Rangaswamy Mookanahalli Column: ಜಪಾನ್‌ ಅದ್ಭುತ, ಆದರೆ ಅದಕ್ಕೂ ಇದೆ ಸಂಕಷ್ಟ !

ವಿಶ್ವರಂಗ

ರಂಗಸ್ವಾಮಿ ಮೂಕನಹಳ್ಳಿ

ಇನ್ನು ಕೆಲವರು ಆನ್ಲೈನ್ ಪೋರ್ನೋಗ್ರಫಿಗೆ ಅಡಿಕ್ಟ್ ಆಗಿದ್ದಾರೆ. ಇನ್ನು ಕೆಲವರು ತಮ್ಮ ಲೈಂಗಿಕ ಭಾವನೆಗಳನ್ನ ಪೂರ್ಣಗೊಳಿಸಿಕೊಳ್ಳಲು ಹೆಣ್ಣುರೋಬೋಟ್‌ಗಳ ಮೊರೆ ಹೋಗಿದ್ದಾರೆ. ಮಕ್ಕಳು ಮಾಡಿಕೊಳ್ಳಲು ಸೇರುವ ಹೆಣ್ಣು-ಗಂಡಿನ ಸಂಖ್ಯೆ ಜಪಾನಿನಲ್ಲಿ ತೀವ್ರಗತಿಯಲ್ಲಿ ಕುಸಿಯುತ್ತಿದೆ.

ತಂತ್ರಜ್ಞಾನ ಅಥವಾ ಟೆಕ್ನಾಲಜಿ ಎನ್ನುವ ಪದ ಇಂದು ಅತ್ಯಂತ ಹೆಚ್ಚು ಮಹತ್ವದ ಮತ್ತು ಹೆಚ್ಚು ಚಾಲ್ತಿಯಲ್ಲಿರುವ ಪದ. ಟೆಕ್ನಾಲಜಿ ನಾವು ಬದುಕುವ ರೀತಿಯನ್ನೇ ಬದಲಿಸಿಬಿಟ್ಟಿದೆ ಎನ್ನುವುದು ಕೂಡ ಅಷ್ಟೇ ಮಹತ್ವದ್ದು. ತಂತ್ರಜ್ಞಾನ ಎಂದರೆ ಜಪಾನ್ ದೇಶದ ಹೆಸರು ಹೇಳದೆ ಮುಂದೆ ಹೋಗು ವಂತೆಯೇ ಇಲ್ಲ! ಜಪಾನಿಯರ ಶಿಸ್ತು, ದೇಶಭಕ್ತಿ, ವರ್ಕ್ ಎಥಿಕ್ಸ್ ವಿಶ್ವದಲ್ಲಿ ಮನೆಮಾತಾಗಿದೆ. ಹನ್ನೆರೆಡು ಕೋಟಿ ನಲವತ್ತೈದು ಲಕ್ಷ ಜನಸಂಖ್ಯೆ ಯ ಈ ಪುಟ್ಟ ದೇಶ ಎರಡನೇ ಮಹಾಯುದ್ಧದಲ್ಲಿ ಅಣುಬಾಂಬಿಗೆ ತುತ್ತಾಗಿ ಜರ್ಝರಿತವಾಗಿದ್ದು ನಂತರದ ದಿನಗಳಲ್ಲಿ ವಿಶ್ವವೇ ತನ್ನೆಡೆಗೆ ತಿರುಗಿ ನೋಡುವಂತೆ ಬೆಳೆದು ನಿಂತದ್ದು ಎಲ್ಲಕ್ಕೂ ಮುಖ್ಯ ಚೀನಾ ಎನ್ನುವ ದೈತ್ಯ ಶಕ್ತಿಯ ಮುಂದೆ ಗಾತ್ರದಲ್ಲಿ ಲೆಕ್ಕವಿಲ್ಲ ಎನ್ನುವಂತಿದ್ದೂ ಚೀನಾಕ್ಕೆ ತಲೆ ಬಾಗದೆ ನಿಂತಿರುವುದು ಹೀಗೆ ಒಂದೇ ಎರಡೇ ಜಪಾನ್‌ಗೆ ಜಪಾನೇ ಸಾಟಿ.

