Wing Commander Abhinandan: ವಿಂಗ್ ಕಮಾಂಡರ್ ಅಭಿನಂದನ್ ಈಗ ಎಲ್ಲಿದ್ದಾರೆ? ಪಾಕ್‌ನಿಂದ ವಾಪಾಸಾದ ಅವರಿಗೆ ಏನಾಗಿತ್ತು?
Wing Commander Abhinandan: ವರ್ದಮಾನ್‌ ಅಭಿನಂದನ್ ಈ ಹೆಸರು ಕೇಳದವರಿರುವುದು ಬಹಳ ವಿರಳ. ಪಾಕ್‌ನ ಕೈಗೆ ಸೆರೆ ಸಿಕ್ಕ ಭಾರತದ ಈ ವಿಂಗ್ ಕಮಾಂಡರ್ ತಪ್ಪಾಗಿ ಪಾಕಿಸ್ತಾನಕ್ಕೆ ಪ್ರವೇಶಿಸಿದ್ದರು. ನಂತರ ಪಾಕಿಸ್ತಾನವು ಅವರನ್ನು ಭಾರತಕ್ಕೆ ಹಿಂದಿರುಗಿಸಿತ್ತು. ಈ ಇತ್ತೀಚಿನ ಘಟನೆಯು ವಿಂಗ್ ಕಮಾಂಡರ್ ಅಭಿನಂದನ್ ಅವರ ಬಗ್ಗೆ ಮತ್ತೆ ಚರ್ಚೆಗೆ ಕಾರಣವಾಗಿದೆ. ಪಾಕಿಸ್ತಾನದಿಂದ ಹಿಂದಿರುಗಿದ ಬಳಿಕ ಅವರಿಗೇನಾಯಿತು ಎಂಬ ಕುತೂಹಲ ಹಲವರಲ್ಲಿದೆ.
ವಿಂಗ್ ಕಮಾಂಡರ್ ಅಭಿನಂದನ್
Sushmitha Jain
May 16, 2025 3:24 PM
ನವದೆಹಲಿ: ಭಾರತ ಮತ್ತು ಪಾಕಿಸ್ತಾನದ (India and Pakistan) ನಡುವಿನ ಕದನ ವಿರಾಮದ ಬಳಿಕ ಗಡಿಯಲ್ಲಿ ಉಂಟಾಗಿದ್ದ ಒತ್ತಡ ಈಗ ಕಡಿಮೆಯಾಗುತ್ತಿದೆ. ಬುಧವಾರ, ಪಾಕಿಸ್ತಾನವು ತನ್ನ ಬಂಧನದಲ್ಲಿದ್ದ ಭಾರತದ ಗಡಿ ಭದ್ರತಾ ಪಡೆ (Border Security Force) ಯೋಧ ಪೂರ್ಣಂ ಕುಮಾರ್ ಸಾಹು (Purnam Kumar Sahu) ಅವರನ್ನು ಬಿಡುಗಡೆಗೊಳಿಸಿದೆ. ಈ ಸಂದರ್ಭದಲ್ಲಿ, ಪಹಲ್ಗಾಮ್ ಭಯೋತ್ಪಾದಕ ದಾಳಿಯ ಬಳಿಕ ಎರಡು ದೇಶಗಳ ನಡುವಿನ ಉದ್ವಿಗ್ನತೆ ವೇಳೆ, ಬಿಎಸ್ಎಫ್ ಯೋಧ ಪೂರ್ಣಂ ಕುಮಾರ್ ಸಾಹು ತಪ್ಪಾಗಿ ಪಾಕಿಸ್ತಾನದ ಗಡಿಗೆ ಪ್ರವೇಶಿಸಿದ್ದರು. ಪಾಕಿಸ್ತಾನದ ರೇಂಜರ್ಸ್ ಅವರನ್ನು ಅಂತಾರಾಷ್ಟ್ರೀಯ ಗಡಿಯಿಂದ ಬಂಧಿಸಿದ್ದರು. ಸುಮಾರು 20 ದಿನಗಳ ಬಳಿಕ ಮೇ 14 ರಂದು ಪಾಕಿಸ್ತಾನವು ಸಾಹು ಅವರನ್ನು ಭಾರತಕ್ಕೆ ಹಿಂದಿರುಗಿಸಿದೆ.
