ಐಸಿಸಿ ಏಕದಿನ ಶ್ರೇಯಾಂಕ; ಇಂಗ್ಲೆಂಡ್ ಹಿಂದಿಕ್ಕಿ ಸಾರ್ವಕಾಲಿಕ ಶ್ರೇಷ್ಠ ಸ್ಥಾನ ಪಡೆದ ಅಫ್ಘಾನಿಸ್ತಾನ

ದುಬೈ, ಅ.25: ನೂತನ ಐಸಿಸಿ ಪುರುಷರ ಏಕದಿನ (ODI) ತಂಡದ ಶ್ರೇಯಾಂಕದಲ್ಲಿ ಅಫ್ಘಾನಿಸ್ತಾನವು ಇಂಗ್ಲೆಂಡ್ ತಂಡವನ್ನು ಹಿಂದಿಕ್ಕಿದೆ. ತ್ರಿಕೋನ ಸರಣಿಯ ಫೈನಲ್‌ನಲ್ಲಿ ಜಿಂಬಾಬ್ವೆಯನ್ನು ಸೋಲಿಸಿದ ನಂತರ, ಅಫ್ಘಾನಿಸ್ತಾನ ತಂಡವು ಏಳನೇ ಸ್ಥಾನಕ್ಕೇರಿದೆ. ಇದು ಅಫ್ಘಾನಿಸ್ತಾನದ ಸಾರ್ವಕಾಲಿಕ ಅತ್ಯುನ್ನತ ಶ್ರೇಯಾಂಕವಾಗಿದೆ.

ಅಫ್ಘಾನಿಸ್ತಾನವು 94 ಅಂಕಗಳೊಂದಿಗೆ 7ನೇ ಸ್ಥಾನವನ್ನು ಪಡೆದುಕೊಂಡರೆ, ವಿಶ್ವಕಪ್ ಚಾಂಪಿಯನ್ ಇಂಗ್ಲೆಂಡ್ 93 ಅಂಕಗಳೊಂದಿಗೆ 8ನೇ ಸ್ಥಾನಕ್ಕೆ ಕುಸಿಯಿತು. ಅಫ್ಘಾನಿಸ್ತಾನದ ಈ ಮಹತ್ವದ ಸಾಧನೆಯ ಬೆನ್ನಲ್ಲೇ, ಶುಕ್ರವಾರ ಅಕ್ಟೋಬರ್ 23ರಂದು ಶಾರ್ಜಾದಲ್ಲಿ ನಡೆದ ತ್ರಿಕೋನ ಸರಣಿಯ ಫೈನಲ್ ಪಂದ್ಯದಲ್ಲಿ, ಅವರು ಜಿಂಬಾಬ್ವೆ ವಿರುದ್ಧ ಏಳು ವಿಕೆಟ್‌ಗಳ ಜಯ ಸಾಧಿಸಿ ಸರಣಿ ಪ್ರಶಸ್ತಿಯನ್ನು ತಮ್ಮದಾಗಿಸಿಕೊಂಡರು.

ಜೈಸ್ವಾಲ್, ರಾಹುಲ್ ಮತ್ತೆ ಬ್ಯಾಟಿಂಗ್ ವೈಫಲ್ಯ; ಭಾರತ ತಂಡಕ್ಕೆ ಪಡಿಕ್ಕಲ್ ಆಸರೆ

ಇದೇ ವೇಳೆ, 430 ರನ್‌ಗಳ ಬೃಹತ್ ಗುರಿಯನ್ನು ರಕ್ಷಿಸಿಕೊಳ್ಳುವಲ್ಲಿ ವಿಫಲರಾಗಿ ಶ್ರೀಲಂಕಾ ವಿರುದ್ಧ ಸೋಲನುಭವಿಸಿದ ಇಂಗ್ಲೆಂಡ್ ತಂಡಕ್ಕೆ, ಐಸಿಸಿ ಏಕದಿನ (ODI) ಶ್ರೇಯಾಂಕದಲ್ಲಿನ ಇಳಿಕೆಯೂ ಹಿನ್ನಡೆಯಾಗಿ ಪರಿಣಮಿಸಿದೆ. ಭಾರತೀಯ ಪುರುಷರ ತಂಡವು 115 ಅಂಕಗಳೊಂದಿಗೆ ಐಸಿಸಿ ಏಕದಿನ ಶ್ರೇಯಾಂಕದಲ್ಲಿ ಅಗ್ರಸ್ಥಾನವನ್ನು ಕಾಯ್ದುಕೊಂಡಿದೆ. ನಂತರದ ಸ್ಥಾನಗಳಲ್ಲಿ ನ್ಯೂಜಿಲೆಂಡ್ (109 ಅಂಕಗಳು), ದಕ್ಷಿಣ ಆಫ್ರಿಕಾ (104 ಅಂಕಗಳು), ಪಾಕಿಸ್ತಾನ (103 ಅಂಕಗಳು) ಮತ್ತು ಆಸ್ಟ್ರೇಲಿಯಾ (102 ಅಂಕಗಳು) ಇವೆ.