ನಮ್ಮಲ್ಲಿ ಅತಿಯಾದರೆ ಅಮೃತವೂ ವಿಷ ಎನ್ನುವ ಒಂದು ಗಾದೆ ಮಾತಿದೆ, ತಂತ್ರಜ್ಞಾನದ ವಿಷಯದಲ್ಲಿ ಜಪಾನಿಗೆ ಈ ಮಾತು ಅನ್ವಯಿಸಬಹುದೇನೋ? ವಿಶ್ವದೆದುರು ತನ್ನ ಇರುವಿಕೆಯನ್ನ ಮತ್ತು ತನ್ನ ಮಹತ್ವವವನ್ನ ತೋರಿಸಲು ಸತತ ಪರಿಶ್ರಮದಿಂದ ನಡೆದ ಜಪಾನ್ ಮುಂದಿನದಿನಗಳು ಹೇಗಿರಬಹುದು? ಜಗತ್ತು ನಿಬ್ಬೆರಗಾಗಿ ನೋಡುವಂತ ಸಾಧನೆ ಮಾಡಿದ ಜಪಾನ್ ಎನ್ನುವ ದೇಶದ ಓಟಕ್ಕೆ ಕಡಿವಾಣ ಹಾಕುತ್ತಿರುವವಿಷಯಗಳೇನು ಎನ್ನುವುದರ ಬಗ್ಗೆ ಒಂದಷ್ಟು ಗಮನ ಹರಿಸೋಣ.

ಡಿಫ್ಲೆಷನ್ ಮತ್ತು ಇನ್ಲೇಶನ್ ನಡುವೆ ನೆಡೆದಿದೆ ಸೆಣಸಾಟ: ಡಿಫ್ಲೆಷನ್ ಎನ್ನುವುದು ಇನ್ಲೇಶನ್‌ಗೆ ವಿರುದ್ಧವಾದದ್ದು. ಇನ್ಲೇಶನ್ ಅನ್ನು ಹಣದುಬ್ಬರ ಎನ್ನುತ್ತವೆ. ಡಿಫ್ಲೆಷನ್ ಎಂದರೆ ಹಣದ ಕುಸಿತ ಎನ್ನಬಹುದು. ಸರಳವಾಗಿ ಹೇಳಬೇಕೆಂದರೆ ಸಮಾಜದಲ್ಲಿನ ಸರಕು ಮತ್ತು ಸೇವೆಯಮೇಲಿನ ಬೆಲೆ ಕಡಿಮೆಯಾಗುತ್ತಾ ಹೋಗುವ ಪ್ರಕ್ರಿಯೆಗೆ ಡಿಫ್ಲೆಷನ್ ಎನ್ನುತ್ತೇವೆ. ಉದಾಹರಣೆ ನೋಡಿ ವರ್ಷದ ನಂತರ ಭಾರತದಂತಹದೇಶದಲ್ಲಿ ಹಾಲಿನ ಬೆಲೆ 30 ರುಪಾಯಿ ಇದದ್ದು 32 ಅಥವಾ 35 ಆಗುತ್ತೆ ಆದರೆ ಜಪಾನ್‌ನಲ್ಲಿ ಹಾಲಿನ ಬೆಲೆ ಏರುವ ಬದಲು ಕುಸಿಯುತ್ತೆ. ಈಉದಾಹರಣೆಯನ್ನ ಸಮಾಜದ ಇತರ ಸರಕು ಮತ್ತು ಸೇವೆಗೂ ಅಳವಡಿಸಿಕೊಳ್ಳಿ. ಸಮಾಜ ಅಭಿವೃದ್ಧಿ ಪಥದಲ್ಲಿ ಸಾಗಲು ಒಂದು ಮಟ್ಟದ ಇನ್ಲೇಶನ್ ಅಗತ್ಯ. ನೀವು ಕೂಡಿಟ್ಟ ಹಣಕ್ಕೆ ಬಡ್ಡಿಯೇ ಇಲ್ಲ! ನೀವು ಸಾಲದಲ್ಲಿ ಕಾರು ಕೊಂಡರೆ ಅದಕ್ಕೂ ಬಡ್ಡಿಯಿಲ್ಲ. ಇತ್ತೀಚೆಗಂತೂ ನೆಗೆಟಿವ್ ಇಂಟರೆಸ್ಟ್ ಹಾವಳಿ ಬೇರೆ ಇಲ್ಲಿ ಹೆಚ್ಚಾಗಿದೆ. ಅಂದರೆ ಕಾರಿನ ಬೆಲೆ ಹತ್ತು ಸಾವಿರ ಎಂದುಕೊಳ್ಳಿ ಕಾರು‌ ಮಾರುವ ಸಂಸ್ಥೆ ಗ್ರಾಹಕರಿಗೆ ಕಾರು ಕೊಳ್ಳಲು ಪ್ರೇರೇಪಿಸಿ ವರ್ಷದ ನಂತರ 9800 ಕೊಟ್ಟರೆ ಸಾಕು ಎನ್ನುತ್ತದೆ!