ಇದೇ ಅವಧಿಯಲ್ಲಿ ರಾಜಸ್ಥಾನದ ಭಾರತೀಯ ಗಡಿಯ ಬಳಿ ಭಾರತವು ಪಾಕಿಸ್ತಾನದ ರೇಂಜರ್ಸ್ ಸಿಬ್ಬಂದಿಯೊಬ್ಬರನ್ನು ಬಂಧಿಸಿತ್ತು. ಭಾರತೀಯ ಬಿಎಸ್ಎಫ್ ಯೋಧನ ಬಿಡುಗಡೆಗೆ ಬದಲಾಗಿ ಭಾರತವು ಈ ಪಾಕಿಸ್ತಾನಿ ರೇಂಜರ್‌ನನ್ನು ಹಸ್ತಾಂತರಿಸಿತು. ಇದಕ್ಕೂ ಮೊದಲು, ವಿಂಗ್ ಕಮಾಂಡರ್ ಅಭಿನಂದನ್ ವರ್ಧಮಾನ್ ಕೂಡ ತಪ್ಪಾಗಿ ಪಾಕಿಸ್ತಾನಕ್ಕೆ ಪ್ರವೇಶಿಸಿದ್ದರು. ನಂತರ ಪಾಕಿಸ್ತಾನವು ಅವರನ್ನು ಭಾರತಕ್ಕೆ ಹಿಂದಿರುಗಿಸಿತ್ತು. ಈ ಇತ್ತೀಚಿನ ಘಟನೆಯು ವಿಂಗ್ ಕಮಾಂಡರ್ ಅಭಿನಂದನ್ ಅವರ ಬಗ್ಗೆ ಮತ್ತೆ ಚರ್ಚೆಗೆ ಕಾರಣವಾಗಿದೆ. ಪಾಕಿಸ್ತಾನದಿಂದ ಹಿಂದಿರುಗಿದ ಬಳಿಕ ಅವರಿಗೇನಾಯಿತು ಎಂದು ಜನ ಕುತೂಹಲ ವ್ಯಕ್ತಪಡಿಸುತ್ತಿದ್ದಾರೆ.
ಯಾರು ಈ ಅಭಿನಂದನ್? ಏನಿವರ ಕಥೆ?
ವಿಂಗ್ ಕಮಾಂಡರ್ ಅಭಿನಂದನ್ 2004ರಲ್ಲಿ ಸೇನೆಗೆ ಸೇರಿದ್ದರು. ಅವರ ತಂದೆಯೂ ವಾಯುಪಡೆಯಲ್ಲಿ ಸೇವೆ ಸಲ್ಲಿಸಿದ್ದರು, ಮತ್ತು ಅವರ ಸಹೋದರ ಕೂಡ ವಾಯುಪಡೆಯಲ್ಲಿದ್ದಾರೆ. ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾ ಭಯೋತ್ಪಾದಕ ದಾಳಿಯ ಬಳಿಕ, ಅಭಿನಂದನ್ ಬಾಲಕೋಟ್ ವೈಮಾನಿಕ ದಾಳಿಯಲ್ಲಿ ಭಾಗವಹಿಸಿದ್ದರು. ಪಾಕಿಸ್ತಾನದ ವಾಯುಪಡೆ ಭಾರತೀಯ ವಾಯುಪ್ರದೇಶಕ್ಕೆ ಒಳನುಗ್ಗಲು ಯತ್ನಿಸಿದಾಗ, ಅವರು ತಮ್ಮ ಮಿಗ್-21 ಬೈಸನ್ ವಿಮಾನದಿಂದ ಪಾಕಿಸ್ತಾನದ ಎಫ್-16 ಯುದ್ಧ ವಿಮಾನವನ್ನು ಹೊಡೆದುರುಳಿಸಿದರು. ಆದರೆ, ತೀವ್ರ ವೈಮಾನಿಕ ಯುದ್ಧದ ವೇಳೆ ಅವರ ಮಿಗ್-21 ಕೂಡ ಗುರಿಯಾಗಿ, ಅವರು ಪಾಕಿಸ್ತಾನ ಆಕ್ರಮಿತ ಪ್ರದೇಶಕ್ಕೆ ತಲುಪಿದರು.
