ಬ್ರಿಕ್ಸ್‌ ಶೃಂಗಸಭೆಯಲ್ಲಿ ವ್ಲಾಡಿಮಿರ್‌ ಪುಟಿನ್-ಕ್ಸಿ ಜಿನ್‌ಪಿಂಗ್‌ ಭದ್ರತಾ ಕಾರ್‌ಗಳೇ ಹೈಲೈಟ್: ಗುಂಡಿಗೂ ಜಗ್ಗದ ಔರಸ್ ಸೆನಾಟ್, ಹಾಂಗ್‌ಕಿ N701 ವೈಶಿಷ್ಟ್ಯತೆ ಏನು?

ನವದೆಹಲಿ, ಸೆ. 12: ರಾಜಧಾನಿ ನವದೆಹಲಿಯಲ್ಲಿ ನಡೆಯುತ್ತಿರುವ ಬ್ರಿಕ್ಸ್ ಶೃಂಗಸಭೆಗೆ (BRICS Summit) ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ (Vladimir Putin) ಹಾಗೂ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ (Xi Jinping) ಆಗಮಿಸಿದ್ದು, ನಾಯಕರ ನಿಯೋಗಗಳ ಜತೆಗೆ ಅವರ ವಿಶೇಷ ಭದ್ರತಾ ಕಾರ್‌ಗಳು ಕೂಡ ಗಮನ ಸೆಳೆಯುತ್ತಿವೆ. ಇಬ್ಬರೂ ನಾಯಕರು ಅತ್ಯಾಧುನಿಕ ತಂತ್ರಜ್ಞಾನ ಹಾಗೂ ಭಾರಿ ಭದ್ರತಾ ವ್ಯವಸ್ಥೆ ಹೊಂದಿರುವ ವಿಶೇಷವಾಗಿ ನಿರ್ಮಿಸಲಾದ ಕಾರ್‌ಗಳಲ್ಲಿ ಓಡಾಡಲಿದ್ದಾರೆ.

ಸೆಪ್ಟೆಂಬರ್ 11ರಂದು ಭಾರತಕ್ಕೆ ಆಗಮಿಸಿರುವ ಪುಟಿನ್ ರಷ್ಯಾದಲ್ಲಿ ನಿರ್ಮಿಸಲಾದ ಔರಸ್ ಸೆನಾಟ್ ಕಾರಿನಲ್ಲಿ ಸಂಚರಿಸುತ್ತಿದ್ದಾರೆ. ಸೆಪ್ಟೆಂಬರ್ 12ರಂದು ಭಾರತಕ್ಕೆ ಆಗಮಿಸಿರುವ ಕ್ಸಿ ಜಿನ್‌ಪಿಂಗ್ ಚೀನಾದ ಹಾಂಗ್‌ಕಿ ಎನ್ 701 ಕಾರು ಬಳಸುತ್ತಿದ್ದಾರೆ.

ಎರಡೂ ಕಾರುಗಳಲ್ಲಿ ಭಾರಿ ಕವಚ, ಗುಂಡು ನಿರೋಧಕ ಗಾಜು ಹಾಗೂ ಸುರಕ್ಷಿತ ಸಂಪರ್ಕ ವ್ಯವಸ್ಥೆಗಳನ್ನು ಅಳವಡಿಸಲಾಗಿದೆ. ಸಂಚಾರದ ಸಂದರ್ಭದಲ್ಲೂ ರಾಷ್ಟ್ರಾಧ್ಯಕ್ಷರಿಗೆ ಗರಿಷ್ಠ ಭದ್ರತೆ ಒದಗಿಸುವ ಜತೆಗೆ ಅಧಿಕಾರಿಗಳೊಂದಿಗೆ ಸಂಪರ್ಕದಲ್ಲಿರಲು ಈ ವ್ಯವಸ್ಥೆಗಳು ನೆರವಾಗುತ್ತವೆ.

