ಆನೆ ಉಳಿದರೆ ಕಾಡು ಉಳಿಯುತ್ತದೆ: ಸಂರಕ್ಷಣೆಯ ಸಂದೇಶ ಸಾರುವ ವಿಶ್ವ ಆನೆ ದಿನ

ಬೆಂಗಳೂರು, ಆಗಸ್ಟ್ 12: ಆನೆ ಎಂದರೆ ಶಕ್ತಿ, ಗಾಂಭೀರ್ಯ ಮತ್ತು ಸೌಂದರ್ಯದ ಪ್ರತೀಕ. ಬೃಹತ್ ದೇಹ, ಉದ್ದನೆಯ ಸೊಂಡಿಲು, ದೊಡ್ಡ (World Elephant Day) ಕಿವಿಗಳು ಹಾಗೂ ವಿಶಿಷ್ಟ ನಡಿಗೆಯಿಂದ ಆನೆ ವನ್ಯಜಗತ್ತಿನಲ್ಲಿ ತನ್ನದೇ ಆದ ಸ್ಥಾನವನ್ನು ಹೊಂದಿದೆ. ಮನುಷ್ಯರಿಗೆ ಕೆಲವೊಮ್ಮೆ ಭಯ ಹುಟ್ಟಿಸಿದರೂ, ಆನೆಗಳ ಬಗ್ಗೆ ಅಪಾರ ಪ್ರೀತಿ ಮತ್ತು ಗೌರವವೂ ಇದೆ. ಭಾರತದಲ್ಲಿ ಆನೆಗಳನ್ನು ಧಾರ್ಮಿಕ ಹಾಗೂ ಸಾಂಸ್ಕೃತಿಕವಾಗಿ ವಿಶೇಷ ಸ್ಥಾನಮಾನದಿಂದ ಕಾಣಲಾಗುತ್ತದೆ.

ಆನೆಗಳ ಸಂರಕ್ಷಣೆ, ಅವುಗಳ ಆವಾಸಸ್ಥಳಗಳ ರಕ್ಷಣೆ ಹಾಗೂ ಬೇಟೆಯಂತಹ ಅಪಾಯಗಳ ಕುರಿತು ಜಾಗೃತಿ ಮೂಡಿಸುವ ಉದ್ದೇಶದಿಂದ ಪ್ರತಿವರ್ಷ ಆಗಸ್ಟ್ 12ರಂದು ವಿಶ್ವ ಆನೆ ದಿನವನ್ನು ಆಚರಿಸಲಾಗುತ್ತದೆ. 2012ರ ಆಗಸ್ಟ್ 12ರಂದು ಮೊದಲ ಬಾರಿಗೆ ವಿಶ್ವ ಆನೆ ದಿನವನ್ನು ಆಚರಿಸಲಾಯಿತು.

ವಿಶ್ವ ಆನೆ ದಿನದ ಹಿನ್ನೆಲೆ

ಏಷ್ಯನ್ ಮತ್ತು ಆಫ್ರಿಕನ್ ಆನೆಗಳು ಎದುರಿಸುತ್ತಿರುವ ವಿವಿಧ ಅಪಾಯಗಳನ್ನು ಜಗತ್ತಿನ ಗಮನಕ್ಕೆ ತರುವ ಉದ್ದೇಶದಿಂದ ವಿಶ್ವ ಆನೆ ದಿನ ಆರಂಭವಾಯಿತು. ಆನೆಗಳ ಸಂಖ್ಯೆ ಇಳಿಕೆಯಾಗುತ್ತಿರುವುದು, ಅಕ್ರಮ ಬೇಟೆ, ದಂತಕ್ಕಾಗಿ ನಡೆಯುವ ಹತ್ಯೆ ಹಾಗೂ ಮಾನವ–ಆನೆ ಸಂಘರ್ಷದಂತಹ ಸಮಸ್ಯೆಗಳ ಬಗ್ಗೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವುದು ಈ ದಿನದ ಪ್ರಮುಖ ಉದ್ದೇಶವಾಗಿದೆ.

