'ಐಪಿಎಲ್‌ನಿಂದಾಗಿ ಅಂತಾರಾಷ್ಟ್ರೀಯ ವೃತ್ತಿಜೀವನ ನಷ್ಟವಾಯಿತು'; ಕೆವಿನ್ ಪೀಟರ್ಸನ್ ಗಂಭೀರ ಆರೋಪ

ಮುಂಬಯಿ, ಎ.7: ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ನಲ್ಲಿ ಭಾಗವಹಿಸುವ ವಿಚಾರವಾಗಿ ಅಧಿಕಾರಿಗಳೊಂದಿಗಿನ ವಿವಾದದಿಂದ ತಮ್ಮ ಅಂತರರಾಷ್ಟ್ರೀಯ ವೃತ್ತಿಜೀವನ ಅಕಾಲಿಕವಾಗಿ ಅಂತ್ಯಗೊಂಡಿತು ಎಂದು ಇಂಗ್ಲೆಂಡ್‌ನ ಮಾಜಿ ನಾಯಕ ಕೆವಿನ್ ಪೀಟರ್ಸನ್(Kevin Pietersen) ಸ್ಫೋಟಕ ಆರೋಪ ಮಾಡಿದ್ದಾರೆ.

ಯೂಟ್ಯೂಬರ್ ರಣವೀರ್ ಅಲ್ಲಾಬಾಡಿಯಾ ಅವರೊಂದಿಗಿನ ಸಂದರ್ಶನದಲ್ಲಿ ಮಾತನಾಡಿದ ಪೀಟರ್ಸನ್, ಐಪಿಎಲ್‌ನ ಆರಂಭಿಕ ವರ್ಷಗಳಲ್ಲಿ ಇಂಗ್ಲೆಂಡ್ ಮತ್ತು ವೇಲ್ಸ್ ಕ್ರಿಕೆಟ್ ಮಂಡಳಿ (ಇಸಿಬಿ) ಮಾಧ್ಯಮಗಳನ್ನು ಬಳಸಿಕೊಂಡು ತಮ್ಮ ವಿರುದ್ಧ ಟೀಕೆಗಳ ಸುರಿಮಳೆಗೈದಿತು ಎಂದು ಪೀಟರ್ಸನ್ ಆರೋಪಿಸಿದ್ದಾರೆ.

2008 ರಲ್ಲಿ ನಡೆದ ಪಂದ್ಯಾವಳಿಯ ಉದ್ಘಾಟನಾ ಆವೃತ್ತಿಯಲ್ಲಿ ಭಾಗವಹಿಸದಂತೆ ಇಸಿಬಿ ಕೇಂದ್ರೀಯ ಒಪ್ಪಂದದ ಆಟಗಾರರನ್ನು ನಿರ್ಬಂಧಿಸಿತು. ಆ ವರ್ಷ ಆಡಿದ ಏಕೈಕ ಇಂಗ್ಲಿಷ್ ಆಟಗಾರ ಡಿಮಿಟ್ರಿ ಮಸ್ಕರೆನ್ಹಸ್. 2009 ರಲ್ಲಿ, ಇಂಗ್ಲೆಂಡ್ ಆಟಗಾರರು ಸೀಮಿತ ಮೂರು ವಾರಗಳ ಅವಧಿಯಲ್ಲಿ ಭಾಗವಹಿಸಲು ಅವಕಾಶ ಮಾಡಿಕೊಟ್ಟಿತು. ಪೀಟರ್ಸನ್ 2009 ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಈಗ ಬೆಂಗಳೂರು) ಸೇರಿದರು, ಮತ್ತು ಲೀಗ್‌ಗೆ ಆದ್ಯತೆ ನೀಡುವ ಅವರ ನಿರ್ಧಾರವು ಇಸಿಬಿಯೊಂದಿಗೆ ತೀವ್ರ ಉದ್ವಿಗ್ನತೆಗೆ ಕಾರಣವಾಯಿತು ಎಂದು ಹೇಳಲಾಗಿದೆ.

"ನಾನು ದೊಡ್ಡ ತ್ಯಾಗಗಳನ್ನು ಮಾಡಿದ್ದೇನೆ. ನನ್ನ ವೃತ್ತಿಜೀವನವನ್ನು ಕಳೆದುಕೊಂಡೆ. ಅದಕ್ಕಾಗಿಯೇ ಆ ಸಂಸ್ಥೆಯ ಎಲ್ಲರೂ ನನ್ನ ವಿರುದ್ಧ ಹೋರಾಡಿದರು" ಎಂದು ಅವರು ಹೇಳಿದರು.

"ನನ್ನ ಇಂಗ್ಲೆಂಡ್ ವೃತ್ತಿಜೀವನ 104 ಟೆಸ್ಟ್ ಪಂದ್ಯಗಳ ನಂತರ ಕೊನೆಗೊಂಡಾಗ ನನಗೆ 33 ವರ್ಷ. ನಾನು 150-160 ಟೆಸ್ಟ್‌ಗಳನ್ನು ಆಡಬೇಕಿತ್ತು ಮತ್ತು 12,000-13,000 ರನ್‌ಗಳನ್ನು ಗಳಿಸಬೇಕಿತ್ತು. ಅದನ್ನು ನಾನು ಸಾಧಿಸಬೇಕಾಗಿತ್ತು. ಇಸಿಬಿ ನನ್ನ ಮೇಲೆ ದಾಳಿ ಮಾಡಲು ದಿ ಟೆಲಿಗ್ರಾಫ್ ಅನ್ನು ಬಳಸಿತು. ನಾನು ಅದರ ಬಗ್ಗೆ ಹೆಚ್ಚು ಆಳವಾಗಿ ಹೋಗಲು ಬಯಸುವುದಿಲ್ಲ. ನಾನು ಈಗ ತುಂಬಾ ಸಂತೋಷದ, ಶಾಂತಿಯುತ ಜೀವನವನ್ನು ನಡೆಸುತ್ತಿದ್ದೇನೆ" ಎಂದು ಪೀಟರ್ಸನ್ ಹೇಳಿದರು.

ಇಂದಿನ ರಾಜಸ್ಥಾನ್‌ vs ಮುಂಬೈ ಪಂದ್ಯವೂ ಮಳೆಗೆ ರದ್ದಾಗುವ ಸಾಧ್ಯತೆ!

ಪೀಟರ್ಸನ್ ತಮ್ಮ ಟೆಸ್ಟ್ ವೃತ್ತಿಜೀವನವನ್ನು 23 ಶತಕಗಳು ಮತ್ತು 35 ಅರ್ಧಶತಕಗಳು ಸೇರಿದಂತೆ 8,181 ರನ್‌ಗಳೊಂದಿಗೆ ಕೊನೆಗೊಳಿಸಿದರು. ಪೀಟರ್ಸನ್ ಐಪಿಎಲ್‌ನಲ್ಲಿ ಆರ್‌ಸಿಬಿ ಮಾತ್ರವಲ್ಲದೆ ಡೆಲ್ಲಿ ಡೇರ್‌ಡೆವಿಲ್ಸ್ ಮತ್ತು ಸನ್‌ರೈಸರ್ಸ್ ಹೈದರಾಬಾದ್ ಪರ ಆಡಿದರು. ಅವರನ್ನು 2025 ರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್‌ನ ಮಾರ್ಗದರ್ಶಕರನ್ನಾಗಿಯೂ ನೇಮಿಸಲಾಗಿತ್ತು.