ಔರಸ್ ಸೆನಾಟ್ ವಿಶೇಷತೆ

ಪುಟಿನ್ 2018ರಿಂದ ಔರಸ್ ಸೆನಾಟ್ ಕಾರ್‌ ಬಳಸುತ್ತಿದ್ದಾರೆ. ಇದಕ್ಕೂ ಮೊದಲು ರಷ್ಯಾ ಅಧ್ಯಕ್ಷರ ಅಧಿಕೃತ ವಾಹನವಾಗಿ ಮರ್ಸಿಡಿಸ್ ಬೆಂಝ್ ಎಸ್600 ಗಾರ್ಡ್ ಪುಲ್‌ಮನ್ ಬಳಸಲಾಗುತ್ತಿತ್ತು. ರಷ್ಯಾದ ಉನ್ನತ ಅಧಿಕಾರಿಗಳಿಗಾಗಿ ದೇಶೀಯವಾಗಿ ವಾಹನಗಳನ್ನು ನಿರ್ಮಿಸುವ ಕೋರ್ಟೆಜ್ ಯೋಜನೆಯಡಿ ಔರಸ್ ಸೆನಾಟ್ ಅಭಿವೃದ್ಧಿಪಡಿಸಲಾಗಿದೆ. ಈ ಎಲ್ 700 ಮಾದರಿ ಸುಮಾರು 7 ಮೀಟರ್ ಉದ್ದವಿದ್ದು, ಭದ್ರತಾ ಕವಚ ಹಾಗೂ ವಿವಿಧ ರಕ್ಷಣಾ ಸಾಧನಗಳಿಂದಾಗಿ ಹಲವು ಟನ್‌ಗಳಷ್ಟು ತೂಕ ಹೊಂದಿದೆ.

ಕಾರಿನಲ್ಲಿ 4.4 ಲೀಟರ್ ಟ್ವಿನ್-ಟರ್ಬೊ ವಿ8 ಹೈಬ್ರಿಡ್ ಎಂಜಿನ್ ಅಳವಡಿಸಲಾಗಿದ್ದು, ಸುಮಾರು 598 ಅಶ್ವಶಕ್ತಿ ಹಾಗೂ 880 ನ್ಯೂಟನ್ ಮೀಟರ್ ಟಾರ್ಕ್ ಉತ್ಪಾದಿಸುತ್ತದೆ. 9 ವೇಗದ ಸ್ವಯಂಚಾಲಿತ ಗೇರ್‌ ವ್ಯವಸ್ಥೆ ಹಾಗೂ ನಾಲ್ಕು ಚಕ್ರಗಳ ಚಾಲನಾ ವ್ಯವಸ್ಥೆಯನ್ನು ಹೊಂದಿದೆ.

ಕಾರಿನ ನಿಖರ ಭದ್ರತಾ ಸಾಮರ್ಥ್ಯವನ್ನು ರಹಸ್ಯವಾಗಿಡಲಾಗಿದೆ. ಆದರೆ ಹೆಚ್ಚಿನ ಸಾಮರ್ಥ್ಯದ ಗುಂಡುಗಳು ಹಾಗೂ ಕವಚ ಭೇದಕ ಗುಂಡುಗಳಿಂದಲೂ ರಕ್ಷಣೆ ನೀಡುವ ಸಾಮರ್ಥ್ಯ ಹೊಂದಿದೆ ಎಂದು ವರದಿಯಾಗಿದೆ. ಕಿಟಕಿಗಳಲ್ಲಿ ಹಲವು ಪದರಗಳ, ಹಲವು ಸೆಂಟಿಮೀಟರ್ ದಪ್ಪದ ಗುಂಡು ನಿರೋಧಕ ಗಾಜು ಬಳಸಲಾಗಿದೆ.

