ಮಹಿಳಾ ಮೀಸಲಾತಿ ಮಸೂದೆಗೆ ಲೋಕಸಭೆಯಲ್ಲಿ ಸೋಲು: ರಾಹುಲ್ ಗಾಂಧಿ ಮನೆಮುಂದೆ ಬಿಜೆಪಿ ನಾಯಕಿಯರಿಂದ ಪ್ರತಿಭಟನೆ

ನವದೆಹಲಿ, ಏ. 18: ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ (NDA) ಸರ್ಕಾರವು ಮಹಿಳಾ ಕೋಟಾ ಮತ್ತು ಇತರ ಎರಡು ಮಸೂದೆಗಳ ತಿದ್ದುಪಡಿ ಮಸೂದೆಯನ್ನು ಮಂಡಿಸಿ ಪಾಸ್‌ ಮಾಡಲು ವಿಫಲವಾದ ಒಂದು ದಿನದ ನಂತರ, ಸಂಸದರಾದ ಹೇಮಾಮಾಲಿನಿ ಮತ್ತು ಬಾನ್ಸುರಿ ಸ್ವರಾಜ್ ಸೇರಿದಂತೆ ಹಲವಾರು ಉನ್ನತ ಬಿಜೆಪಿ ನಾಯಕರು ದೆಹಲಿಯಲ್ಲಿರುವ ಕಾಂಗ್ರೆಸ್ ಮುಖಂಡ ರಾಹುಲ್ ಗಾಂಧಿ (Rahul Gandhi) ಅವರ ಮನೆಯತ್ತ ಬೆಂಬಲಿಗರ ಬೃಹತ್ ಗುಂಪನ್ನು ಕರೆದೊಯ್ದು ಪ್ರತಿಭಟನೆ ನಡೆಸಿದರು.

ಬಿಜೆಪಿಯು ಕಾಂಗ್ರೆಸ್ ಹಾಗೂ ಇತರ ಪ್ರತಿಪಕ್ಷಗಳ ವಿರುದ್ಧ ರಸ್ತೆಗಳಿಂದ ಹಿಡಿದು ಸಾಮಾಜಿಕ ಜಾಲತಾಣಗಳವರೆಗೆ ಎಲ್ಲ ಮಟ್ಟದಲ್ಲೂ ದಾಳಿ ನಡೆಸಿತು. “ಧೋಕೆಬಾಜ್ (ದೇಶದ್ರೋಹಿ)” ಎಂದು ಬರೆದಿರುವ ಪೋಸ್ಟರ್ ಅನ್ನು ಬಿಜೆಪಿ ದೆಹಲಿ ಘಟಕವು ಎಕ್ಸ್‌ನಲ್ಲಿ ಹಂಚಿಕೊಂಡಿದೆ. ಬಿಜೆಪಿ ದೆಹಲಿ ಘಟಕದ ಮುಖ್ಯಸ್ಥ ವೀರೇಂದ್ರ ಸಚ್‌ದೇವ ಪಕ್ಷದ ನಾಯಕಿಯರೊಂದಿಗೆ ಸೇರಿ ರಾಹುಲ್ ಗಾಂಧಿ ಅವರ ನಿವಾಸದತ್ತ ನಡೆದ ಮೆರವಣಿಗೆಯಲ್ಲಿ ಭಾಗವಹಿಸಿದರು.

“ದೇಶದ ಅರ್ಧದಷ್ಟು ಜನಸಂಖ್ಯೆಯಾದ ಮಹಿಳಾ ಶಕ್ತಿಗೆ ಶೇಕಡಾ 33ರಷ್ಟು ಮೀಸಲಾತಿ ನೀಡುವ ಮಸೂದೆ ವಿರೋಧಿಸಿದ ಈ ದುಷ್ಕರ್ಮಿಗಳನ್ನು ದೇಶದ ಜನರು ಎಂದಿಗೂ ಕ್ಷಮಿಸುವುದಿಲ್ಲ” ಎಂದು ದೆಹಲಿ ಬಿಜೆಪಿ ಎಕ್ಸ್‌ನಲ್ಲಿ ಬರೆದುಕೊಂಡಿದೆ.

ಇಲ್ಲಿದೆ ಪೋಸ್ಟ್:

ಪ್ರತಿಭಟನೆಯಲ್ಲಿ ಭಾಗವಹಿಸಿದ ಇತರ ಬಿಜೆಪಿ ನಾಯಕರಲ್ಲಿ ಸಂಸದರಾದ ಕಮಲ್‌ಜೀತ್ ಸೆಹ್ರಾವತ್ ಮತ್ತು ಮಂಜು ಶರ್ಮಾ, ಕೌನ್ಸಿಲರ್ ಯೋಗಿತಾ ಸಿಂಗ್ ಮತ್ತು ಪಕ್ಷದ ಉಪಾಧ್ಯಕ್ಷೆ ಲತಾ ಗುಪ್ತಾ ಸೇರಿದ್ದಾರೆ.

