ಆಸೀಸ್‌ ವಿರುದ್ಧದ ಏಕದಿನ ಸರಣಿಗೆ ಪಾಕ್‌ ತಂಡ ಪ್ರಕಟ; ಬಾಬರ್‌, ರೌಫ್‌ ಕಮ್‌ಬ್ಯಾಕ್‌

ಲಾಹೋರ್‌, ಮೇ 22: ಮೇ 30 ರಿಂದ ಆರಂಭವಾಗಲಿರುವ ಆಸ್ಟ್ರೇಲಿಯಾ ವಿರುದ್ಧದ ಮೂರು ಪಂದ್ಯಗಳ ಏಕದಿನ (Pakistan vs Australia ODIs) ಸರಣಿಗೆ ಪಾಕಿಸ್ತಾನ ತನ್ನ 16 ಸದಸ್ಯರ ತಂಡವನ್ನು ಪ್ರಕಟಿಸಿದೆ. ಮಾಜಿ ನಾಯಕ ಬಾಬರ್ ಅಜಮ್ ಮತ್ತು ವೇಗಿ ಹ್ಯಾರಿಸ್‌ ರೌಫ್‌ ತಂಡಕ್ಕೆ ಮರಳಿದ್ದಾರೆ. ವಿಕೆಟ್ ಕೀಪರ್-ಬ್ಯಾಟರ್ ಮೊಹಮ್ಮದ್ ರಿಜ್ವಾನ್ ಅವರನ್ನು ತಂಡದಿಂದ ಕೈಬಿಡಲಾಗಿದೆ.

ಬಾಂಗ್ಲಾದೇಶ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಪಾಕಿಸ್ತಾನ 0-2 ಅಂತರದ ಸೋಲಿನ ನಂತರ ತಂಡದ ಘೋಷಣೆ ಹೊರಬಿದ್ದಿದೆ. ಈ ಸರಣಿಯಲ್ಲಿ ಪಾಕಿಸ್ತಾನ ಪರ ಹೋರಾಟ ನಡೆಸಿದ ಕೆಲವೇ ಆಟಗಾರರಲ್ಲಿ ಒಬ್ಬರಾಗಿದ್ದ ರಿಜ್ವಾನ್, 50 ಓವರ್‌ಗಳ ಸ್ವರೂಪದಲ್ಲಿ ಇತ್ತೀಚೆಗೆ ಕಳಪೆ ಪ್ರದರ್ಶನ ನೀಡಿದ್ದಕ್ಕಾಗಿ ಬೆಲೆ ತೆತ್ತಿದ್ದಾರೆ.

ಮಾರ್ಚ್‌ನಲ್ಲಿ ಬಾಂಗ್ಲಾದೇಶ ವಿರುದ್ಧದ ಏಕದಿನ ಸರಣಿಯಲ್ಲಿ, ಅನುಭವಿ ಕೀಪರ್ ಮೂರು ಪಂದ್ಯಗಳಲ್ಲಿ ಕೇವಲ 58 ರನ್‌ಗಳನ್ನು ಗಳಿಸಿದರು. ಕಳೆದ ವರ್ಷವಷ್ಟೇ, ರಿಜ್ವಾನ್ ತಂಡದಲ್ಲಿ ಅತ್ಯಂತ ಫಲಪ್ರದ ಪ್ರದರ್ಶನ ನೀಡುವವರಲ್ಲಿ ಒಬ್ಬರಾಗಿದ್ದರು, 17 ಏಕದಿನ ಪಂದ್ಯಗಳಲ್ಲಿ 43.76 ರ ಪ್ರಭಾವಶಾಲಿ ಸರಾಸರಿಯಲ್ಲಿ 569 ರನ್‌ಗಳನ್ನು ಗಳಿಸಿದರು, ಇದರಲ್ಲಿ ಒಂದು ಶತಕ ಮತ್ತು ನಾಲ್ಕು ಅರ್ಧಶತಕಗಳು ಸೇರಿವೆ. ಹೀಗಿದ್ದರೂ ಆಯ್ಕೆ ಸಮಿತಿ ಇತ್ತೀಚಿನ ಏಕದಿನ ಫಾರ್ಮ್‌ ಆಧಾರದಲ್ಲಿ ತಂಡವನ್ನು ಆಯ್ಕೆ ಮಾಡಿದೆ.