ಔರಸ್ ಸೆನಾಟ್‌ನಲ್ಲಿ ಗಾಳಿ ಹೊರಹೋದರೂ ಸಂಚರಿಸಬಹುದಾದ ವಿಶೇಷ ಟೈರ್‌ಗಳು, ಬಲಪಡಿಸಿದ ಇಂಧನ ಟ್ಯಾಂಕ್ ಹಾಗೂ ಸ್ಫೋಟಗಳಿಂದ ರಕ್ಷಣೆ ನೀಡುವ ಕೆಳಭಾಗದ ಕವಚವಿದೆ. ರಾಸಾಯನಿಕ ದಾಳಿ ಸಂಭವಿಸಿದ ಸಂದರ್ಭದಲ್ಲಿ ಪ್ರಯಾಣಿಕರಿಗೆ ನೆರವಾಗಲು ಸ್ವತಂತ್ರ ಆಮ್ಲಜನಕ ಹಾಗೂ ಗಾಳಿಶುದ್ಧೀಕರಣ ವ್ಯವಸ್ಥೆಯೂ ಇದೆ ಎಂದು ಹೇಳಲಾಗಿದೆ. ಅಗ್ನಿ ನಿಗ್ರಹ ವ್ಯವಸ್ಥೆಯನ್ನೂ ಅಳವಡಿಸಲಾಗಿದೆ.

ಕಾರಿನೊಳಗಿನಿಂದಲೇ ಪುಟಿನ್ ಅಧಿಕಾರಿಗಳೊಂದಿಗೆ ಸುರಕ್ಷಿತವಾಗಿ ಸಂಪರ್ಕದಲ್ಲಿರಲು ವಿಶೇಷ ಸಂಪರ್ಕ ವ್ಯವಸ್ಥೆ ಇದೆ. ಹಿಂಭಾಗದಲ್ಲಿ ಬಿಸಿ ಹಾಗೂ ತಂಪು ನಿಯಂತ್ರಣ ಹೊಂದಿರುವ ಮಸಾಜ್ ಆಸನಗಳು, ಪರದೆಗಳು, ಕೆಲಸದ ಮೇಜು, ಶೀತಲೀಕರಣ ಪೆಟ್ಟಿಗೆ ಹಾಗೂ ಗೌಪ್ಯತೆಗಾಗಿ ವಿಭಜಕ ವ್ಯವಸ್ಥೆ ಇದೆ.

ಸಾಮಾನ್ಯ ಔರಸ್ ಸೆನಾಟ್ ಕಾರಿನ ಬೆಲೆ ಸುಮಾರು 1.8 ಕೋಟಿ ರೂಬಲ್ಸ್‌, ಅಂದರೆ ಸುಮಾರು ₹2.5 ಕೋಟಿ. ಆದರೆ ಪುಟಿನ್ ಬಳಸುವ ಅಧ್ಯಕ್ಷೀಯ ಆವೃತ್ತಿಯಲ್ಲಿ ಹೆಚ್ಚುವರಿ ಭದ್ರತಾ ವ್ಯವಸ್ಥೆಗಳಿದ್ದು, ಇದನ್ನು ಸಾರ್ವಜನಿಕವಾಗಿ ಮಾರಾಟ ಮಾಡಲಾಗುವುದಿಲ್ಲ. ಈ ಕಾರಿಗೂ ಭಾರತದೊಂದಿಗೆ ನಂಟಿದೆ. ಕಳೆದ ವರ್ಷ ಚೀನಾದಲ್ಲಿ ನಡೆದ ಶಾಂಘೈ ಸಹಕಾರ ಸಂಘಟನೆಯ ಶೃಂಗಸಭೆಯ ಸಂದರ್ಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಪುಟಿನ್ ಅವರೊಂದಿಗೆ ಔರಸ್ ಸೆನಾಟ್‌ನಲ್ಲಿ ಪ್ರಯಾಣಿಸಿದ್ದರು.

ದೆಹಲಿಗೆ ಆಗಮಿಸಿದ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್; 24 ಗಂಟೆಗಳ ಭೇಟಿಗೆ ಅವರ ಭದ್ರತೆ ಹೇಗಿದೆ?

