ಇಸ್ರೋದಿಂದ ಮತ್ತೊಂದು ಮೈಲುಗಲ್ಲು: ಎನ್‌ವಿಎಸ್-03 ಉಪಗ್ರಹ ಯಶಸ್ವಿ ಉಡಾವಣೆ; ಸ್ವದೇಶಿ ನ್ಯಾವಿಗೇಷನ್ ವ್ಯವಸ್ಥೆಗೆ ಮತ್ತಷ್ಟು ಬಲ
ISRO: ಮುಂದಿನ ಪೀಳಿಗೆಯ ನ್ಯಾವಿಗೇಷನ್ ಉಪಗ್ರಹ ಎನ್‌ವಿಎಸ್-03 ಅನ್ನು ಜಿಎಸ್‌ಎಲ್‌ವಿ-ಎಫ್‌ 18 ರಾಕೆಟ್ ಮೂಲಕ ಇಸ್ರೋ ಯಶಸ್ವಿಯಾಗಿ ಉಡಾವಣೆ ಮಾಡಿದೆ. ಉಡಾವಣೆಯಾದ 20 ನಿಮಿಷಗಳ ನಂತರ ಜಿಎಸ್‌ಎಲ್‌ವಿ-ಎಫ್‌ 18 ರಾಕೆಟ್ ಎನ್‌ವಿಎಸ್-03 ಉಪಗ್ರಹವನ್ನು ಅದರ ಉದ್ದೇಶಿತ ಕಕ್ಷೆಯಲ್ಲಿ ಯಶಸ್ವಿಯಾಗಿ ನಿಯೋಜಿಸಿದೆ ಎಂದು ಇಸ್ರೋ ಮುಖ್ಯಸ್ಥ ಡಾ. ವಿ. ನಾರಾಯಣನ್ ತಿಳಿಸಿದ್ದಾರೆ.
ಇಸ್ರೋದಿಂದ ಎನ್‌ವಿಎಸ್-03 ಉಪಗ್ರಹ ಯಶಸ್ವಿ ಉಡಾವಣೆ -
ಅಮರಾವತಿ, ಅ. 31: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO) ಮತ್ತೊಂದು ಮಹತ್ವದ ಸಾಧನೆ ಮಾಡುವ ಮೂಲಕ ಗಮನ ಸೆಳೆದಿದೆ. ಮುಂದಿನ ಪೀಳಿಗೆಯ ನ್ಯಾವಿಗೇಷನ್ ಉಪಗ್ರಹ ಎನ್‌ವಿಎಸ್-03 (NVS-03) ಅನ್ನು ಜಿಎಸ್‌ಎಲ್‌ವಿ-ಎಫ್‌ 18 (GSLV-F18) ರಾಕೆಟ್ ಮೂಲಕ ಯಶಸ್ವಿಯಾಗಿ ಉಡಾವಣೆ ಮಾಡಿದೆ. ಇದು ಭಾರತದ ಸ್ವತಂತ್ರ ಉಪಗ್ರಹ ನ್ಯಾವಿಗೇಷನ್ ವ್ಯವಸ್ಥೆ ನಾವಿಕ್ (NavIC) ಅನ್ನು ಬಲಪಡಿಸುವ ನಿಟ್ಟಿನಲ್ಲಿ ಒಂದು ಮಹತ್ವದ ಹೆಜ್ಜೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.
ಈ ಉಡಾವಣೆಯು ಶುಕ್ರವಾರ (ಅಕ್ಟೋಬರ್‌ 30) ರಾತ್ರಿ 11:51ಕ್ಕೆ ಆಂಧ್ರ ಪ್ರದೇಶದ ಶ್ರೀಹರಿಕೋಟಾದಲ್ಲಿರುವ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದ ಎರಡನೇ ಉಡಾವಣಾ ವೇದಿಕೆಯಿಂದ (Second Launch Pad) ನಡೆಯಿತು.
