Fighter Jet: 26 ರಫೇಲ್ ಯುದ್ಧ ವಿಮಾನ ಖರೀದಿ; ಇಂದು ಭಾರತ-ಫ್ರಾನ್ಸ್‌ ಮಹತ್ವದ ಒಪ್ಪಂದಕ್ಕೆ ಸಹಿ; ಒಟ್ಟು ಮೊತ್ತ ಎಷ್ಟು ಗೊತ್ತಾ?
ಫ್ರಾನ್ಸ್‌ನಿಂದ 63,000 ಕೋಟಿ ರೂ. ವೆಚ್ಚದಲ್ಲಿ 26 ರಫೇಲ್ ಎಂ ಯುದ್ಧ ವಿಮಾನಗಳನ್ನು(Fighter Jet) ಖರೀದಿಸಲು ಭಾರತ ಮುಂದಾಗಿದೆ. ಈ ಒಪ್ಪಂದವು ಭಾರತದ ನೌಕಾಪಡೆಯನ್ನು ಬಲಪಡಿಸಲಿದ್ದು, ಮತ್ತು ಹಿಂದೂ ಮಹಾಸಾಗರದಲ್ಲಿ ಚೀನಾದ ಹೆಚ್ಚುತ್ತಿರುವ ಪ್ರಭಾವವನ್ನು ಎದುರಿಸಲು ಸಹಾಯ ಮಾಡಲಿದೆ. ಈ ವಿಮಾನಗಳನ್ನು ಐಎನ್ಎಸ್ ವಿಕ್ರಾಂತ್‌ನಲ್ಲಿ ನಿಯೋಜಿಸಲು ಉದ್ದೇಶಿಸಲಾಗಿದ್ದು, ಇಂದು ಒಪ್ಪಂದಕ್ಕೆ ಸಹಿ ಹಾಕಲಿದೆ.
Sushmitha Jain
Apr 28, 2025 10:24 AM
ನವದೆಹಲಿ: ಭಾರತ ಮತ್ತು ಫ್ರಾನ್ಸ್‌ (India and France) ನಡುವೆ 26 ರಫೇಲ್ ಮೆರೈನ್ ಯುದ್ಧ ವಿಮಾನಗಳ (Rafale Marine Combat Aircraft) ಖರೀದಿಗೆ ಸಂಬಂಧಿಸಿದ 63,000 ಕೋಟಿ ರೂಪಾಯಿಗಳ ಒಪ್ಪಂದಕ್ಕೆ ಸೋಮವಾರ ಸಹಿ ಹಾಕಲಾಗುವುದು ಎಂದು ರಕ್ಷಣಾ ಇಲಾಖೆಯ (Defense Department) ಅಧಿಕಾರಿಗಳನ್ನು ಉಲ್ಲೇಖಿಸಿ ವರದಿ ತಿಳಿಸಿದೆ. ಈ ಒಪ್ಪಂದದ ಸಹಿ ಕಾರ್ಯಕ್ರಮದಲ್ಲಿ ಭಾರತದ ರಕ್ಷಣಾ ಇಲಾಖೆಯ ಪ್ರತಿನಿಧಿಗಳು ಮತ್ತು ಭಾರತದಲ್ಲಿರುವ ಫ್ರಾನ್ಸ್‌ ರಾಯಭಾರಿ (France Ambassador) ಭಾಗವಹಿಸಲಿದ್ದಾರೆ.
ಭಾರತದ ರಕ್ಷಣಾ ಕಾರ್ಯದರ್ಶಿ ರಾಜೇಶ್ ಕುಮಾರ್ ಸಿಂಗ್ ಭಾರತದ ಪರವಾಗಿ ಪ್ರತಿನಿಧಿಯಾಗಿ ಭಾಗವಹಿಸುವ ಸಾಧ್ಯತೆ ಇದೆ. ಫ್ರಾನ್ಸ್‌ ಮತ್ತು ಭಾರತದ ರಕ್ಷಣಾ ಸಚಿವರು ವಿಡಿಯೋ ಕಾನ್ಫರೆನ್ಸ್ ಮೂಲಕ ಈ ಕಾರ್ಯಕ್ರಮದಲ್ಲಿ ಭಾಗಿಯಾಗುವ ನಿರೀಕ್ಷೆ ಇದೆ ಎಂದು ವರದಿಯು ತಿಳಿಸಿದೆ. ಸರ್ಕಾರದಿಂದ ಸರ್ಕಾರಕ್ಕೆ (G2G) ಒಪ್ಪಂದದ ಜೊತೆಗೆ, ದ್ವಿಪಕ್ಷೀಯ ರಕ್ಷಣಾ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ಸರ್ಕಾರದಿಂದ ವಾಣಿಜ್ಯ (G2B) ಹಲವಾರು ಒಪ್ಪಂದಗಳಿಗೂ ಈ ಸಂದರ್ಭದಲ್ಲಿ ಭೌತಿಕವಾಗಿ ಸಹಿ ಹಾಕುವ ಸಾಧ್ಯತೆ ಇದೆ.