ಇನ್ನೂ ಸರಳವಾಗಿ ಹೇಳಬೇಕೆಂದರೆ ಇದು ಸಕ್ಕರೆ ಕಾಯಿಲೆ ಇದ್ದಂತೆ. ಸಕ್ಕರೆ ಅಂಶ ತುಂಬಾ ಹೆಚ್ಚಾದರೆ ಆರೋಗ್ಯಕ್ಕೆ ತೊಂದರೆ. ತುಂಬಾ ಕಡಿಮೆಯಾದರೂ ಜೀವ ಹೋಗುವ ಅಪಾಯ ಇರುತ್ತದೆ. ದೇಹಕ್ಕೆ ಸಕ್ಕರೆ ಖಾಯಿಲೆ ಇದ್ದಂತೆ ದೇಶಕ್ಕೆ ಇನ್ಲೇಶನ್ ಮತ್ತು ಡಿಫ್ಲೆಷನ್. ಇವೆರಡರ ನಡುವಿನ ಸಮತೋಲನ ಮಾತ್ರ ದೇಶದ ಆರ್ಥಿಕತೆ ಜೊತೆಜೊತೆಗೆ ಮಿಕ್ಕೆಲ್ಲ ವಿಷಯಗಳನ್ನು ಸುಸ್ಥಿತಿಯಲ್ಲಿಡುತ್ತದೆ.

ಸದ್ಯಕ್ಕೆ ಜಪಾನ್ ಡಿಫ್ಲೆಷನ್ನಿಂದ ಹೊರಬರುತ್ತಿದೆ. ಮತ್ತೆ ಏರುಗತಿಯತ್ತ ಸಾಗುತ್ತಿದೆ. ಆದರೆ ಹಿಂದಿನ ವೇಗ ಇಲ್ಲದಿರುವುದು ಕಾಣಬಹುದು.ಜಪಾನ್ ದೇಶದ ಡೊಮೆಸ್ಟಿಕ್ ಬೇಡಿಕೆ ನಿಧಾನವಾಗಿ ಹೆಚ್ಚುತ್ತಿದೆ. ಕರೋನ ಕಾಲಘಟ್ಟದಲ್ಲಿ ಅಮೆರಿಕ ದೇಶದಂತೆ ಜಪಾನ್ ಕೂಡ ಹಣವನ್ನುಮುದ್ರಿಸಿದ ಕಾರಣ ಇಲ್ಲಿ ವಸ್ತುಗಳ ಬೆಲೆ ಗಗನವನ್ನು ಮುಟ್ಟುತ್ತಿದೆ. ಒಂದು ಲೀಟರ್ ಹಾಲಿನ ಬೆಲೆ 300 ಯೆನ್ ಎನ್ನುವುದು ಸ್ಥಳೀಯರಿಗೆ ಅಗರಿಸಿಕೊಳ್ಳಲು ಆಗುತ್ತಿಲ್ಲ. ಹೀಗಿದ್ದೂ ಇಲ್ಲಿನ ಬಡ್ಡಿ ದರ 0.1 ರಿಂದ 0.25 ಎನ್ನುವುದು ಜಪಾನ್ ಡಿಫ್ಲೆಷನ್ ಮತ್ತು ಇನ್ಲೇಶನ್ ನಡುವೆ ಅಂತರ ಕಾಪಿಟ್ಟುಕೊಳ್ಳಲು ಸೆಣಸಾಡುತ್ತಿರುವುದು ಗೊತ್ತಾಗುತ್ತದೆ.