ಎನ್‌ವಿಎಸ್-03 ಉಪಗ್ರಹ ಯಶಸ್ವಿ ಉಡಾವಣೆ:
Mission Success! GSLV-F18 has successfully placed NVS-03 in the intended orbit. Congratulations! Watch live: https://t.co/6X42ANRnTC Mission details: https://t.co/wtZ6TmjUhc #GSLVF18 #NVS03 #ISRO #NavIC
— ISRO (@isro) October 30, 2026
ಉಡಾವಣೆಯಾದ 20 ನಿಮಿಷಗಳ ನಂತರ ಜಿಎಸ್‌ಎಲ್‌ವಿ-ಎಫ್‌ 18 ರಾಕೆಟ್ ಎನ್‌ವಿಎಸ್-03 ಉಪಗ್ರಹವನ್ನು ಅದರ ಉದ್ದೇಶಿತ ಕಕ್ಷೆಯಲ್ಲಿ ಯಶಸ್ವಿಯಾಗಿ ನಿಯೋಜಿಸಿತು. ಉಡಾವಣೆ ಯಶಸ್ವಿಯಾಗಿದೆ ಎಂದು ತಿಳಿಸಿರುವ ಇಸ್ರೋ ಮುಖ್ಯಸ್ಥ ಡಾ. ವಿ. ನಾರಾಯಣನ್, ವಿಜ್ಞಾನಿ ಮತ್ತು ಎಂಜಿನಿಯರ್‌ಗಳನ್ನು ಅಭಿನಂದಿಸಿದ್ದಾರೆ.
ಇದು ಭಾರತದ ಜಿಯೋಸಿಂಕ್ರೋನಸ್ ಸ್ಯಾಟಲೈಟ್ ಲಾಂಚ್ ವೆಹಿಕಲ್ (GSLV)ನ 20ನೇ ಉಡಾವಣೆಯಾಗಿದ್ದು, ಇದು 2,250 ಕೆಜಿ ತೂಕದ ಉಪಗ್ರಹವನ್ನು ಜಿಯೋಸಿಂಕ್ರೋನಸ್ ಟ್ರಾನ್ಸ್‌ಫರ್ ಆರ್ಬಿಟ್ (GTO)ಗೆ ಸೇರಿಸಿತು.
ಎನ್‌ವಿಎಸ್-03 ಇಸ್ರೋದ 2ನೇ ತಲೆಮಾರಿನ ನ್ಯಾವಿಗೇಷನ್ ಉಪಗ್ರಹ ಸರಣಿಯಲ್ಲಿನ ಮೂರನೇ ಉಪಗ್ರಹ. ನ್ಯಾವಿಗೇಷನ್ ವಿತ್ ಇಂಡಿಯನ್ ಕಾನ್ಸ್ಟೆಲೇಷನ್ (NavIC) ಅಡಿಯಲ್ಲಿ ನ್ಯಾವಿಗೇಷನ್ ಸೇವೆಗಳ ನಿರಂತರತೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ಅವುಗಳ ಲಭ್ಯತೆಯನ್ನು ಸುಧಾರಿಸಲು ಇದನ್ನು ವಿನ್ಯಾಸಗೊಳಿಸಲಾಗಿದೆ.
ಸದ್ಯ ನಾಗರಿಕ, ವಾಣಿಜ್ಯ ಮತ್ತು ಕಾರ್ಯತಂತ್ರದ ಉದ್ದೇಶಗಳಿಗಾಗಿ ಉಪಗ್ರಹ ಆಧಾರಿತ ನ್ಯಾವಿಗೇಷನ್ ವ್ಯವಸ್ಥೆಗಳು ಅತ್ಯಂತ ನಿರ್ಣಾಯಕವಾಗಿದ್ದು ಈ ಹಿನ್ನೆಲೆಯಲ್ಲಿ ಯಶಸ್ವಿ ಉಡಾವಣೆಯು ಭಾರತಕ್ಕೆ ಮಹತ್ವದ್ದಾಗಿದೆ.
ಏನಿದು ನಾವಿಕ್?
