ನೌಕಾಪಡೆಗೆ 3 ಸ್ವದೇಶಿ ಯುದ್ಧನೌಕೆಗಳು; ಸಮುದ್ರ ಶಕ್ತಿಯಲ್ಲಿ ಭಾರತದ ಹೊಸ ಅಧ್ಯಾಯ
ಪಶ್ಚಿಮ ಬಂಗಾಳದಲ್ಲಿ ಕೋಲ್ಕತಾದ ಶ್ಯಾಮ ಪ್ರಸಾದ್ ಮುಖರ್ಜಿ ಬಂದರಿನಲ್ಲಿ ಪ್ರಧಾನಿ ನರೇಂದ್ರ ಮೋದಿ ಭಾರತೀಯ ನೌಕಾಪಡೆಗೆ INS ದುನಗಿರಿ, INS ಸಂಶೋಧಕ್ ಮತ್ತು INS ಅಗ್ರಯ್ ಎಂಬ ಮೂರು ಸ್ವದೇಶಿ ಯುದ್ಧನೌಕೆಗಳನ್ನು ಸೇರ್ಪಡೆಗೊಳಿಸಿದರು. ಈ ನೌಕೆಗಳು ಭಾರತದ ಸಮುದ್ರ ಭದ್ರತೆ, ಜಲಾಂತರ್ಗಾಮಿ ವಿರೋಧಿ ಕಾರ್ಯಾಚರಣೆ ಹಾಗೂ ಸಾಗರ ಸಮೀಕ್ಷಾ ಸಾಮರ್ಥ್ಯವನ್ನು ಮತ್ತಷ್ಟು ಬಲಪಡಿಸಲಿವೆ.
ಕೋಲ್ಕತಾದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸ್ವದೇಶಿ ಯುದ್ಧನೌಕೆ ಅನಾವರಣಗೊಳಿಸಿದರು -
ಕೋಲ್ಕತಾ, ಜೂ. 22: ಭಾರತದ ಸಮುದ್ರ ಭದ್ರತೆ ಮತ್ತು ಸ್ವದೇಶಿ ರಕ್ಷಣಾ ಉತ್ಪಾದನಾ ಸಾಮರ್ಥ್ಯಕ್ಕೆ ಮತ್ತೊಂದು ಮಹತ್ವದ ಬಲ ಸಿಕ್ಕಿದ್ದು, ಪ್ರಧಾನಿ ನರೇಂದ್ರ ಮೋದಿ (PM Modi) ಕೋಲ್ಕತಾದ ಶ್ಯಾಮ ಪ್ರಸಾದ್ ಮುಖರ್ಜಿ (Syama Prasad Mookerjee Port) ಬಂದರಿನಲ್ಲಿ ನಡೆದ ವಿಶೇಷ ಸಮಾರಂಭದಲ್ಲಿ ಭಾರತೀಯ ನೌಕಾಪಡೆಗೆ ಮೂರು ಸ್ವದೇಶಿ ಯುದ್ಧನೌಕೆಗಳಾದ INS Dunagiri, INS Sanshodhak ಮತ್ತು INS Agray ಅನ್ನು ಅಧಿಕೃತವಾಗಿ ಸೇರ್ಪಡೆಗೊಳಿಸಿದರು.
ಈ ಮೂರು ನೌಕೆಗಳನ್ನು ಕೋಲ್ಕತಾದ ಗಾರ್ಡನ್ ರೀಚ್ ಶಿಪ್ಬಿಲ್ಡರ್ಸ್ ಆ್ಯಂಡ್ ಎಂಜಿನಿಯರ್ಸ್ (GRSE) ಸಂಸ್ಥೆ ನಿರ್ಮಿಸಿದ್ದು, ಭಾರತೀಯ ನೌಕಾಪಡೆಯ ವಾರ್ಶಿಪ್ ಡಿಸೈನ್ ಬ್ಯೂರೋ ವಿನ್ಯಾಸಗೊಳಿಸಿದೆ. ಈ ಸಂದರ್ಭದಲ್ಲಿ ಮಾತನಾಡಿದ ಪ್ರಧಾನಿ ಮೋದಿ, ಬಲಿಷ್ಠ ಸಮುದ್ರ ಸಾಮರ್ಥ್ಯವಿಲ್ಲದೆ ಯಾವುದೇ ರಾಷ್ಟ್ರ ಜಾಗತಿಕ ಶಕ್ತಿಯಾಗಿ ಹೊರಹೊಮ್ಮಲು ಸಾಧ್ಯವಿಲ್ಲ ಎಂದು ಹೇಳಿ, ಆತ್ಮನಿರ್ಭರ ಭಾರತದ ದೃಷ್ಟಿಕೋನದಡಿ ದೇಶದ ರಕ್ಷಣಾ ಕ್ಷೇತ್ರ ವೇಗವಾಗಿ ಬೆಳೆಯುತ್ತಿದೆ ಎಂದು ತಿಳಿಸಿದರು.
