Miss World 2025: 108 ಸ್ಪರ್ಧಿಗಳನ್ನು ಹಿಂದಿಕ್ಕಿ ವಿಶ್ವ ಸುಂದರಿ ಕೀರಿಟ ತೊಟ್ಟ ಓಪಾಲ್ ಸುಚಾತಾ ಬಗ್ಗೆ ನಿಮಗೆಷ್ಟು ಗೊತ್ತು?
ವಿಶ್ವ ಸುಂದರಿ 2025 ಗ್ರ್ಯಾಂಡ್‌ ಫಿನಾಲೆ ಅದ್ದೂರಿಯಾಗಿ ಹೈದರಾಬಾದ್‌ ನಡೆದಿದೆ. ವಿವಿಧ ರಾಷ್ಟ್ರಗಳ ಸುಂದರಿಯರು ಮಿಸ್ ವರ್ಲ್ಡ್‌ ಪಟ್ಟಕ್ಕಾಗಿ ಭರ್ಜರಿಯಾಗಿ ಪೈಪೋಟಿ ನಡೆಸಿದರು. ಈ ಸ್ಪರ್ಧೆಗೆ ಭಾರತದಿಂದ ನಂದಿನಿ ಗುಪ್ತಾ ಕೂಡ ಸ್ಪರ್ಧಿಸಿದ್ದರು. ಟಾಪ್ 20ರಲ್ಲಿ ನಂದಿನಿ ಗುಪ್ತಾ ಸ್ಥಾನ ಪಡೆದಿದ್ದು ಗೆಲುವಿನ ನಿರೀಕ್ಷೆ ಮೂಡಿಸಿದ್ದರು. ಆದರೆ ಬಳಿಕ ಅಗ್ರ ಸ್ಥಾನ ಪಡೆಯುವಲ್ಲಿ ವಿಫಲರಾದರು. ಕೊನೆಗೆ ಈ 72ನೇ ಆವೃತ್ತಿಯ ಮಿಸ್ ವರ್ಲ್ಡ್‌ 2025 ಸ್ಪರ್ಧೆಯಲ್ಲಿ ಥಾಯ್ಲೆಂಡ್‌ನ ಓಪಲ್ ಸುಚಾತಾ ವಿಜಯಿಯಾಗುವ ಮೂಲಕ ಮಿಸ್ ವರ್ಲ್ಡ್‌ ಕಿರೀಟ ಅಲಂಕರಿಸಿದರು.
Miss World 2025
Pushpa Kumari
Jun 2, 2025 7:02 PM
ವಿಶ್ವ ಸುಂದರಿ 2025 ಗ್ರ್ಯಾಂಡ್‌ ಫಿನಾಲೆ ಮೇ 31ರಂದು ತೆಲಂಗಾಣದ ಹೈದರಾಬಾದ್‌ನಲ್ಲಿ ನಡೆಯಿತು. ಥಾಯ್ಲೆಂಡ್‌ನ ಓಪಾಲ್ ಸುಚಾತಾ ಚೌಂಗಶ್ರೀ ಮಿಸ್ ವರ್ಲ್ಡ್‌ ಕಿರೀಟ ಮುಡಿಗೇರಿಸಿಕೊಂಡರು. ಹಾಲಿ ವಿಶ್ವ ಸುಂದರಿ ಕ್ರಿಸ್ಟಿನಾ ಪಿಸ್ಕ್‌ಜೋವಾ ಅವರಿಗೆ ಕಿರೀಟ ತೊಡಿಸಿದರು. ಈ ಮೂಲಕ ಓಪಾಲ್ ಮಿಸ್ ವರ್ಲ್ಡ್‌ ಗೆದ್ದ ಥಾಯ್ಲೆಂಡ್‌ನ ಮೊದಲ ಪ್ರತಿನಿಧಿಯಾಗಿ ಹೊಸ ದಾಖಲೆ ಮಾಡಿದ್ದಾರೆ.
