Genelia D'Souza: ರಾಷ್ಟ್ರಪತಿಗೆ ವಿಶೇಷ ಧನ್ಯವಾದ ತಿಳಿಸಿದ ನಟಿ ಜೆನಿಲಿಯಾ
ಮಿಸ್ಟರ್ ಪರ್ಫೆಕ್ಟ್ ಆಮಿರ್ ಖಾನ್ ಹಾಗೂ ನಟಿ ಜೆನಿಲಿಯಾ ಡಿʼಸೋಜಾ ನಟಿಸಿರುವ ‘ಸಿತಾರೆ ಜಮೀನ್ ಪರ್’ ಚಿತ್ರ ಸಖತ್ ಸೌಂಡ್ ಮಾಡುತ್ತಿದೆ. ಜೂನ್ 20ರಂದು ಚಿತ್ರ ಬಿಡುಗಡೆಯಾಗಿದ್ದು. ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಗಾಗಿ ಈ ಚಿತ್ರದ ವಿಶೇಷ ಪ್ರದರ್ಶನ ಏರ್ಪಡಿಸಲಾಗಿತ್ತು. ನಟಿ ಜೆನಿಲಿಯಾ ಡಿʼಸೋಜಾ ಇದೀಗ ದ್ರೌಪದಿ ಮುರ್ಮು ಅವರನ್ನು ಭೇಟಿ ಮಾಡಿರುವ ಫೋಟೊ ಇದೀಗ ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
Genelia D'Souza
Pushpa Kumari
Jun 26, 2025 3:45 PM
ಬಹುಭಾಷಾ ನಟಿ ಜೆನಿಲಿಯಾ ಡಿʼಸೋಜಾ ಹಿಂದಿ, ಕನ್ನಡ, ತೆಲುಗು, ತಮಿಳು, ಮಲಯಾಳಂ ಸಿನಿಮಾಗಳಲ್ಲಿ ನಟಿಸಿದ್ದಾರೆ. 2003ರಲ್ಲಿ ತೆರೆಕಂಡ 'ತುಜೆ ಮೆರಿ ಕಸಂ' ಬಾಲಿವುಡ್‌ ಚಿತ್ರದಲ್ಲಿ ಜೆನಿಲಿಯಾ ಡಿʼಸೋಜಾ ಮೊದಲ ಬಾರಿಗೆ ಬಣ್ಣ ಹಚ್ಚಿದ್ದರು. ಸದ್ಯ ಅವರು ʼಸಿತಾರೆ ಜಮೀನ್ ಪರ್ʼ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದು, ಪಾಸಿಟಿವ್ ವಿಮರ್ಶೆ ಪಡೆಯುತ್ತಿದೆ.
ಇತ್ತೀಚೆಗೆ ರಾಷ್ಟ್ರಪತಿ ಭವನದಲ್ಲಿ ಈ ಚಿತ್ರದ ವಿಶೇಷ ಪ್ರದರ್ಶನ ಏರ್ಪಡಿಸಲಾಗಿತ್ತು. ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಸಿನಿಮಾ ನೋಡಿ ಚಿತ್ರ ತಂಡಕ್ಕೆ ಶುಭ ಹಾರೈಸಿದ್ದಾರೆ. ಈ ವೇಳೆ ಆಮೀರ್ ಖಾನ್, ಜೆನಿಲಿಯಾ ಸೇರಿದಂತೆ ಚಿತ್ರತಂಡದ ಹಲವರು ಭಾಗಿಯಾಗಿದ್ದರು.
ಇದೀಗ ನಟಿ ಜೆನಿಲಿಯಾ ಡಿʼಸೋಜಾ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮೂಲಕ ರಾಷ್ಟ್ರ ಪತಿಗೆ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು. ʼಭಾರತದ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿ ಮಾಡಿರುವುದು ನಿಜಕ್ಕೂ ಗೌರವದ ಸಂಗತಿ. ನೀವು ನಮ್ಮ ಸಿನಿಮಾ ʼಸಿತಾರೆ ಜಮೀನ್ ಪರ್ʼ ವೀಕ್ಷಿಸಿದ್ದಕ್ಕಾಗಿ ಹಾಗೂ ನಿಮ್ಮ ಪ್ರೀತಿಯ ಮಾತುಗಳಿಗಾಗಿ ಧನ್ಯವಾದಗಳು. ಈ ಪ್ರೋತ್ಸಾಹ ಹಾಗೂ ನಿಮ್ಮ ಉಪಸ್ಥಿತಿ ನಮ್ಮ ಬದುಕಿನ ಶಾಶ್ವತ ಆಶೀರ್ವಾದವಾಗಿದೆʼʼ ಎಂದು ಬರೆದುಕೊಂಡಿದ್ದಾರೆ.
ಫೋಟೊದಲ್ಲಿ ಜೆನಿಲಿಯಾ ಸುಂದರ ಬಿಳಿ ಹೂವಿನ ಕುರ್ತಾ ಸೆಟ್‌ನಲ್ಲಿ ಕ್ಯೂಟ್ ಆಗಿ ಕಾಣಿಸಿ ಕೊಂಡಿದ್ದಾರೆ. ಜತೆಗೆ ನಟ ಆಮೀರ್ ಖಾನ್ ಮತ್ತು ನಿರ್ದೇಶಕ ಆರ್.ಎಸ್.ಪ್ರಸನ್ನ ಉಪಸ್ಥಿತರಿದ್ದರು.
ವಿಶೇಷ ಚೇತನರ ಬಗ್ಗೆ ಸಂದೇಶ ನೀಡುವ ಈ ಸಿನಿಮಾ ವೀಕ್ಷಿಸಿ ರಾಷ್ಟ್ರಪತಿ ಭೇಷ್ ಎಂದಿದ್ದಾರೆ. ರಾಷ್ಟ್ರಪತಿ ಭವನದ ಅಧಿಕೃತ ಎಕ್ಸ್ ಖಾತೆಯಲ್ಲಿ ಈ ಬಗ್ಗೆ ಪೋಸ್ಟ್ ಕೂಡ ಹಂಚಿಕೊಳ್ಳಲಾಗಿದೆ.
ಆರ್.ಎಸ್.ಪ್ರಸನ್ನ ನಿರ್ದೇಶಿಸಿರುವ ಈ ಸಿನಿಮಾವನ್ನು ಆಮೀರ್ ಖಾನ್ ಮತ್ತು ಅಪರ್ಣಾ ಪುರೋಹಿತ್ ನಿರ್ಮಿಸಿದ್ದಾರೆ. ಆಮೀರ್ ಖಾನ್ ಜತೆಗೆ ಜೆನಿಲಿಯಾ ಡಿʼಸೋಜಾ, ಆಮೀರ್ ಸಹೋದರಿ ನಿಖಾತ್ ಖಾನ್ ನಟಿಸಿದ್ದಾರೆ. ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅರುಶ್ ದತ್ತಾ, ಗೋಪಿ ಕೃಷ್ಣ ವರ್ಮಾ, ಸಮ್ವಿತ್ ದೆಸಾಯಿ ಮತ್ತಿತರರು ಇದ್ದಾರೆ.