತೆರಿಗೆ ವಿನಾಯತಿ ಎಂಬುದನ್ನು ಅಧಿಕೃತವಾಗಿ ಘೋಷಿಸಲಿ ಎಂದು ಸವಾಲು ಹಾಕಿದ್ದಾರೆ.

​ಕಾಂಗ್ರೆಸ್ ಸರ್ಕಾರದ ಜನವಿರೋಧಿ ಆದೇಶವನ್ನು ವಿರೋಧಿಸಿ ಬಿಜೆಪಿ ನಡೆಸುತ್ತಿರುವ ಹೋರಾಟ ದಿಂದ ಸರ್ಕಾರಕ್ಕೆ ಉಂಟಾಗಿರುವ ಆಕ್ರೋಶಕ್ಕೆ ಉತ್ತರಿಸಲಾಗದೆ ಶಾಸಕರು ರಾಜಕೀಯ ಲೇಪಿತ ಹೇಳಿಕೆಗಳನ್ನು ನೀಡುತ್ತಿದ್ದಾರೆ. ಶಾಸಕರು ಕೇವಲ ಆರೋಪಗಳ ಭಾಷಣ ಮಾಡುವುದನ್ನು ಬಿಟ್ಟು, ಈ ಜನವಿರೋಧಿ ಆದೇಶವನ್ನು ಎಷ್ಟು ದಿನಗಳ ಒಳಗೆ ವಾಪಸ್ ಪಡೆಯುತ್ತೀರಿ ಎಂಬುದನ್ನು ಸ್ಪಷ್ಟಪಡಿಸಬೇಕು ಎಂದು ಸದಾನಂದ ಭಟ್ ಒತ್ತಾಯಿಸಿದ್ದಾರೆ. ಬಿಜೆಪಿ ಸಂಸದರ ನೇತೃತ್ವದಲ್ಲಿ ಈ ಆದೇಶ ವಾಪಸ್ಸಾಗುವವರೆಗೆ ಜನಪರ ಹೋರಾಟ ಮುಂದುವರಿಯಲಿದೆ ಎಂದು ಎಚ್ಚರಿಸಿದ್ದಾರೆ.