ಕೆನಡಾದ ಚಿತ್ರ ನಿರ್ದೇಶಕಿ ಪ್ಯಾಟ್ರೀಷಿಯಾ ಸಿಮ್ಸ್, ಮೈಕೆಲ್ ಕ್ಲಾರ್ಕ್ ಹಾಗೂ ಥೈಲ್ಯಾಂಡ್‌ನ ಆನೆ ಸಂರಕ್ಷಣಾ ಕಾರ್ಯಕರ್ತೆ ಶಿವಪೋರ್ನ್ ದರ್ದಾರನಂದ ಅವರ ಪ್ರಯತ್ನಗಳು ವಿಶ್ವ ಆನೆ ದಿನ ಆರಂಭಕ್ಕೆ ಪ್ರಮುಖ ಕಾರಣವಾಗಿವೆ. ಮೊದಲ ವಿಶ್ವ ಆನೆ ದಿನದ ಸಂದರ್ಭದಲ್ಲಿ ಹಾಲಿವುಡ್ ನಟ ವಿಲಿಯಂ ಶಟ್ನೇರ್ “Return to the Forest” ಎಂಬ ಸಾಕ್ಷ್ಯಚಿತ್ರವನ್ನು ನಿರ್ಮಿಸಿದ್ದರು. ವಿಶ್ವದ ಹಲವು ವನ್ಯಜೀವಿ ಸಂಸ್ಥೆಗಳು ಮತ್ತು ತಜ್ಞರು ಈ ಅಭಿಯಾನಕ್ಕೆ ಬೆಂಬಲ ನೀಡಿದರು.

ಆನೆಗಳ ಸಂರಕ್ಷಣೆ ಏಕೆ ಅಗತ್ಯ?

ಆನೆಗಳು ಕೇವಲ ಬೃಹತ್ ಪ್ರಾಣಿಗಳಲ್ಲ; ಅವು ಕಾಡಿನ ಪರಿಸರ ವ್ಯವಸ್ಥೆಯ ಪ್ರಮುಖ ಭಾಗ. ಅವುಗಳ ಸಹಜ ಬದುಕಿಗೆ ಅಗತ್ಯವಾದ ಅರಣ್ಯ ಪ್ರದೇಶಗಳನ್ನು ಸಂರಕ್ಷಿಸುವುದು ಅತ್ಯಂತ ಮುಖ್ಯ. ದಂತಕ್ಕಾಗಿ ನಡೆಯುವ ಅಕ್ರಮ ಬೇಟೆಯನ್ನು ತಡೆಯುವುದು, ಕಾಡು ಪ್ರದೇಶಗಳಲ್ಲಿ ಮಾನವ ಹಸ್ತಕ್ಷೇಪವನ್ನು ಕಡಿಮೆ ಮಾಡುವುದು ಮತ್ತು ಮಾನವ–ಆನೆ ಸಂಘರ್ಷವನ್ನು ನಿಯಂತ್ರಿಸುವುದು ಅಗತ್ಯವಾಗಿದೆ.

ಹುಟ್ಟಿದ ಎರಡೇ ದಿನಕ್ಕೆ ಫುಟ್‌ಬಾಲ್ ‘ಟ್ರೈನಿಂಗ್’ ; ಫಿಫಾ ವಿಶ್ವಕಪ್‌ಗೆ ಆನೆ ಮರಿ ಫುಲ್‌ ರೆಡಿ, ವಿಡಿಯೋ ನೋಡಿ

ಆನೆಗಳು ಅತ್ಯಂತ ಸಾಮಾಜಿಕ ಜೀವಿಗಳು. ಅವು ಕುಟುಂಬ ವ್ಯವಸ್ಥೆಯಲ್ಲಿ ಬದುಕುತ್ತವೆ. ಸಾಮಾನ್ಯವಾಗಿ ಹೆಣ್ಣಾನೆಗಳು ಮತ್ತು ಮರಿಗಳು ಗುಂಪುಗಳಾಗಿ ಸಂಚರಿಸುತ್ತವೆ. ಇಂತಹ ಗುಂಪುಗಳಲ್ಲಿ ಪರಸ್ಪರ ಸಹಕಾರ, ರಕ್ಷಣೆ ಮತ್ತು ಬಾಂಧವ್ಯವನ್ನು ಕಾಣಬಹುದು.