ಮುದಿತನ ಎನ್ನುವ ಮಹಾ ಸಮಸ್ಯೆ: ಜಪಾನ್ ದೇಶ ವೇಗವಾಗಿ ಮುದಿತನದತ್ತ ಸಾಗುತ್ತಿದೆ. ಸದ್ಯಕ್ಕೆ ಕೆಲಸ ಮಾಡುವರು ಹತ್ತು ಜನರಿದ್ದರೆ ಏಳು ಜನ ನಿವೃತ್ತರು ಇದ್ದಾರೆ ಎಂದರೆ ಅಲ್ಲಿನ ಸಮಸ್ಯೆಯ ಬಿಸಿ ನಿಮಗೆ ತಿಳಿದೀತು. ಇಲ್ಲವಾದರೆ ಒಂದು ಸಣ್ಣ ಉದಾಹರಣೆ ಗಮನಿಸಿ ಆಗ ಸಮಸ್ಯೆಯ ಅಗಾಧತೆ ನಿಮ್ಮದಾಗುತ್ತೆ. ಒಬ್ಬ ನಿವೃತ್ತನಿಗೆ ಪಿಂಚಣಿ ಕೊಡಲು ಕನಿಷ್ಠ ನಾಲ್ಕು ಜನ ಕೆಲಸ ಮಾಡಬೇಕು. ಅಂದರೆ ಏಳು ಜನ ನಿವೃತ್ತರಿಗೆ ಪಿಂಚಣಿ ಕೊಡಲು 32 ಜನ ಕೆಲಸ ಮಾಡುತ್ತಿರಬೇಕು. ಆದರೆ ಜಪಾನಿನಲ್ಲಿ 32 ರ ಬದಲು ಕೆಲಸ ಮಾಡುತ್ತಿರುವರ ಸಂಖ್ಯೆ ಕೇವಲ ಹತ್ತು! ಈ ಅನುಪಾತದಲ್ಲಿ ಜಪಾನ್ ಎಷ್ಟು ದಿವಸ ತನ್ನ ನಿವೃತ್ತರಿಗೆ ಪಿಂಚಣಿ ಕೊಡಬಹುದು? ಹಡಗಿನಲ್ಲಿ ನೀರು ತುಂಬುತ್ತಿದೆ. ಇಂದಲ್ಲ ನಾಳೆ ಹಡಗು ಮುಳುಗದೆ ಇದ್ದೀತೆ? 13 ಕೋಟಿ 45 ಲಕ್ಷ ಜನಸಂಖ್ಯೆಯಲ್ಲಿ ಹತ್ತಿರತ್ತಿರ ಒಂದೂವರೆ ಕೋಟಿಯಷ್ಟು ಜನ ತನ್ನ ವಿರುದ್ಧ ಲಿಂಗದ ಬಗ್ಗೆ ಯಾವುದೇ ಆಕರ್ಷಣೆ ಹೊಂದಿಲ್ಲ. ಅಂದರೆ ಹುಡುಗನಿಗೆ ಹುಡುಗಿಯ ನೋಡಿ ಯಾವುದೇ ಭಾವನೆ ಬರುವುದೇ ಇಲ್ಲ. ಹುಡುಗಿಯರಿಗೂ ಹುಡುಗನ ಬಗ್ಗೆ ಯಾವುದೇ ಭಾವನೆಯಿಲ್ಲ!