ಈ 26 ರಫೇಲ್ ಮೆರೈನ್ ಯುದ್ಧ ವಿಮಾನಗಳು ಭಾರತದ ವಿಮಾನವಾಹಕ ನೌಕೆಗಳಾದ ಐಎನ್ಎಸ್ ವಿಕ್ರಾಂತ್‌ನಲ್ಲಿ ನಿಯೋಜನೆಗೆ ತುರ್ತು ಅಗತ್ಯವಾಗಿವೆ. ಪ್ರಸ್ತುತ ಐಎನ್ಎಸ್ ವಿಕ್ರಾಂತ್‌ನಲ್ಲಿ ಬಳಕೆಯಲ್ಲಿರುವ ಮಿಗ್-29ಕೆ ಯುದ್ಧ ವಿಮಾನಗಳು ನಿರ್ವಹಣೆಗೆ ಸಂಬಂಧಿಸಿದ ಸಮಸ್ಯೆಗಳಿಂದ ಕಾರ್ಯಕ್ಷಮತೆಯಲ್ಲಿ ಕುಸಿತ ಕಂಡಿವೆ ಎಂದು ವರದಿಯಾಗಿದೆ.
ಈ ಸುದ್ದಿಯನ್ನು ಓದಿ: Viral Video: ಪಹಲ್ಗಾಮ್‌ ದಾಳಿಯನ್ನು ಸಂಭ್ರಮಿಸಿದ್ದ ಮುಸ್ಲಿಂ ಯುವಕನಿಗೆ ಬಿತ್ತು ಸ್ಥಳೀಯರಿಂದ ಗೂಸಾ; ವಿಡಿಯೋ ನೋಡಿ
ರಫೇಲ್ ಎಂ ವಿಮಾನಗಳನ್ನು ಭಾರತದ ಅಗತ್ಯಕ್ಕೆ ತಕ್ಕಂತೆ ಕಸ್ಟಮೈಸ್ ಮಾಡಲಾಗುವುದು ಮತ್ತು ಇವುಗಳನ್ನು ಐಎನ್ಎಸ್ ವಿಕ್ರಾಂತ್‌ಗೆ ಸಂಯೋಜಿಸಲಾಗುವುದು. ಸ್ವದೇಶಿ ವಿಮಾನವಾಹಕ ಯುದ್ಧ ವಿಮಾನದ ಅಭಿವೃದ್ಧಿಯಾಗುವವರೆಗೆ ಈ ವಿಮಾನಗಳನ್ನು ತಾತ್ಕಾಲಿಕ ಪರಿಹಾರವಾಗಿ ಖರೀದಿಸಲಾಗುತ್ತಿದೆ.
ಏಪ್ರಿಲ್ 9 ರಂದು, ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟದ ಭದ್ರತಾ ಸಮಿತಿಯ ಸಭೆಯಲ್ಲಿ 26 ರಫೇಲ್ ಮೆರೈನ್ ಯುದ್ಧ ವಿಮಾನಗಳ ಖರೀದಿಗೆ ಭಾರತದ ಇತಿಹಾಸದಲ್ಲೇ ಅತಿದೊಡ್ಡ ರಕ್ಷಣಾ ಒಪ್ಪಂದಕ್ಕೆ ಅನುಮೋದನೆ ನೀಡಲಾಗಿತ್ತು. ಈ G2G 22 ಏಕ-ಆಸನ ಮತ್ತು 4 ಡಬಲ್-ಆಸನ ವಿಮಾನಗಳನ್ನು ಒಳಗೊಂಡಿದ್ದು, ಇದರ ಜೊತೆಗೆ ವಿಮಾನಗಳ ನಿರ್ವಹಣೆ, ಲಾಜಿಸ್ಟಿಕ್ ಬೆಂಬಲ, ಸಿಬ್ಬಂದಿ ತರಬೇತಿ ಮತ್ತು ಸ್ವದೇಶಿ ಘಟಕಗಳ ಉತ್ಪಾದನೆಗೆ ಸಂಬಂಧಿಸಿದ ಸಮಗ್ರ ಪ್ಯಾಕೇಜ್ ಸೇರಿದೆ.
ಭಾರತೀಯ ವಾಯುಸೇನೆ ಈಗಾಗಲೇ 2016 ರಲ್ಲಿ ಸಹಿ ಮಾಡಲಾದ ಪ್ರತ್ಯೇಕ ಒಪ್ಪಂದದಡಿ 36 ರಫೇಲ್ ವಿಮಾನಗಳ ಸಂಪೂರ್ಣ ಫ್ಲೀಟ್ ಅನ್ನು ಹೊಂದಿದೆ. ಈ ವಿಮಾನಗಳು ಅಂಬಾಲಾ ಮತ್ತು ಹಾಸಿಮಾರಾದಲ್ಲಿವೆ. ರಫೇಲ್ ಎಂ ವಿಮಾನಗಳು ಐಎನ್ಎಸ್ ವಿಕ್ರಾಂತ್‌ನಿಂದ ಕಾರ್ಯಾಚರಣೆ ನಡೆಸಲಿದ್ದು, ಇದರೊಂದಿಗೆ ಪ್ರಸ್ತುತ ಮಿಗ್-29ಕೆ ಫ್ಲೀಟ್‌ಗೆ ಬೆಂಬಲ ನೀಡಲಿವೆ.