ನಾವಿಕ್ ಎಂಬುದು ಅಮೆರಿಕದ ಜಿಪಿಎಸ್‌ನಂತಹ ನ್ಯಾವಿಗೇಷನ್ ವ್ಯವಸ್ಥೆಗಳಿಗೆ ಪರ್ಯಾಯವಾಗಿ ಭಾರತವು ಸ್ವತಃ ಅಭಿವೃದ್ಧಿಪಡಿಸಿದ ಮಾರ್ಗ. ನಾವಿಕ್ ಎಂಟು ಉಪಗ್ರಹಗಳನ್ನು ಹೊಂದಿರುವ ವ್ಯವಸ್ಥೆಯಾಗಿದ್ದು, ಸಂಪೂರ್ಣ ಭಾರತದ ನೆಲದ ವ್ಯಾಪ್ತಿಯನ್ನು ಹೊಂದುವುದಲ್ಲದೆ, ಗಡಿಯಾಚೆಗಿನ 1,500 ಕಿಲೋಮೀಟರ್ ವ್ಯಾಪ್ತಿಯನ್ನೂ ತೋರಿಸುತ್ತದೆ. ನಾವಿಕ್ ವ್ಯವಸ್ಥೆಯನ್ನು ವಿದೇಶೀ ಉಪಗ್ರಹಗಳ ಮೇಲಿನ ಭಾರತದ ಅವಲಂಬನೆಯನ್ನು ತೊಡೆದು ಹಾಕಲು, ಅದರಲ್ಲೂ ವಿಶೇಷವಾಗಿ ಕಾರ್ಯತಂತ್ರದ ವಿಚಾರಗಳಲ್ಲಿ ಸ್ವಾವಲಂಬನೆ ಸಾಧಿಸುವ ಉದ್ದೇಶದಿಂದ ಆರಂಭಿಸಲಾಯಿತು. ಈ ವ್ಯವಸ್ಥೆಯನ್ನು ರಸ್ತೆ ಮತ್ತು ಕಡಲ ಸಂಚಾರಕ್ಕಲ್ಲದೆ ವಿಪತ್ತು ನಿರ್ವಹಣೆ, ನಿಖರ ಕೃಷಿ ಮತ್ತು ಸಶಸ್ತ್ರ ಪಡೆಗಳ ಕಾರ್ಯತಂತ್ರದ ಕಾರ್ಯಾಚರಣೆಗಳವರೆಗೆ ಬಳಸಲಾಗುತ್ತದೆ.
ʼಒಂದು ರಾಷ್ಟ್ರ, ಒಂದು ಸಮಯ'ಕ್ಕೆ ಇಸ್ರೋ ಸಹಯೋಗ ಅನನ್ಯ: ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಬಣ್ಣನೆ
2025ರ ಜನವರಿ ಎದುರಾದ ಪ್ರಮುಖ ಹಿನ್ನಡೆಯ ನಂತರ ಈ ಯಶಸ್ವಿ ಉಡಾವಣೆ ನಡೆದಿದೆ. ಅಂದು GSLV-F15 ರಾಕೆಟ್ ಮೂಲಕ NVS-02 ಉಪಗ್ರಹವನ್ನು ಯಶಸ್ವಿಯಾಗಿ GTO ಕಕ್ಷೆಗೆ ಸೇರಿಸಲಾಗಿತ್ತಾದರೂ, ಅದು ತನ್ನ ನಿಗದಿತ ಕಾರ್ಯಾಚರಣಾ ಕಕ್ಷೆಯನ್ನು ತಲುಪುವಲ್ಲಿ ವಿಫಲವಾಗಿತ್ತು. ಪೈರೋಟೆಕ್ನಿಕ್ ವಾಲ್ವ್ ಒಂದರ ವಿದ್ಯುತ್ ಸಕ್ರಿಯಗೊಳಿಸುವಿಕೆಯಲ್ಲಿ ಉಂಟಾದ ದೋಷದಿಂದಾಗಿ ಉಪಗ್ರಹದ ಲಿಕ್ವಿಡ್ ಅಪೋಜಿ ಮೋಟಾರ್‌ಗೆ ಅಗತ್ಯವಿರುವ ಆಕ್ಸಿಡೈಸರ್ ಪೂರೈಕೆಯಾಗಲಿಲ್ಲ. ಪರಿಣಾಮವಾಗಿ, ಆ ಉಪಗ್ರಹವು ತನ್ನ ಟ್ರಾನ್ಸ್‌ಫರ್ ಕಕ್ಷೆಯಲ್ಲೇ ಸಿಲುಕಿಕೊಂಡಿತ್ತು. ಈ ಬಾರಿ ಅಂತಹ ಸಮಸ್ಯೆಯಾಗದಿರಲು ಇಸ್ರೋ ಸೂಕ್ತ ಕ್ರಮ ಕೈಗೊಂಡಿದೆ.
ದೇಶದ ಇನ್ನಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್‌ ಮಾಡಿ.
ʼಪ್ರವಾಸಿ ಪ್ರಪಂಚʼ ವೆಬ್‌ಸೈಟ್‌ಗೆ ಭೇಟಿ ನೀಡಲು ಇಲ್ಲಿ ಕ್ಲಿಕ್‌ ಮಾಡಿ.