ಮೂರು ಕೋಟಿ ನಲವತ್ತು ಲಕ್ಷ ಜನ ಹಿರಿಯ ನಾಗರಿಕರು. ಹೀಗಾಗಿ ಹದಿಮೂರೂವರೆ ಕೋಟಿಯಲ್ಲಿ ಐದು ಕೋಟಿಗೂ ಮೀರಿದ ಜನ ಮಕ್ಕಳುಮಾಡಿಕೊಳ್ಳುವ ಸ್ಥಿತಿಯಲ್ಲಿಲ್ಲ. ಉಳಿದ ಜಪಾನಿಯರ ಕಥೆ ಕೇಳಿದರೆ ದಂಗಾಗಬಹುದು. ಇವರಲ್ಲಿ ಒಂದಷ್ಟು ಜನರದು ಉಡಾಫೆ ಬುದ್ಧಿಇವರಿಗೆ ಮನೆ ಮಕ್ಕಳು ಸಂಸಾರ ಬೇಕಿಲ್ಲ. ಇವರದ್ದೇನಿದ್ದರೂ ಒಂದು ರಾತ್ರಿಯಲ್ಲಿ ಮುಗಿಯುವ ಸಂಬಂಧ. ನಾಳೆ ಹೊಸ ಬದುಕು. ಇನ್ನುಕೆಲವರು ಆನ್ಲೈನ್ ಪೋರ್ನೋಗ್ರಫಿಗೆ ಅಡಿಕ್ಟ್ ಆಗಿದ್ದಾರೆ. ಇನ್ನು ಕೆಲವರು ತಮ್ಮ ಲೈಗಿಂಕ ಭಾವನೆಗಳನ್ನ ಪೂರ್ಣಗೊಳಿಸಿಕೊಳ್ಳಲು ಹೆಣ್ಣುರೋಬೋಟ್‌ಗಳ ಮೊರೆ ಹೋಗಿದ್ದಾರೆ. ಇವೆಲ್ಲವುಗಳ ಮೀರಿ ಉಳಿದ ಸಾಮಾನ್ಯರು ಎನಿಸಿಕೊಂಡ ಜನರಲ್ಲೂ ಹಲವು ಲೈಂಗಿಕ ದೌರ್ಬಲ್ಯ ಗಳಿವೆ. ಮಕ್ಕಳು ಮಾಡಿಕೊಳ್ಳಲು ಸೇರುವ ಹೆಣ್ಣು-ಗಂಡಿನ ಸಂಖ್ಯೆ ಜಪಾನಿನಲ್ಲಿ ತೀವ್ರಗತಿಯಲ್ಲಿ ಕುಸಿಯುತ್ತಿದೆ. ಟೆಕ್ನಾಲಜಿ ಇವರ ಯುವ ಜನತೆಯನ್ನ ಯಾವ ಮಟ್ಟಕ್ಕೆ ಹಾಳುಗೆಡವಿದೆ ಅನ್ನುವುದಕ್ಕೆ ಇದೊಂದು ಅತ್ಯುತ್ತಮ ಉದಾಹರಣೆ. ಟೆಕ್ನಾಲಜಿಯನ್ನು ಬರೆಸೆಳೆದುಅಪ್ಪಿಕೊಳ್ಳುತ್ತಿರುವ ಭಾರತದಂತ ದೇಶಕ್ಕೆ ಇದು ಎಚ್ಚರಿಕೆಯ ಕರೆಘಂಟೆ. 2050 ರ ವೇಳೆಗೆ ಜಪಾನ್ ದೇಶದ ಜನಸಂಖ್ಯೆ 8.5 ಕೋಟಿಯಿಂದ 10 ಕೋಟಿ ಇರುವ ಅಂದಾಜು ಇದೆ. ಅಂದರೆ 2024 ರಲ್ಲಿ ಇರುವ ಜನಸಂಖ್ಯೆಗಿಂತ ಕನಿಷ್ಠ ಎರಡೂವರೆ ಕೋಟಿ ಜನ ಕಡಿಮೆಯಾಗಲಿದ್ದಾರೆ.