ಈ ಸುದ್ದಿಯನ್ನು ಓದಿ: Viral Video: 'ವಿಶ್ವ ಸುಂದರಿ' ಸ್ಪರ್ಧಿಗಳ ಪಾದ ತೊಳೆದ ಮಹಿಳೆಯರು; ಏನಿದು ವೈರಲ್‌ ಸುದ್ದಿ?
ಎರಡು ದಿನಗಳ ಬಳಿಕ, ಮಾರ್ಚ್ 1, 2019 ರಂದು ವಿಂಗ್ ಕಮಾಂಡರ್ ಅಭಿನಂದನ್ ಅವರನ್ನು ಬಿಡುಗಡೆಗೊಳಿಸಲಾಯಿತು. ಜಿನೀವಾ ಸಮಾವೇಶದ ನಿಯಮಗಳ ಪ್ರಕಾರ, ಯುದ್ಧದ ನಂತರ ಸೆರೆಯಾಳುಗಳನ್ನು ತಮ್ಮ ದೇಶಕ್ಕೆ ಹಿಂದಿರುಗಿಸಬೇಕು ಎಂಬ ಕಾರಣಕ್ಕೆ ಪಾಕಿಸ್ತಾನವು ಅವರನ್ನು ಭಾರತಕ್ಕೆ ಕಳುಹಿಸಿತು.
ಪಾಕಿಸ್ತಾನದಿಂದ ಹಿಂದಿರುಗಿದ ಬಳಿಕ, ಅಭಿನಂದನ್ ಅವರನ್ನು ಭಾರತೀಯ ವಾಯುಪಡೆಯ ವೈದ್ಯಕೀಯ ತಂಡವು ಸಂಪೂರ್ಣ ತಪಾಸಣೆಗೆ ಒಳಪಡಿಸಿತು. ಈ ತಪಾಸಣೆಯು ಅವರಿಗೆ ಯಾವುದೇ ದೈಹಿಕ ಗಾಯಗಳಿಲ್ಲ, ಯಾವುದೇ ಔಷಧಿಗಳನ್ನು ನೀಡಿಲ್ಲ, ಮತ್ತು ಮಾನಸಿಕ ಅಥವಾ ದೈಹಿಕ ಕಿರುಕುಳಕ್ಕೆ ಒಳಗಾಗಿಲ್ಲ ಎಂಬುದನ್ನು ಖಚಿತಪಡಿಸಿತು. ಇದಾದ ಬಳಿಕ, ವಿಂಗ್ ಕಮಾಂಡರ್ ಅಭಿನಂದನ್ ಅವರನ್ನು ಭಾರತೀಯ ವಾಯುಪಡೆಗೆ ಔಪಚಾರಿಕವಾಗಿ ಹಸ್ತಾಂತರಿಸಲಾಯಿತು.
ಆದರೆ, ಪಾಕಿಸ್ತಾನದಿಂದ ಹಿಂದಿರುಗಿದ ಬಳಿಕ, ಅವರಿಗೆ ತಾತ್ಕಾಲಿಕವಾಗಿ ಯುದ್ಧ ವಿಮಾನಗಳನ್ನು ಓಡಿಸುವುದರಿಂದ ನಿಷೇಧ ಹೇರಲಾಯಿತು. ವಿಮಾನದಿಂದ ಹೊರ ಬಿದ್ದಾಗ ಸಂಭವಿಸಿದ ಗಾಯಗಳಿಂದಾಗಿ ಅವರನ್ನು ಕೆಲವು ಕಾಲ ವಿಮಾನ ಚಾಲನೆಯಿಂದ ದೂರವಿಡಲಾಯಿತು. ವರದಿಗಳ ಪ್ರಕಾರ, ಅವರು ಹಲವು ತಿಂಗಳು ವಿಮಾನ ಚಾಲನೆಯಿಂದ ದೂರವಿದ್ದರು. ಆದರೆ, ಸುಮಾರು ಆರು ತಿಂಗಳ ಬಳಿಕ, ವಾಯುಪಡೆಯ ಸಂಸ್ಥೆಯಿಂದ ನಡೆದ ವೈದ್ಯಕೀಯ ಮೌಲ್ಯಮಾಪನದ ನಂತರ ಅವರಿಗೆ ಮತ್ತೆ ಯುದ್ಧ ವಿಮಾನಗಳನ್ನು ಓಡಿಸಲು ಅನುಮತಿ ನೀಡಲಾಯಿತು.