IND vs ENG: ಭಾರತದ ನಾಲ್ಕನೇ ಕ್ರಮಾಂಕದಲ್ಲಿ ಆಡಲಿರುವ ಬ್ಯಾಟ್ಸ್ಮನ್ ಆರಿಸಿದ ರಿಷಭ್ ಪಂತ್!
ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಶುಭಮನ್ ಗಿಲ್ ನಾಲ್ಕನೇ ಕ್ರಮಾಂಕದಲ್ಲಿ ಆಡಲಿದ್ದಾರೆ ಎಂದು ಭಾರತ ತಂಡದ ಉಪ ನಾಯಕ ರಿಷಭ್ ಪಂತ್ ಹೇಳಿದ್ದಾರೆ. ಪಂತ್ ಸ್ವತಃ ಐದನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಲಿದ್ದಾರೆ. ಜೂನ್‌ 20 ರಂದು ಲೀಡ್ಸ್‌ನಲ್ಲಿ ಮೊದಲ ಟೆಸ್ಟ್ ಪಂದ್ಯ ಆರಂಭವಾಗಲಿದೆ.
ಭಾರತದ ಬ್ಯಾಟಿಂಗ್ ಕ್ರಮಾಂಕದ ಬಗ್ಗೆ ರಿಷಭ್ ಪಂತ್ ಪ್ರತಿಕ್ರಿಯೆ.
Ramesh Kote
Jun 18, 2025 10:32 PM
ಲೀಡ್ಸ್: ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ (IND vs ENG) ಶುಭಮನ್ ಗಿಲ್ (Shubman Gill) ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡಲಿದ್ದಾರೆ ಮತ್ತು ನಾಯಕನ ನಂತರ ಐದನೇ ಸ್ಥಾನದಲ್ಲಿ ತಾನೇ ಆಡಲಿದ್ದೇನೆ ಎಂದು ಭಾರತ ತಂಡದ ಉಪನಾಯಕ ರಿಷಭ್ ಪಂತ್ (Rishabh Pant) ಬುಧವಾರ ದೃಢಪಡಿಸಿದ್ದಾರೆ. ವಿರಾಟ್ ಕೊಹ್ಲಿ ನಿವೃತ್ತಿಯ ನಂತರ ಭಾರತ ನಾಲ್ಕನೇ ಕ್ರಮಾಂಕದಲ್ಲಿ ನೂತನ ಬ್ಯಾಟ್ಸ್ಮನ್ ಟೀಮ್‌ ಮ್ಯಾನೇಜ್‌ಮೆಂಟ್‌ ಹುಡುಕುತ್ತಿದೆ. ಅದರಂತೆ ಭವಿಷ್ಯವನ್ನು ಗಮನದಲ್ಲಿಟ್ಟುಕೊಂಡು ಗಿಲ್ ಇದೀಗ ಕೊಹ್ಲಿಯ ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟ್‌ ಮಾಡಲಿದ್ದಾರೆ.
"ಮೂರನೇ ಕ್ರಮಾಂಕದಲ್ಲಿ ಯಾರು ಬ್ಯಾಟ್‌ ಮಾಡುತ್ತಾರೆ ಎಂಬುದರ ಕುರಿತು ಇನ್ನೂ ಚರ್ಚೆ ನಡೆಯುತ್ತಿದೆ ಎಂದು ನಾನು ಭಾವಿಸುತ್ತೇನೆ. ಆದರೆ ನಾಲ್ಕು ಮತ್ತು ಐದನೇ ಸ್ಥಾನದಲ್ಲಿ ಯಾರು ಆಡಬೇಕೆಂದು ಖಂಡಿತವಾಗಿಯೂ ನಿರ್ಧರಿಸಲಾಗಿದೆ. ಶುಭಮನ್ ಗಿಲ್ ನಾಲ್ಕನೇ ಸ್ಥಾನದಲ್ಲಿ ಬ್ಯಾಟ್‌ ಮಾಡುತ್ತೇನೆ ಎಂದು ನಾನು ಭಾವಿಸುತ್ತೇನೆ ಮತ್ತು ನಾನು ಐದನೇ ಸ್ಥಾನದಲ್ಲಿ ಆಡುತ್ತೇನೆ ಮತ್ತು ಉಳಿದದ್ದನ್ನು ನಾವು ಚರ್ಚಿಸುತ್ತಲೇ ಇರುತ್ತೇವೆ," ಎಂದು ರಿಷಭ್ ಪಂತ್ ತಿಳಿಸಿದ್ದಾರೆ.
IND vs ENG: ಇಂಗ್ಲೆಂಡ್‌ನಲ್ಲಿ ಶ್ರೇಷ್ಠ ಇನಿಂಗ್ಸ್‌ ಆಡಿದ ಟಾಪ್‌ 5 ಭಾರತೀಯ ಆಟಗಾರರು!