ಫಿಫಾ ವಿಶ್ವಕಪ್​ನಲ್ಲಿ ಆಡಲಿದ್ದಾರೆ ಮೂವರು ಭಾರತೀಯ ಆಟಗಾರರು!

ಎಡಗೈ ವೇಗಿ ಶಾಹೀನ್ ಶಾ ಅಫ್ರಿದಿ ತಂಡದ ನಾಯಕತ್ವವನ್ನು ಉಳಿಸಿಕೊಂಡಿದ್ದಾರೆ. ಬಾಬರ್ ಜೊತೆಗೆ, ಮಾರ್ಚ್‌ನಲ್ಲಿ ಬಾಂಗ್ಲಾದೇಶ ಪ್ರವಾಸವನ್ನು ತಪ್ಪಿಸಿಕೊಂಡಿದ್ದ, ವೇಗಿ ನಸೀಮ್ ಶಾ, ಆಲ್‌ರೌಂಡರ್ ಶಾದಾಬ್ ಖಾನ್ ಮತ್ತು ಸ್ಪಿನ್ನರ್ ಸುಫ್ಯಾನ್ ಮೋಕಿಮ್ ಅವರನ್ನು ಮತ್ತೆ ತಂಡಕ್ಕೆ ಕರೆಸಿಕೊಳ್ಳಲಾಗಿದೆ.

ಪಾಕ್‌ ತಂಡದ ಪೂರ್ವಸಿದ್ಧತಾ ಶಿಬಿರವು ಮೇ 23 ರ ಶನಿವಾರ ಮುಖ್ಯ ಕೋಚ್ ಮೈಕ್ ಹೆಸ್ಸನ್ ನೇತೃತ್ವದಲ್ಲಿ ಆರಂಭವಾಗಲಿದೆ. ಪ್ರವಾಸಿ ಆಸ್ಟ್ರೇಲಿಯಾ ತಂಡವು ಮೇ 23 ರಂದು ಇಸ್ಲಾಮಾಬಾದ್‌ಗೆ ಇಳಿಯಲಿದ್ದು, ರಾವಲ್ಪಿಂಡಿ ಮತ್ತು ಲಾಹೋರ್‌ನಲ್ಲಿ ಪಂದ್ಯಗಳನ್ನಾಡಲಿದೆ.

ಸರಣಿ ವೇಳಾಪಟ್ಟಿ

1ನೇ ODI ಮೇ 30; ರಾವಲ್ಪಿಂಡಿ ಕ್ರಿಕೆಟ್ ಸ್ಟೇಡಿಯಂ, ರಾವಲ್ಪಿಂಡಿ

2ನೇ ODI ಜೂನ್ 2; ಗಡಾಫಿ ಸ್ಟೇಡಿಯಂ, ಲಾಹೋರ್

3ನೇ ODI ಜೂನ್ 4; ಗಡಾಫಿ ಸ್ಟೇಡಿಯಂ, ಲಾಹೋರ್

ಪಾಕ್‌ ತಂಡ

ಶಾಹೀನ್ ಶಾ ಅಫ್ರಿದಿ (ನಾಯಕ), ಸಲ್ಮಾನ್ ಅಲಿ ಅಘಾ (ಉಪನಾಯಕ), ಅಬ್ದುಲ್ ಸಮದ್, ಅಬ್ರಾರ್ ಅಹ್ಮದ್, ಅಹ್ಮದ್ ದನಿಯಾಲ್, ಅರಾಫತ್ ಮಿನ್ಹಾಸ್, ಬಾಬರ್ ಅಜಮ್, ಹ್ಯಾರಿಸ್ ರೌಫ್, ಮಾಜ್ ಸದಾಕತ್, ಮುಹಮ್ಮದ್ ಗಾಜಿ ಘೋರಿ (ವಿಕೆಟ್-ಕೀಪರ್), ನಸೀಮ್ ಶಾ, ರೋಹೈಲ್ ನಝೀಕ್ ಖಾನ್, ಶಮಿಲ್ ಹುಸೇನ್ ಮತ್ತು ಸುಫ್ಯಾನ್ ಮೊಕಿಮ್.