ಎಐ 'ಶೀತಲ ಸಮರ': ದೆಹಲಿ ಶೃಂಗಸಭೆಯಲ್ಲಿ ಓಪನ್-ಎಐ, ಆಂಥ್ರೋಪಿಕ್ ಸಿಇಒಗಳಿಗೆ ಮುಜುಗರ

ನವದೆಹಲಿ, ಫೆ. 19: ದೆಹಲಿಯ ಭಾರತ್ ಮಂಟಪದಲ್ಲಿ ನಡೆಯುತ್ತಿರುವ ಇಂಡಿಯಾ ಎಐ ಇಂಪ್ಯಾಕ್ಟ್ ಶೃಂಗಸಭೆ (India AI Impact Summit) ಗುರುವಾರ (ಫೆಬ್ರವರಿ 19) ಮುಜುಗರಕ್ಕೀಡಾದ ಕ್ಷಣವು ಎಲ್ಲರ ಗಮನ ಸೆಳೆದಿದೆ. ವೇದಿಕೆಯ ಮೇಲೆ ಗ್ರೂಪ್ ಫೋಟೊಗಾಗಿ ನಿಂತಿದ್ದಾಗ ಓಪನ್-ಎಐ (OpenAI) ಸಿಇಒ ಸ್ಯಾಮ್ ಆಲ್ಟ್‌ಮನ್ (Sam Altman) ಮತ್ತು ಆಂಥ್ರೋಪಿಕ್ (Anthropic) ಸಿಇಒ ಡಾರಿಯೋ ಅಮೋಡೆಯ್ (Dario Amodei) ಒಬ್ಬರಿಗೊಬ್ಬರು ಕೈ ಹಿಡಿಯುವ ಬದಲು ಕೈಮುಷ್ಟಿ ಎತ್ತಿ ಪೋಸ್ ನೀಡಿದರು.

ಎರಡು ಬದ್ಧ ಸ್ಪರ್ಧಿ ಕಂಪನಿಗಳನ್ನು ಪ್ರತಿನಿಧಿಸುವ ಈ ಇಬ್ಬರು ದಿಗ್ಗಜರು, ಫೋಟೊಗೆ ಪೋಸ್‌ ನೀಡುವ ಮೊದಲು ತುಸು ಗೊಂದಲಕ್ಕೀಡಾಗಿ ನಂತರ ಈ ನಿರ್ಧಾರಕ್ಕೆ ಬಂದರು. ಈ ದೃಶ್ಯವು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆ ಮತ್ತು ನಗು ಮೂಡಿಸಿದೆ. ಪುಚ್ ಎಐನ ಸಹ-ಸಂಸ್ಥಾಪಕ ಸಿದ್ದಾರ್ಥ್ ಭಾಟಿಯಾ ಈ ಕುರಿತು ಎಕ್ಸ್‌ನಲ್ಲಿ ಪ್ರತಿಕ್ರಿಯಿಸಿ, "ಡಾರಿಯೋ ಮತ್ತು ಸ್ಯಾಮ್ ಎಂದು ಕೈ ಹಿಡಿಯುತ್ತಾರೋ ಅಂದು ಎಜಿಐ (AGI) ಬಂದಂತೆ!" ಎಂದು ಲೇವಡಿ ಮಾಡಿದ್ದಾರೆ.

ಸಿದ್ದಾರ್ಥ್ ಭಾಟಿಯಾ ಅವರ ಎಕ್ಸ್‌ ಪೋಸ್ಟ್‌:

ಗಣ್ಯರ ಉಪಸ್ಥಿತಿ

ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ನಡೆದ ಈ ಫೋಟೊ ಸೆಷನ್‌ನಲ್ಲಿ ಗೂಗಲ್ ಸಿಇಒ ಸುಂದರ್ ಪಿಚೈ, ಸ್ಕೇಲ್ ಎಐ ಸಂಸ್ಥಾಪಕ ಅಲೆಕ್ಸಾಂಡರ್ ವಾಂಗ್ ಮತ್ತು ಮೆಟಾ ಸಂಸ್ಥೆಯ ಪ್ರಮುಖರು ಉಪಸ್ಥಿತರಿದ್ದರು. ಡಾರಿಯೋ ಅಮೋಡೆಯ್ ಈ ಹಿಂದೆ ಓಪನ್-ಎಐನಲ್ಲಿ ಸಂಶೋಧನಾ ವಿಭಾಗದ ಉಪಾಧ್ಯಕ್ಷರಾಗಿದ್ದರು. 2021ರಲ್ಲಿ ಅಲ್ಲಿಂದ ಹೊರಬಂದು ಆಂಥ್ರೋಪಿಕ್ ಸಂಸ್ಥೆಯನ್ನು ಸ್ಥಾಪಿಸಿದ್ದರು.

ಬೆಂಗಳೂರು ಸ್ಟಾರ್ಟ್‌ಅಪ್‌ನಿಂದ 'ಪರಮ್' ಸೃಷ್ಟಿ: ಭಾರತದ ಶಕ್ತಿಶಾಲಿ ಸ್ವದೇಶಿ ರೋಬೋಟ್ ನಾಯಿ ಅನಾವರಣ

ಎಐ ಸಾಮರ್ಥ್ಯ

ಶೃಂಗಸಭೆಯಲ್ಲಿ ಮಾತನಾಡಿದ ಅಮೋಡೆಯ್, "ಎಐ ಸಾಮರ್ಥ್ಯವು ಪ್ರಬಲವಾಗಿ ಬೆಳೆಯುತ್ತಿದ್ದು, ಕೆಲವೇ ವರ್ಷಗಳಲ್ಲಿ ಇದು ಮಾನವನ ಬೌದ್ಧಿಕ ಸಾಮರ್ಥ್ಯವನ್ನು ಮೀರಿಸಲಿದೆ. ಇದು ರೋಗ ಮತ್ತು ಬಡತನದ ವಿರುದ್ಧ ಹೋರಾಡಲು ಸಹಕಾರಿ. ಆದರೆ ದುರ್ಬಳಕೆಯ ಅಪಾಯವೂ ಇದೆ" ಎಂದರು.

ಭಾರತದ ನಾಯಕತ್ವ

ಸ್ಯಾಮ್ ಆಲ್ಟ್‌ಮನ್ ಭಾರತದ ಎಐ ಅಳವಡಿಕೆಯನ್ನು ಶ್ಲಾಘಿಸಿದ್ದು, "ಭಾರತವು ಎಐ ಕ್ರಾಂತಿಯಲ್ಲಿ ಕೇವಲ ಭಾಗವಹಿಸುತ್ತಿಲ್ಲ, ಬದಲಿಗೆ ವಿಶ್ವದ ನಾಯಕತ್ವ ವಹಿಸುತ್ತಿದೆ" ಎಂದು ಅಭಿಪ್ರಾಯಪಟ್ಟರು. ಫೆಬ್ರವರಿ 16ರಿಂದ 20ರವರೆಗೆ ನಡೆಯುತ್ತಿರುವ ಈ ಶೃಂಗಸಭೆಯಲ್ಲಿ ವಿಶ್ವದ 500ಕ್ಕೂ ಹೆಚ್ಚು ಎಐ ನಾಯಕರು ಮತ್ತು ಸಂಶೋಧಕರು ಪಾಲ್ಗೊಂಡಿದ್ದಾರೆ.