ಕ್ಸಿ ಜಿನ್‌ಪಿಂಗ್‌ರ ಹಾಂಗ್‌ಕಿ ಎನ್ 701

ಕ್ಸಿ ಜಿನ್‌ಪಿಂಗ್ ಅವರ ಅಧ್ಯಕ್ಷೀಯ ಕಾರು ಹಾಂಗ್‌ಕಿ ಎನ್ 701. ‘ಹಾಂಗ್‌ಕಿ’ ಎಂದರೆ ಚೀನೀ ಭಾಷೆಯಲ್ಲಿ ಕೆಂಪು ಧ್ವಜ ಎಂದರ್ಥ. ಚೀನಾದ ರಾಜಕೀಯ ನಾಯಕರಿಗಾಗಿ ವಾಹನಗಳನ್ನು ನಿರ್ಮಿಸಲು 1958ರಲ್ಲಿ ಈ ವಾಹನ ಬ್ರ್ಯಾಂಡ್ ಸ್ಥಾಪಿಸಲಾಯಿತು. ಆರಂಭಿಕ ಹಾಂಗ್‌ಕಿ ಕಾರುಗಳನ್ನು ಚೀನಾದ ಹಿರಿಯ ಕಮ್ಯುನಿಸ್ಟ್ ಪಕ್ಷದ ನಾಯಕರು ಹಾಗೂ ವಿದೇಶಿ ಗಣ್ಯರು ಬಳಸುತ್ತಿದ್ದರು. ನಂತರ ವಿದೇಶಿ ಐಷಾರಾಮಿ ವಾಹನಗಳ ಜನಪ್ರಿಯತೆ ಹೆಚ್ಚಾದ ಹಿನ್ನೆಲೆಯಲ್ಲಿ ಹಾಂಗ್‌ಕಿ ಬ್ರ್ಯಾಂಡ್‌ನ ಪ್ರಾಮುಖ್ಯತೆ ಕುಗ್ಗಿತ್ತು. ಬಳಿಕ ಅದನ್ನು ಚೀನಾದ ಪ್ರಮುಖ ಐಷಾರಾಮಿ ವಾಹನ ಬ್ರ್ಯಾಂಡ್ ಆಗಿ ಪುನರುಜ್ಜೀವನಗೊಳಿಸಲಾಯಿತು.

ಕ್ಸಿ ಜಿನ್‌ಪಿಂಗ್ ಅವರ ಅತ್ಯಂತ ಭದ್ರತೆಯ ಸಂಚಾರಕ್ಕೆ ಇದೀಗ ಹಾಂಗ್‌ಕಿ ಎನ್ 701 ಪ್ರಮುಖ ವಾಹನವಾಗಿದೆ. ಆದರೆ ಈ ಕಾರಿನ ಕುರಿತು ಚೀನಾ ಸರ್ಕಾರ ಅಧಿಕೃತವಾಗಿ ಹೆಚ್ಚಿನ ಮಾಹಿತಿಯನ್ನು ಬಹಿರಂಗಪಡಿಸಿಲ್ಲ. ಎನ್701 ಕಾರು 18 ಅಡಿಗಿಂತಲೂ ಹೆಚ್ಚು ಉದ್ದವಿದ್ದು, 3 ಟನ್‌ಗಿಂತ ಹೆಚ್ಚು ತೂಕ ಹೊಂದಿದೆ ಎಂದು ಅಂದಾಜಿಸಲಾಗಿದೆ. ಭಾರಿ ಕವಚ, ಗುಂಡು ನಿರೋಧಕ ಗಾಜು, ಬಲಪಡಿಸಿದ ದೇಹ, ಸ್ವತಂತ್ರ ಜೀವ ರಕ್ಷಣಾ ವ್ಯವಸ್ಥೆ ಹಾಗೂ ಸುರಕ್ಷಿತ ಸಂಪರ್ಕ ವ್ಯವಸ್ಥೆ ಹೊಂದಿದೆ ಎಂದು ವರದಿಯಾಗಿದೆ.