ಐಸಿಸಿ ಪುರುಷರ ಏಕದಿನ ಶ್ರೇಯಾಂಕ 2026: ಅಗ್ರ 10 ದೇಶಗಳು

1 ಭಾರತ

2 ನ್ಯೂಜಿಲೆಂಡ್

3 ದಕ್ಷಿಣ ಆಫ್ರಿಕಾ

4 ಪಾಕಿಸ್ತಾನ

5 ಆಸ್ಟ್ರೇಲಿಯಾ

6 ಶ್ರೀಲಂಕಾ

7 ಅಫ್ಘಾನಿಸ್ತಾನ

8 ಇಂಗ್ಲೆಂಡ್

9 ಬಾಂಗ್ಲಾದೇಶ

10 ವೆಸ್ಟ್ ಇಂಡೀಸ್

4ನೇ ಸ್ಥಾನ ಉಳಿಸಿಕೊಂಡ ಅಯ್ಯರ್‌

ಭಾರತ ಟಿ20 ತಂಡದ ನಾಯಕ ಶ್ರೇಯಸ್ ಅಯ್ಯರ್ ಐಸಿಸಿ ಟಿ20 ಅಂತರರಾಷ್ಟ್ರೀಯ (T20I) ಬ್ಯಾಟಿಂಗ್ ಶ್ರೇಯಾಂಕದಲ್ಲಿ ತಮ್ಮ ನಾಲ್ಕನೇ ಸ್ಥಾನವನ್ನು ಉಳಿಸಿಕೊಂಡಿದ್ದಾರೆ. ಪ್ರಸ್ತುತ ಅಗ್ರ ನಾಲ್ಕು ಬ್ಯಾಟರ್‌ಗಳಲ್ಲಿ ಮೂವರು ಭಾರತವನ್ನು ಪ್ರತಿನಿಧಿಸುತ್ತಿದ್ದಾರೆ. ಇಶಾನ್ ಕಿಶನ್ ಮೊದಲ ಸ್ಥಾನದಲ್ಲಿ ಮತ್ತು ಎರಡನೇ ಸ್ಥಾನದಲ್ಲಿ ಅಭಿಷೇಕ್ ಶರ್ಮಾ ಇದ್ದಾರೆ.

ಹಾಗೆಯೇ ಶ್ರೀಲಂಕಾದ ಕುಸಾಲ್ ಮೆಂಡಿಸ್ ಮೂರು ಸ್ಥಾನಗಳ ಏರಿಕೆಯೊಂದಿಗೆ 23ನೇ ಸ್ಥಾನಕ್ಕೆ ತಲುಪಿದ್ದಾರೆ. ಭಾರತದ ಸಂಜು ಸ್ಯಾಮ್ಸನ್ ನಾಲ್ಕು ಸ್ಥಾನ ಮೇಲಕ್ಕೇರಿ, ಜಂಟಿ 27ನೇ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ಪಾಕಿಸ್ತಾನದ ಮಾಜ್ ಸದಾಕತ್ ಗಮನಾರ್ಹ ಪ್ರಗತಿ ಸಾಧಿಸಿದ್ದು, ಶ್ರೀಲಂಕಾ ವಿರುದ್ಧದ ಮೂರು ಪಂದ್ಯಗಳ ಸರಣಿಯ ನಂತರ, ಅಗ್ರ 100ರ ಹೊರಗಿನಿಂದ ನೇರವಾಗಿ 45ನೇ ಸ್ಥಾನಕ್ಕೆ ನೆಗೆತ ಕಂಡಿದ್ದಾರೆ.