ಪಿಓಕೆ–ಆಕ್ಸಾಯ್ ಚೀನಾ ನಕ್ಷೆ ವಿವಾದ; ಪೋಸ್ಟ್‌ ಡಿಲಿಟ್‌ ಮಾಡಿದ್ಯಾಕೆ ಅಮೆರಿಕ?

ವಾಷಿಂಗ್ಟನ್‌: ಭಾರತ (India)ದ ಅವಿಭಾಜ್ಯ ಅಂಗಗಳಾದ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (Pakistan-occupied Kashmir) ಮತ್ತು ಅಕ್ಸಾಯ್ ಚಿನ್ (Aksai Chin) ಪ್ರದೇಶಗಳನ್ನು ಭಾರತದ ಭೂಪಟದೊಳಗೆ ತೋರಿಸಿದ್ದ ತನ್ನ ಹಳೆಯ ಪೋಸ್ಟ್ ಅನ್ನು ಅಮೆರಿಕದ ವ್ಯಾಪಾರ ಪ್ರತಿನಿಧಿ ಕಚೇರಿ (USTR) ಈಗ ತನ್ನ 'X' (ಟ್ವಿಟರ್) ಖಾತೆಯಿಂದ ಅಳಿಸಿಹಾಕಿದೆ.

ಜಮ್ಮು ಮತ್ತು ಕಾಶ್ಮೀರ ಮತ್ತು ಲಡಾಖ್‌ನ ಸಂಪೂರ್ಣ ಭಾಗವನ್ನು ಭಾರತದ ಭೂಪಟದಲ್ಲಿ ತೋರಿಸಲಾಗಿತ್ತು. ಈ ಪ್ರದೇಶಗಳ ಕೆಲವು ಭಾಗಗಳಲ್ಲಿ ಪಾಕಿಸ್ತಾನ (Pakistan) ಮತ್ತು ಚೀನಾ (China) ಅಕ್ರಮವಾಗಿ ಹಕ್ಕು ಸಾಧಿಸುತ್ತಿವೆ. ಫೆಬ್ರವರಿ 7 ರಂದು ಅಮೆರಿಕ ಹಂಚಿಕೊಂಡಿದ್ದ ಈ ಭೂಪಟವು ಎಲ್ಲರ ಗಮನ ಸೆಳೆದಿತ್ತು. ಯಾಕೆಂದರೆ, ಈ ಹಿಂದೆ ಅಮೆರಿಕವು ಪೋಕ್ ಮತ್ತು ಅಕ್ಸಾಯ್ ಚಿನ್ ಪ್ರದೇಶಗಳನ್ನು ವಿವಾದಿತ ಪ್ರದೇಶಗಳೆಂದು ಹೇಳುತ್ತಲೇ ಬಂದಿತ್ತು. ಆದರೆ, ಅದಕ್ಕೆ ವ್ಯತಿರಿಕ್ತವಾಗಿ ಈ ಬಾರಿ ಅಮೆರಿಕ ಇಡೀ ಪ್ರದೇಶವನ್ನು ಭಾರತದ್ದೇ ಎಂದು ತೋರಿಸುವ ಪೋಸ್ಟ್ ಮಾಡಿತ್ತು.

ಹಿನ್ನೆಲೆ

ಭಾರತ ಮತ್ತು ಅಮೆರಿಕ ನಡುವಿನ ದ್ವಿಪಕ್ಷೀಯ ಮಧ್ಯಂತರ ವ್ಯಾಪಾರ ಒಪ್ಪಂದದ ಘೋಷಣೆಯ ಅಂಗವಾಗಿ ಈ ಗ್ರಾಫಿಕ್ ಪೋಸ್ಟ್ ಅನ್ನು ಹಂಚಿಕೊಳ್ಳಲಾಗಿತ್ತು. ಅಮೆರಿಕದ ರಫ್ತುಗಳ ಮೇಲೆ ಭಾರತವು ಸುಂಕ ಕಡಿತಗೊಳಿಸಿರುವುದನ್ನು ಇದು ತೋರಿಸುತ್ತಿತ್ತು.

