ʻನೀವು ಫಾರ್ಮ್‌ಗೆ ಮರಳಬೇಕೆಂದರೆ ನನ್ನ ಮಾತು ಕೇಳಿʼ: ಋತುರಾಜ್‌ ಗಾಯಕ್ವಾಡ್‌ಗೆ ಅಶ್ವಿನ್‌ ಎಚ್ಚರಿಕೆ!

ನವದೆಹಲಿ: ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) 2026ರ ಸಾಲಿನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡ ಸತತ ಎರಡು ಗೆಲುವುಗಳನ್ನು ಕಂಡಿರುವುದರಿಂದ ನಾಯಕ ಋತುರಾಜ್ ಗಾಯಕ್ವಾಡ್‌ (Ruturaj Gaikwad) ಮೇಲಿನ ಒತ್ತಡ ಕಡಿಮೆಯಾಗುತ್ತದೆ ಎಂದು ಭಾರತದ ಮಾಜಿ ಆಫ್ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ನಂಬಿದ್ದಾರೆ. ಇದಲ್ಲದೆ, ಫಾರ್ಮ್‌ನಲ್ಲಿಲ್ಲದ ಆರಂಭಿಕ ಆಟಗಾರನಿಗೆ ಇನಿಂಗ್ಸ್‌ ಪ್ರಾರಂಭಿಸುವಾಗ ತನ್ನ ವಿಧಾನದಲ್ಲಿ ಸ್ವಲ್ಪ ಹೊಂದಾಣಿಕೆ ಮಾಡಿಕೊಳ್ಳುವಂತೆ ಅವರು ಸಲಹೆ ನೀಡಿದರು. ಐದು ಬಾರಿ ಚಾಂಪಿಯನ್ಸ್‌ ಸಿಎಸ್‌ಕೆ ಆರಂಭದಲ್ಲಿ ಮೂರು ಸತತ ಸೋಲುಗಳನ್ನು ಅನುಭವಿಸಿತು ಆದರೆ ನಂತರ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ದ ಗೆಲ್ಲುವ ಮೂಲಕ ಅದ್ಭುತವಾಗಿ ಕಮ್‌ಬ್ಯಾಕ್‌ ಮಾಡಿದೆ.

"ನಾಯಕನಾಗಿ ಅವರು ಎರಡು ಗೆಲುವುಗಳನ್ನು ಗಳಿಸಿದ್ದಾರೆ, ಇದು ಅವರಿಗೆ ಹೆಚ್ಚು ನಿರಾಳತೆಯನ್ನು ಅನುಭವಿಸಲು ಸಹಾಯ ಮಾಡುತ್ತದೆ. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ನಾನು ಡಗೌಟ್‌ನಲ್ಲಿದ್ದರೆ ಅಥವಾ ನಾನು ಋತುರಾಜ್ ಗಾಯಕ್ವಾಡ್‌ ಆಗಿದ್ದರೆ, ನಾನು ಹೆಚ್ಚು ಕಾಳಜಿ ವಹಿಸುತ್ತಿರಲಿಲ್ಲ. ಟಿ20 ಸ್ವರೂಪವು ನೀವು ಸ್ಥಿರವಾಗಿ ಉದ್ದೇಶವನ್ನು ಪ್ರದರ್ಶಿಸಬೇಕಾದ ಒಂದು ಸ್ಥಳವಾಗಿದೆ," ಎಂದರು.

CSK vs KKR: ಸತತ ಐದನೇ ಬಾರಿ ವಿಫಲರಾದ ಋತುರಾಜ್‌ ಗಾಯಕ್ವಾಡ್‌ಗೆ ಸಂಕಷ್ಟ!

ಸಿಎಸ್‌ಕೆ ನಾಯಕ ರನ್ ಗಳಿಸಲು ಹೆಣಗಾಡುತ್ತಿದ್ದಾರೆ; ಅವರು ಐದು ಪಂದ್ಯಗಳಲ್ಲಿ ಕೇವಲ 63 ರನ್ ಗಳಿಸಲು ಸೀಮಿತರಾಗಿದ್ದಾರೆ. ಅವರ ಗರಿಷ್ಠ ಸ್ಕೋರ್ 28 ಆಗಿದೆ. ಅವರ ಯಶಸ್ಸಿನ ಕೊರತೆಯಿಂದಾಗಿ, ಯುವ ಆಯುಷ್ ಮ್ಹಾತ್ರೆ, ಸಂಜು ಸ್ಯಾಮ್ಸನ್ ಜೊತೆಗೆ ಇನಿಂಗ್ಸ್‌ ಆರಂಭಿಸಬಹುದು ಎಂಬ ಊಹಾಪೋಹಗಳು ಹೆಚ್ಚುತ್ತಿವೆ. ಪರಿಣಾಮವಾಗಿ, ಗಾಯಕ್ವಾಡ್ ಮೂರನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿಸುವ ಸಾಧ್ಯತೆ ಇದೆ.

