Ahmedabad Plane Crash: ನಿನ್ನ ಬಗ್ಗೆ ಹೆಮ್ಮೆ ಇದೆ ...ಮಗನಿಗೆ ಕಣ್ಣೀರ ವಿದಾಯ ಹೇಳಿದ ಕ್ಯಾ. ಸಭರ್ವಾಲ್‌ ತಂದೆ

ಮುಂಬೈ: ಜೂನ್ 12ರಂದು ಅಹಮದಾಬಾದ್‌ನಿಂದ (Ahmedabad Plane Crash) ಲಂಡನ್‌ಗೆ (London) ತೆರಳುತ್ತಿದ್ದ ಏರ್ ಇಂಡಿಯಾ ವಿಮಾನ (Air India Flight) ಅಪಘಾತಕ್ಕೀಡಾಗಿ 241 ಮಂದಿ ಸಾವನ್ನಪ್ಪಿದ ದುರಂತದಲ್ಲಿ ಪೈಲಟ್ ಆಗಿದ್ದ ಕ್ಯಾಪ್ಟನ್ ಸುಮೀತ್ ಸಭರ್ವಾಲ್‌ರ (Captain Sumeet Sabharwal) ತಂದೆ ಮಂಗಳವಾರ ಪವಾಯಿಯ ತಮ್ಮ ನಿವಾಸದ ಹೊರಗೆ ಮಗನಿಗೆ ಭಾವುಕ ಶ್ರದ್ಧಾಂಜಲಿ ಸಲ್ಲಿಸಿದರು. ಕಣ್ಣೀರಿನೊಂದಿಗೆ ಕೈಮುಗಿದು ಶ್ರದ್ಧಾಂಜಲಿ ಅರ್ಪಿಸಿದ ತಂದೆ, ಮಗನ ನಿಷ್ಠೆಯನ್ನು ಸ್ಮರಿಸಿದರು.

56 ವರ್ಷದ ಕ್ಯಾಪ್ಟನ್ ಸುಮೀತ್ ಸಭರ್ವಾಲ್ 8,200 ಗಂಟೆಗಳ ವಿಮಾನ ಚಾಲನಾ ಅನುಭವವನ್ನು ಹೊಂದಿದ್ದರು. ತಮ್ಮ ತಂದೆಯನ್ನು ಪೂರ್ಣಕಾಲಿಕವಾಗಿ ನೋಡಿಕೊಳ್ಳಲು ಉದ್ಯೋಗವನ್ನು ತ್ಯಜಿಸುವ ಭರವಸೆಯನ್ನು ತಂದೆಗೆ ನೀಡಿದ್ದರು. DNA ಪರೀಕ್ಷೆಯ ಮೂಲಕ ಗುರುತು ದೃಢಪಟ್ಟ ನಂತರ, ಸಭರ್ವಾಲ್‌ರ ದೇಹವನ್ನು ಇಂದು ಬೆಳಿಗ್ಗೆ ವಿಮಾನದ ಮೂಲಕ ಮುಂಬೈಗೆ ತರಲಾಯಿತು.

ಏರ್ ಇಂಡಿಯಾದ AI171 ವಿಮಾನವು ಜೂನ್ 12ರಂದು ಅಹಮದಾಬಾದ್‌ನಿಂದ ಲಂಡನ್‌ನ ಗ್ಯಾಟ್‌ವಿಕ್ ವಿಮಾನ ನಿಲ್ದಾಣಕ್ಕೆ ಟೇಕ್‌ಆಫ್ ಆದ ಕೆಲವೇ ನಿಮಿಷಗಳಲ್ಲಿ ಅಪಘಾತಕ್ಕೀಡಾಗಿತ್ತು. ವಿಮಾನದಲ್ಲಿದ್ದ ಪ್ರಯಾಣಿಕರು ಮತ್ತು ಸಿಬ್ಬಂದಿ ಸೇರಿದಂತೆ 242 ಜನರಲ್ಲಿ 241 ಮಂದಿ ಸಾವನ್ನಪ್ಪಿದರು. ಕೇವಲ ಒಬ್ಬ ಪ್ರಯಾಣಿಕ ಮಾತ್ರ ಈ ಭೀಕರ ಅಪಘಾತದಿಂದ ಪವಾಡಸದೃಶ್ಯವಾಗಿ ಬದುಕುಳಿದಿದ್ದಾರೆ.

ಕ್ಯಾಪ್ಟನ್ ಸಭರ್ವಾಲ್‌ರ ತಂದೆಯ ಶ್ರದ್ಧಾಂಜಲಿ ಸಮಾರಂಭದಲ್ಲಿ ಕುಟುಂಬದವರು ಮತ್ತು ಸ್ಥಳೀಯರು ಭಾಗವಹಿಸಿ, ದುಃಖತಪ್ತ ಕುಟುಂಬಕ್ಕೆ ಸಾಂತ್ವನ ಹೇಳಿದರು. ಸಭರ್ವಾಲ್‌ರ ಸೇವೆಯನ್ನು ಸ್ಮರಿಸಿದ ತಂದೆ, “ನನ್ನ ಮಗ ತನ್ನ ಕರ್ತವ್ಯವನ್ನು ನಿಷ್ಠೆಯಿಂದ ನಿರ್ವಹಿಸಿದ. ಆತ ತನ್ನ ಜವಾಬ್ದಾರಿಯನ್ನು ಎಂದಿಗೂ ಮರೆಯಲಿಲ್ಲ” ಎಂದು ಭಾವುಕರಾಗಿ ಹೇಳಿದರು. ಈ ದುರಂತವು ಏರ್ ಇಂಡಿಯಾ ಸಿಬ್ಬಂದಿಯ ಸಮರ್ಪಣೆ ಮತ್ತು ಧೈರ್ಯವನ್ನು ಎತ್ತಿ ತೋರಿಸಿದೆ ಎಂದು ಸ್ಥಳೀಯರು ಅಭಿಪ್ರಾಯಪಟ್ಟರು.

ಈ ಸುದ್ದಿಯನ್ನೂ ಓದಿ: Ahmedabad Plane Crash: ಮಗ ಬೇರೆ ವಿಮಾನದಲ್ಲಿದ್ದ.. ಆದ್ರೂ ಬರ ಸಿಡಿಲು ಬಡಿದಂತಾಯಿತು! ಅಹ್ಮದಾಬಾದ್‌ ವಿಮಾನ ದುರಂತದ ಬಗ್ಗೆ ಈ ತಾಯಿ ಹೇಳೋ ಮಾತನ್ನೊಮ್ಮೆ ಕೇಳಿ

ಈ ಘಟನೆಯ ಕುರಿತು ತನಿಖೆಯನ್ನು ಕೇಂದ್ರ ಸರ್ಕಾರ ಆರಂಭಿಸಿದ್ದು, ತಾಂತ್ರಿಕ ವೈಫಲ್ಯ ಸೇರಿದಂತೆ ದುರಂತದ ಕಾರಣಗಳನ್ನು ಪತ್ತೆಹಚ್ಚಲು ಉನ್ನತ ಮಟ್ಟದ ಸಮಿತಿಯನ್ನು ರಚಿಸಲಾಗಿದೆ. ಕುಟುಂಬಕ್ಕೆ ಏರ್ ಇಂಡಿಯಾ ಸಾಂತ್ವನ ವ್ಯಕ್ತಪಡಿಸಿದೆ.