ನಾರಿ ಶಕ್ತಿಯನ್ನು ಅಗೌರವಿಸಿದ ವಿಪಕ್ಷಗಳ ಮೇಲೆ ದಾಳಿ ಮಾಡುವ ಘೋಷಣೆಗಳನ್ನು ಹೊಂದಿರುವ ಫಲಕಗಳನ್ನು ಅವರು ಹಿಡಿದಿದ್ದರು. ದೆಹಲಿ ಮುಖ್ಯಮಂತ್ರಿ ರೇಖಾ ಗುಪ್ತಾ ಪ್ರತಿಭಟನಾಕಾರರೊಂದಿಗೆ ಸೇರಿ ಘೋಷಣೆಗಳನ್ನು ಕೂಗಿದರು. ನಾವು ಭಾರತದ ಮಹಿಳೆಯರು; ಮಹಿಳೆಯರಿಗೆ ಈ ಅವಮಾನವನ್ನು ಭಾರತ ಸಹಿಸುವುದಿಲ್ಲ ಎಂದು ಗುಪ್ತಾ ಹೇಳಿದ್ದಾರೆ.

ಈಗಿರುವ ಲೋಕಸಭಾ ಸ್ಥಾನಗಳಲ್ಲೇ ಮಹಿಳಾ ಮೀಸಲಾತಿ ಜಾರಿ ಅಸಾಧ್ಯವೇಕೆ?

“ತಮಿಳುನಾಡು ತನ್ನ ರಾಜಕೀಯ ಶಕ್ತಿಯನ್ನು ಹೆಚ್ಚಿಸಿಕೊಳ್ಳುವ ಅವಕಾಶವನ್ನು ಮತ್ತು ಇನ್ನೂ 20 ಸಂಸದ ಸ್ಥಾನಗಳ ಹಕ್ಕಿನ ಪಾಲನ್ನು ಕಳೆದುಕೊಂಡಿದೆ” ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಎಕ್ಸ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ನಿರ್ಮಲಾ ಸೀತಾರಾಮನ್‌ ಅವರ ಎಕ್ಸ್‌ ಪೋಸ್ಟ್‌:

ಕಾಂಗ್ರೆಸ್, ರಾಹುಲ್ ಗಾಂಧಿ ಮತ್ತು ಎಂ.ಕೆ. ಸ್ಟಾಲಿನ್ ನೇತೃತ್ವದ ವಿಪಕ್ಷಗಳ ದ್ವೇಷ ತುಂಬಿದ ವಿರೋಧವು ತಮಿಳುನಾಡು ಸಂಸತ್ತು ಮತ್ತು ವಿಧಾನಸಭೆಯಲ್ಲಿ ಮಹಿಳಾ ಪ್ರಾತಿನಿಧ್ಯದ ಅವಕಾಶವನ್ನು ಕಳೆದುಕೊಳ್ಳುವಂತೆ ಮಾಡಿದೆ ಎಂದು ನಿರ್ಮಲಾ ಸೀತಾರಾಮನ್ ಹೇಳಿದರು.

“ಕುರುಡು ದ್ವೇಷವು ರಾಜ್ಯದ ಒಟ್ಟಾರೆ ಮತ್ತು ವಿಶೇಷವಾಗಿ ಮಹಿಳೆಯರ ಭವಿಷ್ಯದ ಮೇಲೆ ಹಾನಿ ಮಾಡಿದೆ. ದೂರದೃಷ್ಟಿಯಿಲ್ಲದ, ಹಠಮಾರಿ ಮತ್ತು ಮಹಿಳಾ ವಿರೋಧಿ ಡಿಎಂಕೆಯಿಂದಾಗಿ, ತಮಿಳುನಾಡು ಲಾಭ ಪಡೆಯುವ ಬದಲು ಹೆಚ್ಚಿನದನ್ನು ಕಳೆದುಕೊಳ್ಳಬಹುದು. ಪ್ರಧಾನಿ ನರೇಂದ್ರ ಮೋದಿ ಭರವಸೆ ನೀಡಿದಂತೆ ನೀವು ಗೆಲುವಿನ ಪ್ರತಿಪಾದನೆಯ ಭಾಗವಾಗಲು ನಿರಾಕರಿಸಿದ್ದೀರಿ” ಎಂದು ನಿರ್ಮಲಾ ಸೀತಾರಾಮನ್ ಎಕ್ಸ್‌ನಲ್ಲಿ ಪೋಸ್ಟ್‌ನಲ್ಲಿ ಹೇಳಿದ್ದಾರೆ.

ಸಂವಿಧಾನ (131ನೇ ತಿದ್ದುಪಡಿ) ಮಸೂದೆ, 2026, ಲೋಕಸಭೆಯ ಬಲವನ್ನು ಹೆಚ್ಚಿಸುವುದರ ಜತೆಗೆ ಸಂಸತ್ತು ಮತ್ತು ವಿಧಾನಸಭೆಗಳಲ್ಲಿ ಮಹಿಳೆಯರಿಗೆ ಶೇಕಡಾ 33ರಷ್ಟು ಮೀಸಲಾತಿಯನ್ನು ಪ್ರಸ್ತಾಪಿಸಿತ್ತು. ವ್ಯಾಪಕ ಚರ್ಚೆಯ ಹೊರತಾಗಿಯೂ ಕೆಳಮನೆಯಲ್ಲಿ ಅಗತ್ಯವಿರುವ ಮೂರನೇ ಎರಡರಷ್ಟು ಬಹುಮತವನ್ನು ಪಡೆಯುವಲ್ಲಿ ವಿಫಲವಾಯಿತು.