Akshay Kumar: 4 ಕೋಟಿ ರೂ.ಗಿಂತ ಹೆಚ್ಚಿನ ಮೊತ್ತ ಬಾಕಿ: ಎಡ್‌ಟೆಕ್ ವಿರುದ್ಧ ನಟ ಅಕ್ಷಯ್ ಕುಮಾರ್ ಕಾನೂನು ಹೋರಾಟ

ಮುಂಬೈ: ಎಡ್‌ಟೆಕ್ ಸಂಸ್ಥೆಯ (Online edtech company Cue Learn Private Ltd) ವಿರುದ್ಧ ಬಾಲಿವುಡ್ ನಟ ಅಕ್ಷಯ್ ಕುಮಾರ್ (Actor Akshay Kumar) ಸಲ್ಲಿಸಿರುವ ದೂರು ಅರ್ಜಿಯ ವಿಚಾರಣೆಯನ್ನು ರಾಷ್ಟ್ರೀಯ ಕಂಪನಿ ಕಾನೂನು ಮೇಲ್ಮನವಿ ನ್ಯಾಯಮಂಡಳಿ (National Company Law Appellate Tribunal) ಕೈಗೆತ್ತಿಕೊಂಡಿದೆ. ಒಪ್ಪಂದದ ಪ್ರಕಾರ ಹಣ ಪಾವತಿ ಮಾಡದೆ ಸುಮಾರು 4 ಕೋಟಿ ರೂ. ಗಿಂತಲೂ ಹೆಚ್ಚಿನ ಬಾಕಿ ಇರಿಸಿರುವ ಎಡ್‌ಟೆಕ್ ಸಂಸ್ಥೆಯ ವಿರುದ್ಧ ಅಕ್ಷಯ್ ಕುಮಾರ್ ಸಲ್ಲಿಸಿದ ದೂರನ್ನು ಕೆಳ ನ್ಯಾಯಮಂಡಳಿಯು ವಜಾಗೊಳಿಸಿತ್ತು. ಆದರೆ ಇದೀಗ ರಾಷ್ಟ್ರೀಯ ಕಂಪನಿ ಕಾನೂನು ಮೇಲ್ಮನವಿ ನ್ಯಾಯಮಂಡಳಿ ಇದರ ವಿಚಾರಣೆಯನ್ನು ಆರಂಭಿಸಿದೆ.

ಅನುಮೋದನಾ ಒಪ್ಪಂದದ ಅಡಿಯಲ್ಲಿ ಸುಮಾರು 4.83 ಕೋಟಿ ರೂ.ಗಿಂತ ಹೆಚ್ಚಿನ ಪಾವತಿ ಬಾಕಿ ಇರುವುದಾಗಿ ಆನ್‌ಲೈನ್ ಎಡ್‌ಟೆಕ್ ಕಂಪನಿ ಕ್ಯೂ ಲರ್ನ್ ಪ್ರೈವೇಟ್ ಲಿಮಿಟೆಡ್ ವಿರುದ್ಧ ನಟ ಅಕ್ಷಯ್ ಕುಮಾರ್ ದೂರು ನೀಡಿದ್ದರು.

ಕೆಳ ಮಂಡಳಿಯು ಅಕ್ಷಯ್ ಕುಮಾರ್ ಅವರ ಅರ್ಜಿಯನ್ನು ವಜಾಗೊಳಿಸಿದ ಬಳಿಕ ರಾಷ್ಟ್ರೀಯ ಕಂಪನಿ ಕಾನೂನು ಮೇಲ್ಮನವಿ ನ್ಯಾಯಮಂಡಳಿಯ ನಿರ್ಧಾರ ಬಂದಿದ್ದು, ಅದನ್ನು ಪರಿಹರಿಸಲು ಕೆಳ ಮಂಡಳಿಯು ಅಧಿಕಾರ ವ್ಯಾಪ್ತಿಯನ್ನು ಹೊಂದಿಲ್ಲ ಎಂದು ತಿಳಿಸಿದೆ.

ದಿವಾಳಿತನ ಮತ್ತು ದಿವಾಳಿತನ ಸಂಹಿತೆ, 2016ರ ಸೆಕ್ಷನ್ 9ರ ಅಡಿಯಲ್ಲಿ 2021ರಲ್ಲಿ ಎಡ್-ಟೆಕ್ ಸಂಸ್ಥೆಯ ವಿರುದ್ಧ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿ ಮುಂದೆ ನಟ ಅಕ್ಷಯ್ ಕುಮಾರ್ ಅರ್ಜಿ ಸಲ್ಲಿಸಿದ್ದರು.