ಋತುರಾಜ್‌ ಗಾಯಕ್ವಾಡ್‌ ವೈಫಲ್ಯಕ್ಕೆ ಕಾರಣ ತಿಳಿಸಿದ ಅಶ್ವಿನ್‌

ಗಾಯಕ್ವಾಡ್‌ ತಮ್ಮ ಇನಿಂಗ್ಸ್‌ನ ಆರಂಭಿಕ ಹಂತಗಳಲ್ಲಿ ಆಕ್ರಮಣಕಾರಿ ಹೊಡೆತಗಳನ್ನು ಆಡದಂತೆ ಆರ್ ಅಶ್ವಿನ್ ಸಲಹೆ ನೀಡಿದ್ದಾರೆ

"ಋತುರಾಜ್ ಗಾಯಕ್ವಾಡ್‌ ಅತಿಯಾಗಿ ಆಕ್ರಮಣಕಾರಿ ಹೊಡೆತಗಳನ್ನು ಆಡುತ್ತಿದ್ದಾರೆ ಮತ್ತು ಅಕಾಲಿಕವಾಗಿ ಔಟ್ ಆಗುತ್ತಿದ್ದಾರೆ. ಅವರು ತಮ್ಮ ಇನಿಂಗ್ಸ್‌ನ ಆರಂಭದಲ್ಲಿ ಸ್ವಲ್ಪ ಹೆಚ್ಚು ಶಾಂತತೆಯಿಂದ ಆಡಿದರೆ, ಚೆಂಡನ್ನು ಸರಿಯಾಗಿ ಸಮಯಕ್ಕೆ ತಕ್ಕಂತೆ ಮತ್ತು ಸಾಧ್ಯವಾದಷ್ಟು ನೆಲದಲ್ಲಿ ಹೊಡೆತಗಳನ್ನು ಆಡುವುದರ ಮೇಲೆ ಕೇಂದ್ರೀಕರಿಸಿದರೆ - ಅದು ಅವರ ಅನುಕೂಲಕ್ಕೆ ತಕ್ಕಂತೆ ಕೆಲಸ ಮಾಡಬಹುದು," ಎಂದು ಅವರು ಸಲಹೆ ನೀಡಿದ್ದಾರೆ.

CSK vs KKR: ಸತತ ನಾಲ್ಕನೇ ಪಂದ್ಯ ಸೋತ ಕೋಲ್ಕತಾ, ಚೆನ್ನೈ ಸೂಪರ್‌ ಕಿಂಗ್ಸ್‌ಗೆ ಎರಡನೇ ಜಯ!

ಸಂಜು ಸ್ಯಾಮ್ಸನ್‌ಗೆ ಡೇಲ್‌ ಸೇನ್‌ ಮೆಚ್ಚುಗೆ

ಇದರ ನಡುವೆ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸಂಜು ಸ್ಯಾಮ್ಸನ್ ಅವರ ಶತಕವು ಸಿಎಸ್‌ಕೆಗೆ ಹೊಸ ಜೀವ ತುಂಬಿದೆ ಎಂದು ದಕ್ಷಿಣ ಆಫ್ರಿಕಾದ ಮಾಜಿ ವೇಗದ ಬೌಲರ್ ಡೇಲ್ ಸ್ಟೇನ್ ನಂಬಿದ್ದಾರೆ. ಡೆಲ್ಲಿ ವಿರುದ್ಧ ಅಜೇಯ 115 ರನ್ ಗಳಿಸುವ ಮೂಲಕ ಸ್ಯಾಮ್ಸನ್ ಅದ್ಭುತವಾಗಿ ಕಮ್‌ಬ್ಯಾಕ್ ಮಾಡಿದರು, ನಂತರ ಕೆಕೆಆರ್ ವಿರುದ್ಧ 48 ರನ್ ಗಳಿಸಿದರು. ‌

ಈ ಬಗ್ಗೆ ಪ್ರತಿಕ್ರಿಯಿಸಿದ ಡೇಲ್‌ ಸ್ಟೇನ್‌, "ಅವರ ಆ ಶತಕವು ಡ್ರೆಸ್ಸಿಂಗ್ ಕೊಠಡಿಯ ವಾತಾವರಣವನ್ನು ಸಂಪೂರ್ಣವಾಗಿ ಪರಿವರ್ತಿಸಿತು. ಇದು ತಂಡಕ್ಕೆ ಹೊಸ ಶಕ್ತಿಯನ್ನು ತುಂಬಿತು, ತಂಡವನ್ನು ಗೆಲುವಿನ ಹಾದಿಯಲ್ಲಿ ಮತ್ತೆ ಇರಿಸಿತು," ಎಂದು ಹೇಳಿದರು.

"ಐಪಿಎಲ್ ಪಂದ್ಯ ಗೆಲ್ಲುವುದು ನಿಜಕ್ಕೂ ಕಷ್ಟ. ಕೆಲವೊಮ್ಮೆ ಗೆಲುವು ಕೈಗೆಟುಕುವ ದೂರದಲ್ಲಿ ಕಾಣುತ್ತದೆ, ಆದರೂ ನೀವು ಸೋಲುತ್ತೀರಿ. ಆದ್ದರಿಂದ, ಒಮ್ಮೆ ಗೆಲುವು ಖಚಿತವಾದರೆ, ತಂಡದ ಆತ್ಮವಿಶ್ವಾಸ ಗಮನಾರ್ಹವಾಗಿ ಹೆಚ್ಚಾಗುತ್ತದೆ," ಎಂದು ಅವರು ತಿಳಿಸಿದ್ದಾರೆ.