ಪಾಕಿಸ್ತಾನ ಮತ್ತು ಚೀನಾದೊಂದಿಗೆ ಅಮೆರಿಕದ ಸಂಬಂಧ ಅಷ್ಟು ಸುಗಮವಾಗಿಲ್ಲದ ಕಾರಣ, ಭಾರತಕ್ಕೆ ಬೆಂಬಲ ನೀಡುವ ಉದ್ದೇಶದಿಂದಲೇ ವಾಷಿಂಗ್ಟನ್ ಈ ರೀತಿ ಮಾಡಿರಬಹುದು ಎಂದು ಹಲವು ವಿಶ್ಲೇಷಕರು ಭಾವಿಸಿದ್ದರು. ಇದು ಕೇವಲ ತಾಂತ್ರಿಕ ತಪ್ಪಿರಬಹುದು ಎಂದೂ ಕೆಲವರು ಶಂಕಿಸಿದ್ದರು. ಆದರೆ ಈಗ ಈ ಪೋಸ್ಟ್ ಅನ್ನು ತೆಗೆದುಹಾಕಿರುವುದು ದ್ವಿಮುಖ ಚರ್ಚೆಗೆ ತೆರೆ ಎಳೆದಿದಂತಾಗಿದೆ.

Border Security: ಭಾರತ-ಪಾಕಿಸ್ತಾನ ಗಡಿಯ ಬೇಲಿಯ ಮೇಲೆ ಖಾಲಿ ಗಾಜಿನ ಬಾಟಲಿ ಅಳವಡಿಕೆ; ಏನಿದರ ಹಿಂದಿನ ರಹಸ್ಯ!

ಅಮೆರಿಕದ ನಿಲುವು ಮತ್ತು ಭಾರತದ ಸ್ಪಷ್ಟನೆ

ಹಳೆಯ ಚಾಳಿ: ಈ ಹಿಂದೆ ಅಮೆರಿಕದ ಅಧಿಕಾರಿಗಳು ಹಂಚಿಕೊಳ್ಳುತ್ತಿದ್ದ ಭಾರತದ ಭೂಪಟಗಳಲ್ಲಿ ಪಿಒಕೆ ಮತ್ತು ಅಕ್ಸಾಯ್ ಚಿನ್ ಪ್ರದೇಶಗಳನ್ನು ವಿಭಜನಾ ರೇಖೆಗಳ ಮೂಲಕ ವಿವಾದಿತ ಪ್ರದೇಶಗಳೆಂದು ತೋರಿಸಲಾಗುತ್ತಿತ್ತು. ಆದರೆ ಇದೀಗ ಅಳಿಸಲಾದ ನಕ್ಷೆಯಲ್ಲಿ ಇಂತಹ ಗುರುತುಗಳಿರಲಿಲ್ಲ, ಬದಲಿಗೆ ಸಂಪೂರ್ಣ ಪ್ರದೇಶವನ್ನು ಭಾರತದ ಅವಿಭಾಜ್ಯ ಅಂಗವಾಗಿ ಚಿತ್ರಿಸಲಾಗಿತ್ತು.

ಭಾರತದ ನಿಲುವು:

ಜಮ್ಮು-ಕಾಶ್ಮೀರ ಮತ್ತು ಲಡಾಖ್ ಕೇಂದ್ರಾಡಳಿತ ಪ್ರದೇಶಗಳು "ಭಾರತದ ಅವಿಭಾಜ್ಯ ಮತ್ತು ಬೇರ್ಪಡಿಸಲಾಗದ ಅಂಗವಾಗಿದೆ ಮತ್ತು ಎಂದಿಗೂ ಹಾಗೆಯೇ ಇರುತ್ತದೆ" ಎಂದು ಭಾರತವು ನಿರಂತರವಾಗಿ ಪ್ರತಿಪಾದಿಸುತ್ತಾ ಬಂದಿದೆ. ಅಕ್ಸಾಯ್ ಚಿನ್ ಕೂಡ ಭಾರತದ ಭೂಪ್ರದೇಶದ ಅವಿಭಾಜ್ಯ ಅಂಗವಾಗಿದೆ ಎಂದು ನವದೆಹಲಿ ಸ್ಪಷ್ಟಪಡಿಸಿದೆ