ದಕ್ಷಿಣ ಆಫ್ರಿಕಾ ಗುತ್ತಿಗೆ ಪಟ್ಟಿಯಿಂದ ಕೈ ಬಿಟ್ಟಿದ್ದಕ್ಕೆ ನಿವೃತ್ತಿ ಘೋಷಿಸಿದ ರಾಸಿ ವ್ಯಾನ್ ಡೆರ್ ಡುಸೆನ್!
ದಕ್ಷಿಣ ಆಫ್ರಿಕಾ ತಂಡದ ಮಾಜಿ ಬ್ಯಾಟ್ಸ್ಮನ್ ರಾಸಿ ವ್ಯಾನ್ ಡೆರ್ ಡುಸೆನ್ ಅವರು ಅಸಮಾಧಾನದೊಂದಿಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಹೇಳಿದ್ದಾರೆ. ದಕ್ಷಿಣ ಆಫ್ರಿಕಾದ ಕೇಂದ್ರ ಗುತ್ತಿಗೆ ಪಟ್ಟಿಯಲ್ಲಿ ತಮ್ಮ ಹೆಸರನ್ನು ಕೈ ಬಿಟ್ಟ ಹಿನ್ನೆಲೆಯಲ್ಲಿ ಅವರು ಹಠಾತ್ ಈ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಹೇಳಿದ ರಾಸಿ ವ್ಯಾನ್ ಡೆರ್ ಡುಸೆನ್. -
ನವದೆಹಲಿ: ದಕ್ಷಿಣ ಆಫ್ರಿಕಾ ತಂಡದ ಪ್ರಮುಖ ಬ್ಯಾಟ್ಸ್ಮನ್ ರಾಸಿ ವ್ಯಾನ್ ಡೆರ್ ಡುಸೆನ್ (Rassie van der Dussen) ಅವರು ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಹಠಾತ್ ನಿವೃತ್ತಿ ಘೋಷಿಸಿದ್ದಾರೆ. ಇದರಿಂದ ದಕ್ಷಿಣ ಆಫ್ರಿಕಾ ಪರ ಅವರು ನೀಡಿದ ಸ್ಥಿರ ಪ್ರದರ್ಶನದ ಅಧ್ಯಾಯಕ್ಕೆ ತೆರೆ ಬಿದ್ದಿದೆ. ಕ್ರಿಕೆಟ್ ಸೌತ್ ಆಫ್ರಿಕಾ (Cricket South Africa) ಕೇಂದ್ರ ಒಪ್ಪಂದ ಪಟ್ಟಿಯಿಂದ ಅವರನ್ನು ಹೊರಗಿಟ್ಟಿದ್ದ ಹಿನ್ನೆಲೆಯಲ್ಲಿ ಅವರು ಈ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆಂದು ತಿಳಿದುಬಂದಿದೆ.
37ರ ವಯಸ್ಸಿನ ರಾಸಿ ವ್ಯಾನ್ ಡೆರ್ ಡುಸೆನ್ ಅವರು ಕೊನೆಯದಾಗಿ ಲಾಹೋರ್ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ನಡೆದಿದ್ದ ಚಾಂಪಿಯನ್ಸ್ ಟ್ರೋಫಿ ಪಂದ್ಯದಲ್ಲಿ ಆಡಿದ್ದರು. ಆ ಪಂದ್ಯದಲ್ಲಿ 363 ರನ್ ಗುರಿಯನ್ನು ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾ ತಂಡ ಸೋಲು ಕಂಡರೂ, ಅವರು 69 ರನ್ ಗಳಿಸಿ ಹೋರಾಟ ತೋರಿಸಿದ್ದರು. ಸಾಮಾಜಿಕ ಜಾಲತಾಣದ ಮೂಲಕ ತಮ್ಮ ನಿರ್ಧಾರವನ್ನು ಪ್ರಕಟಿಸಿದ ಅವರು, ತಮ್ಮ ಕ್ರಿಕೆಟ್ ಪಯಣವನ್ನು ಸ್ಮರಿಸಿ, ತಮ್ಮನ್ನು ಬೆಂಬಲಿಸಿದ ಎಲ್ಲರಿಗೂ ಕೃತಜ್ಞತೆ ಸಲ್ಲಿಸಿದರು.
Sony Sports Ten 4 Kannada: ಕನ್ನಡ ಚಾನೆಲ್ ಆರಂಭಿಸಿ ಸೋನಿ ಸ್ಪೋರ್ಟ್ಸ್ ನೆಟ್ವರ್ಕ್!
“ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸುವಾಗ ನನಗೆ ಹೆಮ್ಮೆ ಹಾಗೂ ಆಳವಾದ ಕೃತಜ್ಞತೆ ಇದೆ. ರಾಷ್ಟ್ರೀಯ ತಂಡದ ಜೆರ್ಸಿ ಧರಿಸುವುದು ಒಂದು ಸಾಧನೆಯಾಗಿದ್ದು, ಅದು ನಿಮಗೆ ಅತ್ಯಂತ ಅದ್ಭುತ ರೀತಿಯಲ್ಲಿ ಪರೀಕ್ಷಿಸುವ ಮತ್ತು ಪ್ರತಿಫಲ ನೀಡುವ ಸ್ಥಿತಿಸ್ಥಾಪಕತ್ವ ಮತ್ತು ಸಮರ್ಪಣೆಯ ಮಟ್ಟವನ್ನು ಬಯಸುತ್ತದೆ. ನನ್ನ ದೇಶವನ್ನು ಪ್ರತಿನಿಧಿಸುವ ಅವಕಾಶ ನನ್ನ ಜೀವನದ ಅತ್ಯಂತ ದೊಡ್ಡ ಗೌರವವಾಗಿದೆ,” ಎಂದು ಡುಸೆನ್ ಹೇಳಿದ್ದಾರೆ.
“ಈ ಪ್ರಯಾಣವು ಅನೇಕ ವರ್ಷಗಳ ತ್ಯಾಗಗಳಿಂದ ನಿರ್ಮಿತವಾಗಿದೆ, ಆದರೆ ದಕ್ಷಿಣ ಆಫ್ರಿಕಾವನ್ನು ಪ್ರತಿನಿಧಿಸುವ ಅವಕಾಶ ಪ್ರತಿಯೊಂದು ಕ್ಷಣಕ್ಕೂ ಮೌಲ್ಯ ನೀಡಿದೆ,” ಎಂದು ಅವರು ತಿಳಿಸಿದ್ದಾರೆ.
“ನನ್ನ ಪತ್ನಿ ಲಾರಾ ಅವರಿಗೆ—ನೀವು ಪ್ರತಿಯೊಂದು ಹಂತದಲ್ಲೂ ನನ್ನ ಜೊತೆಯಲ್ಲಿದ್ದೀರಿ. ಅಪಾರ ಸಂತೋಷದ ಕ್ಷಣಗಳಲ್ಲೂ ಕಠಿಣ ಸಂದರ್ಭಗಳಲ್ಲೂ ಸಹಾನುಭೂತಿ, ಶಾಂತಿ ಮತ್ತು ಧೈರ್ಯದಿಂದ ನನ್ನನ್ನು ಬೆಂಬಲಿಸಿದ್ದೀರಿ. ನೀವು ನನ್ನ ಅತ್ಯಂತ ದೊಡ್ಡ ಪ್ರೋತ್ಸಾಹಕರಾಗಿದ್ದೀರಿ. ನೀವಿಲ್ಲದೆ ನಾನು ಇದನ್ನು ಸಾಧಿಸಲು ಸಾಧ್ಯವಾಗುತ್ತಿರಲಿಲ್ಲ,” ಎಂದು ಅವರು ಹೇಳಿಕೊಂಡಿದ್ದಾರೆ.
ರಾಸಿ ವ್ಯಾನ್ ಡೆರ್ ಡುಸೆನ್ರ ವೃತ್ತಿ ಜೀವನದ ಅಂಕಿ ಅಂಶಗಳು
ರಾಸಿ ವ್ಯಾನ್ ಡೆರ್ ಡುಸೆನ್ ಅವರು 2018ರಲ್ಲಿ ಜಿಂಬಾಬ್ವೆ ವಿರುದ್ಧ 29ನೇ ವಯಸ್ಸಿನಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪದಾರ್ಪಣೆ ಮಾಡಿ, 2025ರವರೆಗೆ ಮೂರು ಫಾರ್ಮ್ಯಾಟ್ಗಳಲ್ಲೂ ದಕ್ಷಿಣ ಆಫ್ರಿಕಾವನ್ನು ಪ್ರತಿನಿಧಿಸಿದರು. ತಡವಾಗಿ ಆರಂಭಿಸಿದರೂ, ಅವರು ವಿಶೇಷವಾಗಿ ವೈಟ್-ಬಾಲ್ ಕ್ರಿಕೆಟ್ನಲ್ಲಿ ವಿಶ್ವಾಸಾರ್ಹ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ ಎಂಬ ಹೆಗ್ಗಳಿಕೆಯನ್ನು ಗಳಿಸಿದರು.
