IND vs NZ: ʻಮೊಹಮ್ಮದ್ ಸಿರಾಜ್‌ಗೆ ಅನ್ಯಾಯʼ-ಭಾರತ ತಂಡವನ್ನು ಟೀಕಿಸಿದ ಅಂಜುಮ್ ಚೋಪ್ರಾ!
ನ್ಯೂಜಿಲೆಂಡ್ ವಿರುದ್ಧದ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಮೊಹಮ್ಮದ್ ಸಿರಾಜ್‌ಗೆ ಅವಕಾಶ ನೀಡದ ಭಾರತದ ನಿರ್ಧಾರವನ್ನು ಅಂಜುಮ್ ಚೋಪ್ರಾ ಅನ್ಯಾಯವೆಂದು ಟೀಕಿಸಿದ್ದಾರೆ. ಉತ್ತಮ ಲಯದಲ್ಲಿರುವ ಅನುಭವಿ ವೇಗಿಗೆ ನಿರಂತರ ಪಂದ್ಯಾವಕಾಶ ಅಗತ್ಯ ಎಂದು ಅಜಯ್ ಜಡೇಜಾ ಅಭಿಪ್ರಾಯಪಟ್ಟಿದ್ದು, ಗಾಯದ ಸಮಸ್ಯೆಯ ಸಾಧ್ಯತೆಯನ್ನೂ ಪ್ರಸ್ತಾಪಿಸಿದ್ದಾರೆ.
ಮೊಹಮ್ಮದ್ ಸಿರಾಜ್ ಪರ ಅಂಜುಮ್ ಚೋಪ್ರಾ ಬ್ಯಾಟಿಂಗ್‌. -
ನವದೆಹಲಿ: ನ್ಯೂಜಿಲೆಂಡ್ ವಿರುದ್ಧದ ನಾಲ್ಕನೇ ಏಕದಿನ ಪಂದ್ಯದಲ್ಲಿ (IND vs NZ) ಅನುಭವಿ ವೇಗಿ ಮೊಹಮ್ಮದ್ ಸಿರಾಜ್ (Mohammed Siraj) ಅವರನ್ನು ಆಡುವ ಹನ್ನೊಂದರ ಬಳಗದಿಂದ ಕೈಬಿಟ್ಟ ಭಾರತದ ತಂಡದ ನಿರ್ಧಾರವನ್ನು ಮಾಜಿ ನಾಯಕಿ ಅಂಜುಮ್ ಚೋಪ್ರಾ (Anjum Chopra) ತೀವ್ರವಾಗಿ ಟೀಕಿಸಿದ್ದಾರೆ. ಉತ್ತಮ ಲಯದಲ್ಲಿರುವ ಆಟಗಾರನಿಗೆ ಅವಕಾಶ ನೀಡದಿರುವುದು ಅನ್ಯಾಯ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ನವೆಂಬರ್ 13ರಂದು ಮೌಂಟ್ ಮೌಂಗನುಯಿಯಲ್ಲಿ ನಡೆದಿದ್ದ ಭಾರತ ಮತ್ತು ನ್ಯೂಜಿಲೆಂಡ್ ನಡುವಿನ ನಾಲ್ಕನೇ ಏಕದಿನ ಪಂದ್ಯದಲ್ಲಿ ಆತಿಥೇಯ ನ್ಯೂಜಿಲೆಂಡ್ ತಂಡ ತನ್ನ ಆಡುವ ಹನ್ನೊಂದರ ಬಳಗದಲ್ಲಿ ಮೂರು ಬದಲಾವಣೆಗಳನ್ನು ಮಾಡಿಕೊಂಡಿತ್ತು. ವೇಗದ ಬೌಲಿಂಗ್ ವಿಭಾಗದಲ್ಲೂ ಬದಲಾವಣೆಗಳಿದ್ದರೂ, ಭಾರತದ ಅನುಭವಿ ವೇಗಿ ಮೊಹಮ್ಮದ್ ಸಿರಾಜ್‌ಗೆ ಮಾತ್ರ ಆಡುವ ಅವಕಾಶ ಸಿಗಲಿಲ್ಲ.
50 ಏಕದಿನ ಇನಿಂಗ್ಸ್‌ಗಳಲ್ಲಿ 5.15ರ ಎಕಾನಮಿ ದರದಲ್ಲಿ 77 ವಿಕೆಟ್‌ಗಳನ್ನು ಕಬಳಿಸಿರುವ ಸಿರಾಜ್, ಇತ್ತೀಚೆಗೆ ಭಾರತ ಎ ತಂಡದ ಪರವೂ ಉತ್ತಮ ಪ್ರದರ್ಶನ ನೀಡಿದ್ದರು. ನ್ಯೂಜಿಲೆಂಡ್ ಎ ವಿರುದ್ಧದ ಅನಧಿಕೃತ ಟೆಸ್ಟ್ ಪಂದ್ಯದಲ್ಲಿ ಆಡಿದ ಬಳಿಕ ಅವರು ಏಕದಿನ ತಂಡವನ್ನು ಸೇರಿಕೊಂಡಿದ್ದರು. ಆದರೂ ನಾಲ್ಕನೇ ಪಂದ್ಯದಲ್ಲಿ ಅವರನ್ನು ಬೆಂಚ್‌ನಲ್ಲೇ ಕೂರಿಸಲಾಗಿತ್ತು.