ಭಾರತಕ್ಕೆ ವಿಫಲ ಅವಕಾಶದ ಬಾಗಿಲು: ಜಪಾನಿನಲ್ಲಿ ವಲಸಿಗರು ಇಲ್ಲವೇ ಇಲ್ಲ ಎನ್ನುವಷ್ಟು ಗೌಣ! ಹೌದು ಜಪಾನಿನಲ್ಲಿ ವಲಸಿಗರ ಸಂಖ್ಯೆ ಎರಡು ಪ್ರತಿಶತಕ್ಕಿಂತ ಬಹಳ ಕಡಿಮೆ ಇದೆ. ಇದಕ್ಕೆ ಕಾರಣ ಜಪಾನಿಯರು ಎಷ್ಟೇ ಕೆಲಸದಲ್ಲಿ ದಕ್ಷರಾಗಿದ್ದರೂ ಕೇವಲ ಜಪಾನೀ ಭಾಷೆಯನ್ನ ಬಿಟ್ಟು ಇತರ ಭಾಷೆ ಕಲಿಯದೇ ಜಗತ್ತಿನ ಇತರ ದೇಶಗಳೊಂದಿಗೆ ಹೆಚ್ಚು ಸಂವಹನ ನಡೆಸದೆ ಇದದ್ದು. ಜಪಾನಿನ ಇಂದಿನ ಸಮಸ್ಯೆ ಬಗೆ ಹರಿಸಲು ವಲಸೆ ಅತ್ಯಂತ ಅವಶ್ಯಕ.

ಜಪಾನ್ ದೇಶದಲ್ಲಿ ಹೆಚ್ಚಿನ ವ್ಯಾಸಂಗಕ್ಕೆ ಹೋಗುವ ಭಾರತೀಯ ವಿದ್ಯಾರ್ಥಿಗಳು ಸಂಖ್ಯೆ ಹೆಚ್ಚಾಗುತ್ತಿದೆ. ಅಲ್ಲದೇ ಜಪಾನ್ ಈ ವರ್ಷ ಅಂದರೆ 2024 ರಿಂದ ವಲಸೆ ನೀತಿಯನ್ನು ಬದಲಿಸಿದೆ. ಹೀಗಾಗಿ ಇಲ್ಲಿಗೆ ಕೆಲಸ ಮಾಡಲು ಕೂಡ ಜನ ಬರಬಹುದು. ಎರಡನೇ ಮಹಾಯುದ್ಧದ ನಂತರ ಪ್ರಥಮ ಬಾರಿಗೆ ಜಪಾನ್ ಬೇರೆ ದೇಶದ ಜನರಿಗೆ ತನ್ನ ಬಾಗಿಲನ್ನು ತೆರಿದಿದೆ. ಹೀಗಾಗಿ ಭಾರತೀಯರು ಇದರ ಉಪಯೋಗವನ್ನು ಪಡೆದುಕೊಳ್ಳಬಹುದು.

ಮಕ್ಕಳ ಡೈಪರ್‌ಗಿಂತ ಹಿರಿಯ ಡೈಪರ್‌ಗಳೇ ಹೆಚ್ಚು: ಜಪಾನ್‌ನಲ್ಲಿ ಮಕ್ಕಳ ಡೈಪರ್‌ಗಿಂತ ಹಿರಿಯ ನಾಗರಿಕರ ಡೈಪರ್ ಮಾರಾಟದ ಸಂಖ್ಯೆಹೆಚ್ಚಾಗಿದೆ ಎನ್ನುತ್ತದೆ ಅಂಕಿಅಂಶ. ಜಪಾನಿನ ಯುವಜನತೆಯ ಸಂತಾನೋತ್ಪತ್ತಿಯಲ್ಲಿ ಆಸಕ್ತಿ ಇಲ್ಲದಿರುವುದನ್ನು ಇದು ಪುಷ್ಟಿಕರಿಸುತ್ತಿದೆ. ಅತಿಶಿಸ್ತು, ರೋಬಾಟ್ ರೀತಿಯ ಬದುಕು, ಹೆಚ್ಚಿನ ಕೆಲಸದ ಅವಧಿ ಯುವ ಜನತೆಯನ್ನು ಮಕ್ಕಳು ಮಾಡಿಕೊಳ್ಳಲು ತಡೆಯುತ್ತಿರುವ ಅಂಶಗಳು.ಇದೆ ಬದುಕನ್ನು ಬದುಕಲು ಇನ್ನೊಂದು ಜೀವವನ್ನು ನಾವೇಕೆ ಭೂಮಿಗೆ ತರಬೇಕು ಎನ್ನುವರ ಸಂಖ್ಯೆ ಒಂದಷ್ಟು. ಇರುವ ಜೀವನವನ್ನು ಮೋಜಿನಿಂದ ಕಳೆದು ಹೋಗಬೇಕು, ಇಲ್ಲದ ಜವಾಬ್ದಾರಿ ಬೇಡ ಎನ್ನುವುದು ಹಲವರ ನಿಲುವು.