72ನೇ ಮಿಸ್ ವರ್ಲ್ಡ್‌ ಗ್ರ್ಯಾಂಡ್‌ ಫಿನಾಲೆಗಾಗಿ ಪ್ರಪಂಚದಾದ್ಯಂತದ 108 ಸ್ಪರ್ಧಿಗಳು ಭಾಗವಹಿಸಿದ್ದರು. ಸ್ಪರ್ಧೆ ವಿವಿಧ ಹಂತದಲ್ಲಿ ನಡೆಸಲಾಗಿದ್ದು, 108 ಜನರಲ್ಲಿ ಟಾಪ್ 20 ಆಯ್ಕೆ ಮಾಡಲಾಗಿತ್ತು. ಅದರಲ್ಲಿ ಭಾರತದ ನಂದಿನಿ ಕೂಡ ಇದ್ದರು. ಬಳಿಕ ಟಾಪ್ 10 ಜನ ಸ್ಪರ್ಧಿಗಳನ್ನು ಘೋಷಿಸಲಾಯಿತು. ಅದರಲ್ಲಿ ಐದು ಮಂದಿಯನ್ನು ವಿಶ್ವ ಸುಂದರಿ ಸ್ಪರ್ಧೆಗೆ ಆಯ್ಕೆ ಮಾಡಲಾಗಿತ್ತು. ಇದರಲ್ಲಿ ಮಿಸ್ ಫಿಲಿಫೈನ್ಸ್‌ ಹಾಗೂ ಮಿಸ್ ಥಾಯ್ಲೆಂಡ್‌ಗೆ ಪೈಪೋಟಿ ಕೂಡ ನಡೆದಿತ್ತು. ಅಂತಿ ಮವಾಗಿ ಮಿಸ್ ಥಾಯ್ಲೆಂಡ್‌ ಸುಚಾತಾ ವಿಶ್ವ ಸುಂದರಿ ಕಿರೀಟವನ್ನು ಮುಡಿಗೇರಿಸಿಕೊಂಡರು.
ಇಥಿಯೋಪಿಯಾದ ಹ್ಯಾಸೆಟ್ ಡೆರೆಜೆ ಮೊದಲ ರನ್ನರ್ ಅಪ್ ಆಗಿ ಆಯ್ಕೆಯಾದರು. ಪೋಲೆಂಡ್‌ನ ಮಜಾ ಕ್ಲಾಜ್ಡಾ ಎರಡನೇ ರನ್ನರ್ ಅಪ್ ಸ್ಥಾನವನ್ನು ಪಡೆದುಕೊಂಡರು. ಮಾರ್ಟಿನಿಕ್‌ನ ಆರ್ಲಿ ಜೋಕಿಮ್ ನಾಲ್ಕನೇ ಸ್ಥಾನ ಪಡೆದರು.
ಓಪಲ್ ಮೆಕ್ಸಿಕೋ ನಗರದಲ್ಲಿ ನಡೆದ ಮಿಸ್ ಯೂನಿವರ್ಸ್ 2024 ಸ್ಪರ್ಧೆಯಲ್ಲಿಯೂ ಸ್ಪರ್ಧಿಸಿದ್ದರು. ಅಲ್ಲಿ ಅವರು ಆರಂಭದಲ್ಲಿ ಮೂರನೇ ರನ್ನರ್ ಅಪ್ ಆಗಿದ್ದರು. ಓಪಲ್ ಫಿನಾಲೆಗೆ ಗೌನ್ ಧರಿಸಿದ್ದು ಆಕರ್ಷಕವಾಗಿ ಕಂಡಿದ್ದಾರೆ. ಮಹಿಳೆಯರ ಶಿಕ್ಷಣ ಮತ್ತು ಸಬಲೀಕರಣದ ಮೇಲೆ ಕೇಂದ್ರೀಕರಿಸುವ ಧ್ಯೇಯದಲ್ಲಿ ಅವರ ಗೌನ್ ವಿನ್ಯಾಸಗೊಳಿಸಲಾಗಿದೆ.
ವಿಶ್ವ ಸುಂದರಿ ಓಪಲ್ ಫುಕೇಟ್ ಮೂಲದವರಾಗಿದ್ದು ಥಮ್ಮಸತ್‌ ವಿಶ್ವವಿದ್ಯಾಲಯದ ರಾಜಕೀಯ ವಿಜ್ಞಾನ ವಿಭಾಗದಲ್ಲಿ ರಾಜಕೀಯ ಮತ್ತು ಅಂತಾರಾಷ್ಟ್ರೀಯ ವಿಚಾರದಲ್ಲಿ ಪದವಿ ಪಡೆಯುತ್ತಿದ್ದಾರೆ. ಬ್ಯಾಂಕಾಕ್‌ನ ಟ್ರಯಾಮ್‌ ಉಡೋಮ್‌ ಸುಕ್ಸಾ ಶಾಲೆಯಿಂದ ಓಪಲ್ ಚೈನೀಸ್‌ ಭಾಷೆಯಲ್ಲಿ ಪರಿಣಿತಿಯನ್ನು ಪಡೆದಿದ್ದಾರೆ. ಇದರೊಂದಿಗೆ ಮಾಡೆಲಿಂಗ್ ಅನ್ನು ಸಹ ಮಾಡುತ್ತಿದ್ದು ಬಹುಮುಖ ಪ್ರತಿಭೆಯ ವ್ಯಕ್ತಿತ್ವ ಇವರದ್ದು.