IND vs NZ: ಗೋಲ್ಡನ್‌ ಡಕ್‌ಔಟ್‌ ಆಗಿ ಅನಗತ್ಯ ದಾಖಲೆ ಬರೆದ ರೋಹಿತ್‌ ಶರ್ಮಾ!
ಈ ನಿರ್ಧಾರದ ಬಗ್ಗೆ ಸೋನಿ ಸ್ಪೋರ್ಟ್ಸ್‌ನಲ್ಲಿ ಮಾತನಾಡಿದ ಭಾರತದ ಮಾಜಿ ನಾಯಕಿ ಅಂಜುಮ್ ಚೋಪ್ರಾ, ತಂಡದ ಆಡಳಿತ ಮಂಡಳಿಯ ನಿಲುವಿನಲ್ಲಿ ಸ್ಥಿರತೆ ಇಲ್ಲ ಎಂದು ಟೀಕಿಸಿದ್ದಾರೆ. ಇಡೀ ನ್ಯೂಜಿಲೆಂಡ್ ಪ್ರವಾಸದಲ್ಲಿ ತಂಡದೊಂದಿಗೆ ಲಭ್ಯವಿದ್ದ ಹಾಗೂ ಉತ್ತಮ ಪ್ರದರ್ಶನ ನೀಡುವ ಸಾಮರ್ಥ್ಯ ಹೊಂದಿರುವ ಆಟಗಾರನಿಗೆ ಅವಕಾಶ ನೀಡದಿರುವುದು ಸರಿಯಲ್ಲ ಎಂದು ಹೇಳಿದ್ದಾರೆ.
“ಇದು ಅನ್ಯಾಯ. ಭಾರತೀಯ ತಂಡದಲ್ಲಿ ಆಡಲು ನೀವು ಉತ್ತಮ ಪ್ರತಿಭೆ ಹೊಂದಿರಬೇಕು. ಆದರೆ, ನಿಮ್ಮ ಪ್ರದರ್ಶನದ ಮೂಲಕ ಭಾರತವನ್ನು ಗೆಲ್ಲಿಸಿದಾಗ ಮಾತ್ರ ನೀವು ಅತ್ಯುತ್ತಮ ಆಟಗಾರರಾಗುತ್ತೀರಿ. ಒಬ್ಬ ಆಟಗಾರನಿಗೆ ಹಲವು ಪಂದ್ಯಗಳಲ್ಲಿ ಬೆಂಬಲ ನೀಡುವುದು ಒಳ್ಳೆಯದೇ. ಆದರೆ, ಈ ಹಿಂದೆ ಉತ್ತಮ ಪ್ರದರ್ಶನ ನೀಡಿದ ಹಾಗೂ ಭಾರತ ಎ ತಂಡದ ಪರ ಉತ್ತಮವಾಗಿ ಬೌಲ್‌ ಮಾಡಿ ಬಂದ ಆಟಗಾರನನ್ನು ಅಭ್ಯಾಸಕ್ಕೆ ಕರೆಸಿ, ವಾರ್ಮ್‌ಅಪ್ ಮಾಡಿಸಿ, ತರಬೇತಿ ನೀಡಿದರೂ ಆಡುವ ಹನ್ನೊಂದರ ಬಳಗದಲ್ಲಿ ಸ್ಥಾನ ನೀಡದಿರುವುದು ಸರಿಯಲ್ಲ,” ಎಂದು ಅಂಜುಮ್ ಚೋಪ್ರಾ ತಿಳಿಸಿದ್ದಾರೆ.