IPL 2026: ಲಖನೌ ಸೂಪರ್ ಜಯಂಟ್ಸ್ ಎದುರು ಡೆಲ್ಲಿ ಕ್ಯಾಪಿಟಲ್ಸ್ಗೆ ಅಧಿಕಾರಯುತ ಜಯ!
ಟೆಸ್ಟ್ ಕ್ರಿಕೆಟ್ನಲ್ಲಿ ಅವರು 18 ಪಂದ್ಯಗಳಲ್ಲಿ 905 ರನ್ ಗಳಿಸಿದ್ದಾರೆ. ಅವರು ಆರು ಅರ್ಧಶತಕಗಳನ್ನು ದಾಖಲಿಸಿದ ಅವರು ಈ ಫಾರ್ಮ್ಯಾಟ್ನಲ್ಲಿ ಕೆಲವೊಮ್ಮೆ ಸ್ಥಿರತೆಯನ್ನು ತೋರಿದರೂ, ದೀರ್ಘಕಾಕ ತಮ್ಮ ಸ್ಥಾನವನ್ನು ಉಳಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಅವರ ಕೊನೆಯ ಟೆಸ್ಟ್ ಪಂದ್ಯವನ್ನು 2022ರ ಡಿಸೆಂಬರ್ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಆಡಿದ್ದರು.
ಒಡಿಐ ಕ್ರಿಕೆಟ್ನಲ್ಲಿ ಅವರು ಅತ್ಯಂತ ಪರಿಣಾಮಕಾರಿ ಆಟಗಾರರಾಗಿದ್ದರು. 71 ಪಂದ್ಯಗಳಲ್ಲಿ 2657 ರನ್ ಗಳಿಸಿ, 50.13ರ ಸರಾಸರಿಯನ್ನು ಕಾಯ್ದುಕೊಂಡಿದ್ದರು. ಆರು ಶತಕಗಳು ಮತ್ತು 17 ಅರ್ಧಶತಕಗಳನ್ನು ಸಿಡಿಸಿದ್ದಾರೆ. 2019 ಮತ್ತು 2023ರ ಒಡಿಐ ವಿಶ್ವಕಪ್ ಟೂರ್ನಿಯಗಳಲ್ಲಿ ಕೂಡ ಅವರು ತಂಡದ ಭಾಗವಾಗಿದ್ದರು. 2024ರಲ್ಲಿ ಒಂದು ಒಡಿಐ ಪಂದ್ಯದಲ್ಲಿ ನಾಯಕತ್ವವನ್ನೂ ವಹಿಸಿದ್ದರು.
IPL 2026: ಶ್ರೇಯಸ್ ಅಯ್ಯರ್ಗೆ ಗಾಯದ ಬಗ್ಗೆ ಅಪ್ಡೇಟ್ ನೀಡಿದ ಯುಜ್ವೇಂದ್ರ ಚಹಲ್!
ಟಿ20ಐಗಳಲ್ಲಿ 57 ಪಂದ್ಯಗಳಲ್ಲಿ 1406 ರನ್ ಗಳಿಸಿದ ಅವರು, 33.47 ಸರಾಸರಿ ಮತ್ತು 128.75 ಸ್ಟ್ರೈಕ್ ರೇಟ್ ಹೊಂದಿದ್ದರು. 10 ಅರ್ಧಶತಕಗಳನ್ನು ಗಳಿಸಿದ ಅವರು, ಸ್ಥಿರತೆ ಮತ್ತು ನಿಯಂತ್ರಿತ ಆಕ್ರಮಣದ ಸಮತೋಲನದಿಂದ ಈ ಫಾರ್ಮ್ಯಾಟ್ನಲ್ಲಿ ಪ್ರಮುಖ ಆಟಗಾರರಾಗಿದ್ದರು. ಒಟ್ಟಾರೆ ಮೂರು ಫಾರ್ಮ್ಯಾಟ್ಗಳಲ್ಲಿ 4,968 ಅಂತಾರಾಷ್ಟ್ರೀಯ ರನ್ಗಳನ್ನು ಗಳಿಸಿದ್ದಾರೆ.