ಸಾಯುವವರೆಗೂ ದುಡಿಯುತ್ತಲೇ ಇರಬೇಕು: ಯುವಕರ ಸಂಖ್ಯೆ ಕಡಿಮೆ ಇರುವ ಕಾರಣ ನಿವೃತ್ತಿ ಹೊಂದಿದವರು ಸಹ ಕೆಲಸ ಮಾಡದೇಬೇರೆ ದಾರಿಯಿಲ್ಲ ಎನ್ನುವಂತಾಗಿದೆ. ಹೆಸರಿಗೆ ಇಲ್ಲಿ ನಿವೃತ್ತಿ ವಯಸ್ಸು 60, ಆದರೆ ನೀವು ಜಪಾನ್ ದೇಶಕ್ಕೆ ಭೇಟಿ ಕೊಟ್ಟರೆ ಅಲ್ಲಿ 70, 75,80 ವರ್ಷ ಮತ್ತು ಅದಕ್ಕೂ ಹೆಚ್ಚಿನ ವಯೋಮಾನದವರು ದುಡಿಯುತ್ತಿರುವುದನ್ನು ನೀವು ಕಾಣಬಹುದು. ಇದಕ್ಕೆ ಯುವಕರ ಸಂಖ್ಯೆ ಒಂದು ಕಾರಣವಾದರೆ, ಸಿಗುವ ನಿವೃತ್ತಿ ವೇತನ ದಿಂದ ಬದುಕು ಸಾಗಿಸಲಾಗದ ಖರ್ಚು ಅಲ್ಲಿದೆ. ದುಡಿಯುವ ಮತ್ತು ನಿವೃತ್ತರ ನಡುವಿನ ಅಂತರದ ಕಾರಣದಿಂದ ಪಬ್ಲಿಕ್ ಡೆಟ್ ಹೆಚ್ಚಾಗಿದೆ. ಜಪಾನಿನ ಜಿಡಿಪಿ 100 ಅಂದು ಕೊಂಡರೆ ಪಬ್ಲಿಕ್ ಡೆಟ್ ಜಿಡಿಪಿಯ 240 ಪ್ರತಿಶತ ಎನ್ನುವುದು ಆತಂಕಕಾರಿ ಅಂಶ. ಇದು ಇಂದಿನ ಅಂಕಿ ಅಂಶ ಮುಂಬರುವ ದಿನಗಳಲ್ಲಿ ಇದು ಹೆಚ್ಚಾಗುತ್ತಾ ಹೋಗುತ್ತದೆ.