ಶುಭಮನ್ ಗಿಲ್ ಜೊತೆ ಮೈದಾನದ ಒಳಗೆ ಮತ್ತು ಹೊರಗೆ ಉತ್ತಮ ಸಂಬಂಧ ಹೊಂದಿದ್ದಾರೆ ಎಂದು ರಿಷಭ್ ಪಂತ್ ಹೇಳಿದ್ದಾರೆ. "ಶುಭಮನ್ ಮತ್ತು ನಾನು ಮೈದಾನದ ಹೊರಗೆ ಉತ್ತಮ ಸಂಬಂಧವನ್ನು ಹೊಂದಿದ್ದೇವೆ ಎಂದು ನಾನು ಭಾವಿಸುತ್ತೇನೆ. ನೀವು ಮೈದಾನದ ಹೊರಗೆ ಉತ್ತಮ ಸ್ನೇಹಿತರಾಗಿದ್ದರೆ, ಈ ಸಂಬಂಧವು ಅಂತಿಮವಾಗಿ ಮೈದಾನದಲ್ಲಿಯೂ ಉಳಿಯುತ್ತದೆ. ನಾನು ಯಾವಾಗಲೂ ಇದರಲ್ಲಿ ನಂಬಿಕೆ ಇಟ್ಟಿದ್ದೇನೆ,"ಎಂದು ಟೀಮ್‌ ಇಂಡಿಯಾ ವಿಕೆಟ್‌ ಕೀಪರ್‌ ತಿಳಿಸಿದ್ದಾರೆ.
ಆಂಡರ್ಸನ್ ಮತ್ತು ಬ್ರಾಡ್ ಆಡದಿರುವುದು ಸಮಾಧಾನಕರ
ಇಂಗ್ಲೆಂಡ್ ಕೂಡ ನಿವೃತ್ತ ಅನುಭವಿ ವೇಗದ ಬೌಲರ್‌ಗಳಾದ ಜೇಮ್ಸ್ ಆಂಡರ್ಸನ್ ಮತ್ತು ಸ್ಟುವರ್ಟ್ ಬ್ರಾಡ್ ಇಲ್ಲದೆ ಆಡಲಿದೆ. ಇಂಗ್ಲೆಂಡ್ ತಂಡದಲ್ಲಿ ಈ ದಂತಕಥೆಯ ಜೋಡಿಯನ್ನು ನೋಡದಿರುವುದು ಸಮಾಧಾನಕರವಾಗಿದೆ. ಆದರೆ ಪ್ರಸ್ತುತ ಬೌಲಿಂಗ್ ದಾಳಿಯನ್ನು ಕಡಿಮೆ ಅಂದಾಜು ಮಾಡಲು ಅವರು ಸಿದ್ಧರಿಲ್ಲ ಎಂದು ಪಂತ್ ಹೇಳಿದ್ದಾರೆ.
"ಖಂಡಿತವಾಗಿಯೂ ಇಬ್ಬರೂ (ಆಂಡರ್ಸನ್ ಮತ್ತು ಬ್ರಾಡ್) ತಂಡದಲ್ಲಿ ಇಲ್ಲದಿರುವುದು ತುಂಬಾ ಸಂತೋಷವನ್ನು ನೀಡುತ್ತದೆ. ಅವರು ಹಲವು ವರ್ಷಗಳಿಂದ ಇಂಗ್ಲೆಂಡ್ ಪರ ಆಡುತ್ತಿದ್ದಾರೆ ಮತ್ತು ನಾನು ಕೇವಲ ಎರಡು ಪ್ರವಾಸಗಳಿಗೆ (ಇಂಗ್ಲೆಂಡ್ ವಿರುದ್ಧ) ಬಂದಿದ್ದೇನೆ. ಆದರೆ ಅದೇ ಸಮಯದಲ್ಲಿ, ಇಂಗ್ಲೆಂಡ್‌ನ ಬೌಲಿಂಗ್ ದಾಳಿಯು ಸಾಕಷ್ಟು ಸಾಮರ್ಥ್ಯವನ್ನು ಹೊಂದಿದೆ. ನಮ್ಮ ತಂಡವು ಕೂಡ ಯುವಕರಾಗಿರುವುದರಿಂದ ನಾವು ಯಾರನ್ನೂ ಹಗುರವಾಗಿ ಪರಿಗಣಿಸಲು ಬಯಸುವುದಿಲ್ಲ. ಅವರು ಇನ್ನೂ ತಮ್ಮನ್ನು ತಾವು ಅಭಿವೃದ್ಧಿಪಡಿಸಿಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಆದರೆ ಅದೇ ಸಮಯದಲ್ಲಿ ನಾವು ನಮ್ಮ ಕ್ರಿಕೆಟ್ ಆಡಬೇಕು ಮತ್ತು ಅಗತ್ಯವಿರುವಲ್ಲಿ ಬೌಲರ್‌ಗಳು ಮತ್ತು ಎದುರಾಳಿ ತಂಡವನ್ನು ಗೌರವಿಸಬೇಕು," ಎಂದು ಉಪ ನಾಯಕ ತಿಳಿಸಿದ್ದಾರೆ.