ಔರಸ್ ಸೆನಾಟ್‌ಗೆ ಹೋಲಿಸಿದರೆ ಎನ್ 701ರ ಮೂಲ ತಾಂತ್ರಿಕ ವಿವರಗಳೂ ರಹಸ್ಯವಾಗಿವೆ. ಇದರ ಎಂಜಿನ್, ಶಕ್ತಿ ಸಾಮರ್ಥ್ಯ ಹಾಗೂ ನಿಖರ ಗುಂಡು ನಿರೋಧಕ ಸಾಮರ್ಥ್ಯವನ್ನು ಚೀನಾ ಅಧಿಕೃತವಾಗಿ ಬಹಿರಂಗಪಡಿಸಿಲ್ಲ. ಈ ಅಧ್ಯಕ್ಷೀಯ ಕಾರುಗಳನ್ನು ಅತ್ಯಂತ ಸೀಮಿತ ಸಂಖ್ಯೆಯಲ್ಲಿ ಮಾತ್ರ ನಿರ್ಮಿಸಲಾಗುತ್ತದೆ. ಸಾಮಾನ್ಯ ಗ್ರಾಹಕರಿಗೆ ಖರೀದಿಸಲು ಇದು ಲಭ್ಯವಿಲ್ಲ.

ಹಾಂಗ್‌ಕಿ ಎಲ್ 5ಗೂ ಭಾರತದ ನಂಟು

ಹಾಂಗ್‌ಕಿ ಬ್ರ್ಯಾಂಡ್‌ನ ಮತ್ತೊಂದು ಪ್ರಮುಖ ಕಾರು ಎಲ್ 5ಗೂ ಭಾರತದೊಂದಿಗೆ ನೇರ ನಂಟಿದೆ. 2025ರಲ್ಲಿ ಟಿಯಾಂಜಿನ್‌ನಲ್ಲಿ ನಡೆದ ಶಾಂಘೈ ಸಹಕಾರ ಸಂಘಟನೆಯ ಶೃಂಗಸಭೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹಾಂಗ್‌ಕಿ ಎಲ್ 5 ಕಾರಿನಲ್ಲಿ ಪ್ರಯಾಣಿಸಿದ್ದರು. ಅದಕ್ಕೂ ಮೊದಲು 2019ರಲ್ಲಿ ಮಹಾಬಲಿಪುರಂನಲ್ಲಿ ನಡೆದ ಅನೌಪಚಾರಿಕ ಮಾತುಕತೆಗಾಗಿ ಭಾರತಕ್ಕೆ ಆಗಮಿಸಿದ್ದ ಕ್ಸಿ ಜಿನ್‌ಪಿಂಗ್ ಎಲ್ 5 ಕಾರನ್ನು ಬಳಸಿದ್ದರು.

ಎಲ್ 5 ಕಾರು 5.5 ಮೀಟರ್‌ಗಿಂತಲೂ ಹೆಚ್ಚು ಉದ್ದವಿದ್ದು, 3 ಟನ್‌ಗಿಂತ ಹೆಚ್ಚು ತೂಕ ಹೊಂದಿದೆ. ಇದರ ಒಂದು ಆವೃತ್ತಿಯಲ್ಲಿ 6.0 ಲೀಟರ್ ವಿ12 ಎಂಜಿನ್‌ ಇದ್ದು, 400 ಅಶ್ವಶಕ್ತಿಗಿಂತ ಹೆಚ್ಚಿನ ಸಾಮರ್ಥ್ಯ ಹೊಂದಿದೆ. ಗರಿಷ್ಠ ವೇಗ ಗಂಟೆಗೆ ಸುಮಾರು 210 ಕಿ.ಮೀ. ತಲುಪುತ್ತದೆ ಎಂದು ವರದಿಯಾಗಿದೆ.

ಕಾರಿನ ಒಳಭಾಗದಲ್ಲಿ ಚರ್ಮದ ಆಸನಗಳು, ಮರ ಹಾಗೂ ಜೇಡ್ ಅಲಂಕಾರ, ಬಿಸಿ ಮತ್ತು ತಂಪು ನಿಯಂತ್ರಣ ಹೊಂದಿರುವ ಮಸಾಜ್ ಆಸನಗಳು ಹಾಗೂ ಪ್ರತ್ಯೇಕ ಮನರಂಜನಾ ಪರದೆಗಳಿವೆ. ಇದರ ಬೆಲೆ ಸುಮಾರು 50 ಲಕ್ಷ ಯುವಾನ್‌, ಅಂದರೆ ಸುಮಾರು ₹7 ಕೋಟಿ ಎಂದು ಹೇಳಲಾಗಿದೆ.