ಹೆಚ್ಚಾಗುತ್ತಿದೆ ಫೇಕ್ ಮಿಸ್ಸಿಂಗ್ ಸಂಖ್ಯೆಬದುಕಿನಲ್ಲಿ ಬೇಸತ್ತು ತಮ್ಮ ಗುರುತನ್ನು ಬದಲಿಸಕೊಳ್ಳಲು ಪ್ರತಿ ವರ್ಷ ಹತ್ತಿರತ್ತಿರ ಲಕ್ಷ ಜಪಾನಿಯರು ಬಯಸುತ್ತಾರೆ, ಮತ್ತು ಇದಕ್ಕೆ ಸಹಾಯ ಮಾಡಲು ಕೂಡ ಜಪಾನ್‌ನಲ್ಲಿ ಸಂಸ್ಥೆಗಳು ಹುಟ್ಟಿಕೊಂಡಿವೆ ಎನ್ನುವುದು ಇನ್ನೊಂದು ಮಹಾಸಮಸ್ಯೆಯನ್ನು ಎತ್ತಿ ತೋರಿಸುತ್ತಿದೆ. ಎರಡನೇ ಮಹಾಯುದ್ಧನ ಸೋಲಿನ ಹೊಡೆತದ ನಂತರ ಜಿಗಿದೆದಿದ್ದ ಜಪಾನ್ 2010 ರ ವರೆಗೆ ತನ್ನ ಓಟವನ್ನ ಮುಂದುವರಿಸಿತ್ತು. ಚೀನಾ ಒಳಗೊಂಡು ಜಗತ್ತಿಗೆ ಜಗತ್ತೇ ಆರ್ಥಿಕವಾಗಿ ಕೆಂಗೆಟ್ಟಿದ್ದು ಸಹಜವಾಗೇ ಜಪಾನಿನ ಓಟಕ್ಕೆ ಬ್ರೇಕ್ ಹಾಕಿತ್ತು. ಬಾಹ್ಯ ಕಾರಣದ ಜೊತೆಜೊತೆಗೆ ಆಂತರಿಕ ಕಾರಣ ಜಪಾನ್ ದೇಶದ ಓಟಕ್ಕೆ ಕಡಿವಾಣ ಹಾಕಿದೆ. ತನ್ನ ಸಮಸ್ಯೆಗಳಿಗೆ ತಕ್ಷಣ ಉತ್ತರ ಕಂಡುಕೊಳ್ಳಬೇಕಿದೆ. ಈ ನಿಟ್ಟಿನಲ್ಲಿ ಜಪಾನ್ ಜಗತ್ತಿಗೆ ತೆರೆದುಕೊಳ್ಳುವುದು ಅಂದರೆ ವಲಸಿಗರನ್ನು ತನ್ನ ದೇಶಕ್ಕೆ ಬಿಟ್ಟು ಕೊಳ್ಳುವುದು ಮಾಡಬೇಕಾದ ಕೆಲಸ.

ಹಾಗೊಮ್ಮೆ ಜಪಾನ್ ವಲಸಿಗರಿಗೆ ತೆರೆದುಕೊಂಡರೆ ಜಪಾನ್ ಇಂದಿನ ಜಪಾನ್ ಆಗಿ ಉಳಿಯಲಿದೆಯೇ? ಅವರ ಸಮಯಪಾಲನೆ, ಶಿಸ್ತು, ವರ್ಕ್ ಎಥಿಕ್ಸ್ ಮಾಯವಾಗುವುದಿಲ್ಲವೇ? ಹತ್ತು ದಿನದ ಜಪಾನ್ ಪ್ರವಾಸದಲ್ಲಿ ನನ್ನ ಗ್ರಹಿಕೆಗೆ ಸಿಕ್ಕ ಸಮಸ್ಯೆಗಳನ್ನು ಪಟ್ಟಿ ಮಾಡಿದ್ದೇನೆ. ಇನ್ನಷ್ಟು ಇರಬಹುದು, ಅವುಗಳು ಜಪಾನೀಯರಿಗೆ ಗೊತ್ತೇ ಇರುತ್ತದೆ. ಈ ಸಮಸ್ಯೆಗಳು ಸಮಾಧಾನ ಕಾಲಗರ್ಭದಲ್ಲಿ ಅಡಗಿದೆ. ಅಲ್ಲಿಯವರೆಗೆ ಕಾಯಬೇಕು.

ಇದನ್ನೂ ಓದಿ: Rangaswamy Mookanahalli Column