ಆನೆಗಳ ಕುತೂಹಲಕಾರಿ ಸಂಗತಿಗಳು

ವಿಶ್ವದಲ್ಲಿ ಪ್ರಮುಖವಾಗಿ ಆಫ್ರಿಕನ್ ಆನೆ ಮತ್ತು ಏಷ್ಯನ್ ಆನೆ ಎಂಬ ಎರಡು ಪ್ರಭೇದಗಳಿವೆ. ಭೂಮಿಯ ಮೇಲಿನ ಅತಿ ದೊಡ್ಡ ನೆಲವಾಸಿ ಪ್ರಾಣಿಯಾಗಿರುವ ಆನೆಗಳ ಗರ್ಭಾವಧಿ ಸುಮಾರು 22 ತಿಂಗಳು, ಇದು ನೆಲವಾಸಿ ಪ್ರಾಣಿಗಳಲ್ಲೇ ಅತ್ಯಂತ ದೀರ್ಘವಾದ ಗರ್ಭಾವಧಿಗಳಲ್ಲಿ ಒಂದಾಗಿದೆ.

ಆನೆ ಮರಿ ಜನಿಸಿದಾಗ ಸಾಮಾನ್ಯವಾಗಿ ಸುಮಾರು 100–120 ಕೆ.ಜಿ. ತೂಕ ಹೊಂದಿರುತ್ತದೆ. ಆನೆಗಳು ದೀರ್ಘಾಯುಷಿಗಳಾಗಿದ್ದು, ಉತ್ತಮ ಪರಿಸ್ಥಿತಿಯಲ್ಲಿ ಸುಮಾರು 60–70 ವರ್ಷಗಳವರೆಗೆ ಬದುಕಬಲ್ಲವು.

ಆನೆಗಳ ಉಳಿವಿಗಾಗಿ ಒಗ್ಗಟ್ಟಾಗೋಣ

ದಂತಕ್ಕಾಗಿ ನಡೆಯುವ ಬೇಟೆ, ಅರಣ್ಯ ನಾಶ ಮತ್ತು ಮಾನವ ಚಟುವಟಿಕೆಗಳಿಂದ ಆನೆಗಳ ಬದುಕು ಹಲವು ಸವಾಲುಗಳನ್ನು ಎದುರಿಸುತ್ತಿದೆ. ಭಾರತದಲ್ಲಿ ಆನೆಗಳ ಸಂರಕ್ಷಣೆಗೆ ಪ್ರಾಜೆಕ್ಟ್ ಎಲಿಫೆಂಟ್ ಸೇರಿದಂತೆ ಹಲವು ಕ್ರಮಗಳನ್ನು ಕೈಗೊಳ್ಳಲಾಗಿದೆ.

ವಿಶ್ವ ಆನೆ ದಿನವು ಕೇವಲ ಆನೆಗಳನ್ನು ನೆನಪಿಸಿಕೊಳ್ಳುವ ದಿನವಲ್ಲ. ಅವುಗಳ ಆವಾಸಸ್ಥಳಗಳನ್ನು ಉಳಿಸುವ, ಅಕ್ರಮ ಬೇಟೆಯನ್ನು ತಡೆಯುವ ಮತ್ತು ಮುಂದಿನ ಪೀಳಿಗೆಗೂ ಗಜರಾಜನ ಅಸ್ತಿತ್ವವನ್ನು ಖಚಿತಪಡಿಸುವ ನಮ್ಮ ಜವಾಬ್ದಾರಿಯನ್ನು ನೆನಪಿಸುವ ದಿನವಾಗಿದೆ.

“ಆನೆಗಳನ್ನು ಉಳಿಸಿ – ಕಾಡುಗಳನ್ನು ಉಳಿಸಿ – ಭವಿಷ್ಯವನ್ನು ಸಂರಕ್ಷಿಸಿ.”