ಪ್ರಧಾನಿ ನರೇಂದ್ರ ಮೋದಿ ಅವರ ಎಕ್ಸ್ ಪೋಸ್ಟ್:
Today in Kolkata, INS Dunagiri, INS Sanshodhak and INS Agray were commissioned. They reflect India’s growing maritime capabilities, our commitment to safeguarding national interests across the seas and the remarkable strides being made towards self-reliance in defence… pic.twitter.com/hWyD7ePH2W
— Narendra Modi (@narendramodi) June 21, 2026
ಮೂರು ನೌಕೆಗಳಲ್ಲಿ ಅತ್ಯಂತ ಶಕ್ತಿಶಾಲಿಯಾದ INS ದುನಗಿರಿ, Project-17A ಯೋಜನೆಯಡಿ ನಿರ್ಮಿಸಲಾದ ನೀಲಗಿರಿ ವರ್ಗದ ಐದನೇ ಸ್ಟೆಲ್ತ್ ಗೈಡೆಡ್ ಮಿಸೈಲ್ ಫ್ರಿಗೇಟ್ ಆಗಿದ್ದು, ಬ್ರಹ್ಮೋಸ್ ಕ್ಷಿಪಣಿಗಳು, ಮಧ್ಯಮ ದೂರದ ವಾಯು ರಕ್ಷಣಾ ವ್ಯವಸ್ಥೆ ಹಾಗೂ ಅತ್ಯಾಧುನಿಕ ರಡಾರ್ ಮತ್ತು ಸೆನ್ಸಾರ್ಗಳನ್ನು ಹೊಂದಿದೆ. ಸುಮಾರು 6,670 ಟನ್ ತೂಕ ಮತ್ತು 149 ಮೀಟರ್ ಉದ್ದ ಹೊಂದಿರುವ ಈ ಯುದ್ಧನೌಕೆ ಶತ್ರು ರಡಾರ್ಗಳಿಗೆ ಸುಲಭವಾಗಿ ಪತ್ತೆಯಾಗದ ಸ್ಟೆಲ್ತ್ ತಂತ್ರಜ್ಞಾನದಿಂದ ನಿರ್ಮಾಣಗೊಂಡಿದೆ.
ನೆಚ್ಚಿನ ಭಾರತ, ಪಾಕಿಸ್ತಾನ ವ್ಯಕ್ತಿಯನ್ನು ಹೆಸರಿಸಿದ ಅಮೆರಿಕ ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್
INS ಸಂಶೋಧಕ್ ಸಮುದ್ರದಾಳದ ನಕ್ಷೆ ತಯಾರಿಕೆ, ನೌಕಾಯಾನ ಮಾರ್ಗಗಳ ಗುರುತು ಹಾಗೂ ಸಾಗರ ವಿಜ್ಞಾನ ಅಧ್ಯಯನಕ್ಕಾಗಿ ವಿನ್ಯಾಸಗೊಳಿಸಲಾದ ಅತ್ಯಾಧುನಿಕ ಸಮೀಕ್ಷಾ ನೌಕೆಯಾಗಿದ್ದು, AUV, ROV, ಮಲ್ಟಿ-ಬೀಮ್ ಎಕೊ ಸೌಂಡರ್ ಹಾಗೂ ಡಿಜಿಟಲ್ ಸೈಡ್-ಸ್ಕ್ಯಾನ್ ಸೋನಾರ್ಗಳಂತಹ ಸುಧಾರಿತ ವ್ಯವಸ್ಥೆಗಳನ್ನು ಒಳಗೊಂಡಿದೆ. ಇದರ ಸ್ವದೇಶಿ ಉತ್ಪಾದನಾ ಪ್ರಮಾಣ 80 ಪ್ರತಿಶತಕ್ಕಿಂತ ಹೆಚ್ಚಾಗಿದೆ.