ಅವರು ತಮ್ಮ ಅರ್ಜಿಯಲ್ಲಿ ಒಪ್ಪಂದದಲ್ಲಿ ಒಪ್ಪಿಕೊಂಡ ಎಲ್ಲ ಜವಾಬ್ದಾರಿಗಳನ್ನು ತಾವು ಪೂರೈಸಿರುವುದಾಗಿ ತಿಳಿಸಿದ್ದಾರೆ. ಇದಕ್ಕಾಗಿ ಎಡ್ ಟೆಕ್ ಸಂಸ್ಥೆಯು ಅವರಿಗೆ ಮೊದಲ ಕಂತಿನಲ್ಲಿ 4.05 ಕೋಟಿ ರೂ. ಗಳನ್ನು ಪಾವತಿಸಿತ್ತು. ಆದರೆ ಇನ್‌ವಾಯ್ಸ್‌ಗಳನ್ನು ಸ್ವೀಕರಿಸದಿರುವುದು ಮತ್ತು ಒಪ್ಪಿಕೊಂಡ ದಿನಾಂಕಗಳಲ್ಲಿ ಪೂರೈಸದಿರುವ ಕಾರಣಗಳನ್ನು ಉಲ್ಲೇಖಿಸಿ ಎರಡನೇ ಪಾವತಿಯನ್ನು ಅದು ಮಾಡಿರಲಿಲ್ಲ ಎಂದು ಹೇಳಿದ್ದಾರೆ.

ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿಯ ದೆಹಲಿ ಪೀಠವು ಇದು ಐಬಿಸಿ ಅಧಿಕಾರ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಹೇಳಿ ನಟ ಅಕ್ಷಯ್ ಕುಮಾರ್ ಅವರ ಅರ್ಜಿಯನ್ನು ವಜಾಗೊಳಿಸಿತ್ತು.

ಇದನ್ನೂ ಓದಿ: Actor Umesh: ಮನೆಯಲ್ಲಿ ಜಾರಿಬಿದ್ದ ಸ್ಯಾಂಡಲ್‌ವುಡ್‌ ನಟ ಉಮೇಶ್‌ ಆರೋಗ್ಯ ಹೇಗಿದೆ? ಟೆಸ್ಟ್‌ ವೇಳೆ ಆಘಾತಕಾರಿ ವಿಚಾರ ರಿವೀಲ್‌

ಇದರ ಬಳಿಕ ನಟ ಅಕ್ಷಯ್ ಕುಮಾರ್ ಅವರ ವಕೀಲರು ಉನ್ನತ ಸಂಸ್ಥೆಗೆ ಮೇಲ್ಮನವಿ ಸಲ್ಲಿಸಿದರು. ಸೇವೆಗಳನ್ನು ಬಳಸಲಾಗಿದೆಯೇ ಅಥವಾ ಇಲ್ಲವೇ ಎಂಬುದನ್ನು ನೋಡದೆ ಎರಡನೇ ಕಂತಿನ ಪಾವತಿಯನ್ನುಅಕ್ಷಯ್ ಕುಮಾರ್ ಪಡೆಯಬೇಕಾಗಿತ್ತು. ಸಂಬಂಧಿತ ಷರತ್ತುಗಳಿಗೆ ಹೆಚ್ಚಿನ ಗಮನ ನೀಡದೆ ಕೆಳ ನ್ಯಾಯ ಮಂಡಳಿಯು ಅರ್ಜಿಯನ್ನು ತಿರಸ್ಕರಿಸಿದೆ ಎಂದು ಹೇಳಿದ್ದಾರೆ. ವಕೀಲರ ಸಾಕಷ್ಟು ಪ್ರಯತ್ನದ ಪರಿಣಾಮವಾಗಿ ರಾಷ್ಟ್ರೀಯ ಕಂಪನಿ ಕಾನೂನು ನ್ಯಾಯಮಂಡಳಿಯು ಅರ್ಜಿ ವಿಚಾರಣೆಯನ್ನು ಕೈಗೆತ್ತಿಕೊಂಡಿದೆ.