“ನನ್ನ ಪ್ರಕಾರ ಇದು ಸರಿಯಾದ ನಿರ್ಧಾರವಲ್ಲ. ಸಿರಾಜ್ ಅವರನ್ನು ಆಡಿಸುವ ಉದ್ದೇಶ ಇಲ್ಲದಿದ್ದರೆ, ಕೆಲವು ಯುವ ಬೌಲರ್‌ಗಳನ್ನು ತಂಡದೊಂದಿಗೆ ಸೇರಿಸಿಕೊಳ್ಳಬಹುದಿತ್ತು. ಅವರು ಇಡೀ ನ್ಯೂಜಿಲೆಂಡ್ ಸುತ್ತಾಡಿದ್ದಾರೆ. ಇಶಾನ್ ಕಿಶನ್ ಜೊತೆ ಕ್ರಿಸ್ಟಿಯಾನೊ ರೊನಾಲ್ಡೊ ಕೂಡ ಆಗಿದ್ದರು. ಆದರೆ, ಕನಿಷ್ಠ ಒಂದು ಪಂದ್ಯದಲ್ಲಾದರೂ ಅವರನ್ನು ಆಡುವ ಹನ್ನೊಂದರ ಬಳಗದಲ್ಲಿ ಆಡಿಸಿ. ಉತ್ತಮ ಲಯದಲ್ಲಿರುವ, ಅನುಭವ ಹೊಂದಿರುವ ಮತ್ತು ಅತ್ಯುತ್ತಮ ಕೌಶಲ ಹಾಗೂ ಮನೋಸ್ಥೈರ್ಯ ಹೊಂದಿರುವ ಆಟಗಾರನಿಗೆ ಈ ರೀತಿ ಅವಕಾಶ ನಿರಾಕರಿಸುವುದು ಅನ್ಯಾಯ,” ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ʻಮೈದಾನದಲ್ಲಿ ನಿಮ್ಮ ವರ್ತನೆ ಎಲ್ಲೆ ಮೀರಬಾರದುʼ: ಗುರ್ನೂರ್‌ ಬ್ರಾರ್‌ಗೆ ದಿನೇಶ್‌ ಕಾರ್ತಿಕ್‌ ವಾರ್ನಿಂಗ್‌!
ಸಿರಾಜ್‌ಗೆ ಅವಕಾಶ ಸಿಗದಿರುವುದಕ್ಕೆ ಅಜಯ್ ಜಡೇಜಾ ಅಚ್ಚರಿ
ಇದೇ ವಿಚಾರವಾಗಿ ಮಾತನಾಡಿದ ಮಾಜಿ ಕ್ರಿಕೆಟಿಗ ಅಜಯ್ ಜಡೇಜಾ ಕೂಡ ಸರಣಿಯ ಹಲವು ಪಂದ್ಯಗಳಲ್ಲಿ ಸಿರಾಜ್ ಅವರನ್ನು ಆಡುವ ಹನ್ನೊಂದರ ಬಳಗದಿಂದ ಹೊರಗಿಟ್ಟಿರುವುದಕ್ಕೆ ಸ್ಪಷ್ಟನೆ ನೀಡುವುದು ಕಷ್ಟ ಎಂದಿದ್ದಾರೆ.
ಸಿರಾಜ್ ಉತ್ತಮ ಪ್ರದರ್ಶನ ನೀಡಲು ನಿರಂತರವಾಗಿ ಪಂದ್ಯಗಳಲ್ಲಿ ಆಡುವ ಅವಕಾಶ ಹಾಗೂ ಲಯ ಬಹಳ ಮುಖ್ಯ ಎಂದು ಜಡೇಜಾ ಅಭಿಪ್ರಾಯಪಟ್ಟಿದ್ದಾರೆ. ಟೆಸ್ಟ್ ತಂಡದ ಉಳಿದ ಆಟಗಾರರು ಮುಂದಿನ ಟೆಸ್ಟ್ ಸರಣಿಯ ಸಿದ್ಧತೆಗಾಗಿ ತೆರಳಿರುವ ಹಿನ್ನೆಲೆಯಲ್ಲಿ ಸಿರಾಜ್ ಅವರನ್ನು ಏಕದಿನ ತಂಡದಲ್ಲಿ ಉಳಿಸಿಕೊಂಡಿದ್ದರಿಂದ, ಅವರು ಮುಂದಿನ ಪಂದ್ಯಗಳಲ್ಲಿ ಆಡಬಹುದು ಎಂಬ ನಿರೀಕ್ಷೆ ಇತ್ತು ಎಂದು ಹೇಳಿದ್ದಾರೆ.
“ಇದನ್ನು ವಿವರಿಸುವುದು ತುಂಬಾ ಕಷ್ಟ. ಸಿರಾಜ್‌ಗೆ ಉತ್ತಮ ಪ್ರದರ್ಶನ ನೀಡಲು ನಿರಂತರವಾಗಿ ಪಂದ್ಯಗಳಲ್ಲಿ ಆಡುವ ಅವಕಾಶ ಮತ್ತು ಲಯದ ಅಗತ್ಯವಿದೆ. ಉಳಿದ ಟೆಸ್ಟ್ ಆಟಗಾರರು ಟೆಸ್ಟ್ ಪಂದ್ಯಗಳ ಸಿದ್ಧತೆಗಾಗಿ ತೆರಳಿದ್ದಾರೆ. ಹೀಗಾಗಿ ಸಿರಾಜ್ ಅವರನ್ನು ತಂಡದಲ್ಲಿ ಉಳಿಸಿಕೊಂಡಿರುವುದನ್ನು ನೋಡಿದಾಗ, ಅವರು ಮುಂದಿನ ಪಂದ್ಯಗಳಲ್ಲಿ ಆಡಬಹುದು ಎಂದು ನಾವು ಭಾವಿಸಿದ್ದೆವು,” ಎಂದು ಅಜಯ್ ಜಡೇಜಾ ಹೇಳಿದ್ದಾರೆ.