ಇನ್ನು INS ಅಗ್ರಯ್, ಅರ್ನಾಲಾ ವರ್ಗದ ಜಲಾಂತರ್ಗಾಮಿ ವಿರೋಧಿ ಯುದ್ಧನೌಕೆಯಾಗಿದ್ದು, ಕರಾವಳಿ ಪ್ರದೇಶಗಳಲ್ಲಿ ಕಾರ್ಯನಿರ್ವಹಿಸುವ ಶತ್ರು ಜಲಾಂತರ್ಗಾಮಿಗಳನ್ನು ಪತ್ತೆಹಚ್ಚಿ ನಾಶಪಡಿಸಲು ವಿಶೇಷವಾಗಿ ನಿರ್ಮಿಸಲಾಗಿದೆ. ಇದರಲ್ಲಿ ಲೈಟ್ವೇಟ್ ಟಾರ್ಪಿಡೊಗಳು, ಸ್ವದೇಶಿ ರಾಕೆಟ್ ಲಾಂಚರ್ಗಳು, ಅತ್ಯಾಧುನಿಕ ಸೋನಾರ್ ವ್ಯವಸ್ಥೆ ಹಾಗೂ ವಾಟರ್ಜೆಟ್ ಪ್ರೊಪಲ್ಶನ್ ತಂತ್ರಜ್ಞಾನ ಅಳವಡಿಸಲಾಗಿದೆ. ಸುಮಾರು 77 ಮೀಟರ್ ಉದ್ದ ಮತ್ತು 900 ಟನ್ ತೂಕ ಹೊಂದಿರುವ ಈ ನೌಕೆ ಕಡಿಮೆ ಶಬ್ದದೊಂದಿಗೆ ಕಾರ್ಯನಿರ್ವಹಿಸುವ ಸಾಮರ್ಥ್ಯ ಹೊಂದಿದೆ.
ಪ್ರಧಾನ ಮಂತ್ರಿ ಮೋದಿ ಅವರ ಪ್ರಕಾರ 2014ರಲ್ಲಿ ಸುಮಾರು 40 ಸಾವಿರ ಕೋಟಿ ರುಪಾಯಿ ಇದ್ದ ಭಾರತದ ರಕ್ಷಣಾ ಉತ್ಪಾದನೆ ಇಂದು 1.8 ಲಕ್ಷ ಕೋಟಿ ರುಪಾಯಿಗೆ ಏರಿಕೆಯಾಗಿದೆ. ಈಗಾಗಲೇ 40ಕ್ಕೂ ಹೆಚ್ಚು ಸ್ವದೇಶಿ ಯುದ್ಧನೌಕೆಗಳು ಭಾರತೀಯ ನೌಕಾಪಡೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದು, ಇನ್ನೂ 45 ನೌಕೆಗಳು ನಿರ್ಮಾಣ ಹಂತದಲ್ಲಿವೆ. ಒಂದೇ ಸಮಾರಂಭದಲ್ಲಿ ಮೂರು ಅತ್ಯಾಧುನಿಕ ಸ್ವದೇಶಿ ನೌಕೆಗಳನ್ನು ಸೇರ್ಪಡೆಗೊಳಿಸಿರುವುದು ಭಾರತದ ನೌಕಾಪಡೆಯ ಸಾಮರ್ಥ್ಯ, ಸಮುದ್ರ ಭದ್ರತೆ ಹಾಗೂ ರಕ್ಷಣಾ ಕ್ಷೇತ್ರದ ಸ್ವಾವಲಂಬನೆಗೆ ಹೊಸ ಅಧ್ಯಾಯ ಬರೆದಂತಾಗಿದೆ.