Actor Govinda: ಬಾಲಿವುಡ್‌ ಕಮ್‌ಬ್ಯಾಕ್‌ಗೆ ರೆಡಿ ಆದ ನಟ ಗೋವಿಂದಾ; ವಿಡಿಯೋ ಶೇರ್‌ ಮಾಡಿ ಹಿಂಟ್‌!

ಮುಂಬೈ: ಐದು ವರ್ಷಗಳಿಂದ ಬಿಗ್ ಸ್ಕ್ರೀನ್‌ನಿಂದ ದೂರವಿದ್ದ ಬಾಲಿವುಡ್‌ನ (Bollywood)ಖ್ಯಾತ ನಟ ಗೋವಿಂದಾ (Actor Govinda), ತಮ್ಮ ಮುಂದಿನ ಚಿತ್ರ ‘ದುನಿಯಾದಾರಿ’ (Duniyadari) ಮೂಲಕ ಕಮ್‌ಬ್ಯಾಕ್ ಮಾಡಲು ಸಜ್ಜಾಗಿದ್ದಾರೆ. ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ, ಈ ಚಿತ್ರಕ್ಕಾಗಿ ತಮ್ಮ ಡ್ಯಾನ್ಸ್‌ನ ರಿಹರ್ಸಲ್‌ ವಿಡಿಯೋವೊಂದನ್ನು ಹಂಚಿಕೊಂಡಿದ್ದಾರೆ. "ನನ್ನ ಮುಂದಿನ ಚಿತ್ರ ದುನಿಯಾದಾರಿಗಾಗಿ ರಿಹರ್ಸಲ್ ಮಾಡುತ್ತಿದ್ದೇನೆ" ಎಂದು ಗೋವಿಂದಾ ಪೋಸ್ಟ್‌ಗೆ ಕ್ಯಾಪ್ಷನ್ ನೀಡಿದ್ದಾರೆ.

ಚಿತ್ರದ ತಾಂತ್ರಿಕ ತಂಡ, ನಟರು ಮತ್ತು ಕಥಾವಸ್ತುವಿನ ಬಗ್ಗೆ ಇನ್ನಷ್ಟೇ ಮಾಹಿತಿಗಳು ಹೊರಬರಬೇಕಿದೆ. ಆದರೆ, ಗೋವಿಂದಾ ತಮ್ಮ ಅಭಿಮಾನಿಗಳಿಗೆ ಯಾವ ರೀತಿಯ ಮನರಂಜನೆಯನ್ನು ನೀಡಲಿದ್ದಾರೆ ಎಂಬ ಕುತೂಹಲ ಎಲ್ಲರಲ್ಲೂ ಇದೆ. ಗೋವಿಂದಾ ಕೊನೆಯದಾಗಿ 2019ರಲ್ಲಿ ‘ರಂಗೀಲಾ ರಾಜಾ’ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದರಲ್ಲಿ ಶಕ್ತಿ ಕಪೂರ್, ದಿಗಂಗನಾ ಸೂರ್ಯವಂಶಿ, ಪ್ರೇಮ್ ಚೋಪ್ರಾ ಮುಂತಾದವರು ನಟಿಸಿದ್ದರು.

ಈ ಮಧ್ಯೆ, ಗೋವಿಂದಾ ಹಾಲಿವುಡ್‌ನ ಖ್ಯಾತ ಚಿತ್ರನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್ ತಮಗೆ ‘ಅವತಾರ್’ಚಿತ್ರದ ಮುಖ್ಯ ಪಾತ್ರಕ್ಕಾಗಿ ಸಂಪರ್ಕಿಸಿದ್ದರು ಎಂದು ಹೇಳಿಕೊಂಡಿದ್ದರು. ಆ ಪಾತ್ರಕ್ಕಾಗಿ ದೊಡ್ಡ ಮೊತ್ತದ ಶುಲ್ಕವನ್ನು ನೀಡಲಾಗಿತ್ತು, ಆದರೆ ತಾವು ತಿರಸ್ಕರಿಸಿದ್ದಾಗಿ ತಿಳಿಸಿದ್ದರು. ಈಗ, ಗೋವಿಂದಾ ಅವರ ಪತ್ನಿ ಸುನೀತಾ ಅಹುಜಾ ಈ ಹೇಳಿಕೆಯ ಸತ್ಯಾಸತ್ಯತೆಯ ಬಗ್ಗೆ ಸ್ಪಷ್ಟನೆ ನೀಡಿದ್ದಾರೆ.

ಈ ಸುದ್ದಿಯನ್ನೂ ಓದಿ: Sunita Ahuja: ಡಿವೋರ್ಸ್ ರೂಮರ್ಸ್ ಬಗ್ಗೆ ನಟ ಗೋವಿಂದ ಪತ್ನಿ ಸುನೀತಾ ಅಹುಜಾ ಫಸ್ಟ್ ರಿಯಾಕ್ಷನ್

ಯೂಟ್ಯೂಬರ್ ಊರ್ಫಿ ಜಾವೇದ್‌ರ ಚಾನೆಲ್‌ನಲ್ಲಿ ಕಾಣಿಸಿಕೊಂಡ ಸುನೀತಾ, ಈ ವಿಷಯದ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ. "ನನಗೆ ಯಾವಾಗ ಈ ಆಫರ್ ಬಂದಿತ್ತು ಎಂಬುದೇ ಗೊತ್ತಿಲ್ಲ. ನಾನು 40 ವರ್ಷಗಳಿಂದ ಗೋವಿಂದಾ ಜೊತೆಗಿದ್ದೇನೆ, ಆದರೆ ‘ಅವತಾರ್’ ನಿರ್ದೇಶಕ-ನಿರ್ಮಾಪಕ ಯಾವಾಗ ಬಂದರು ಎಂದು ನನಗೆ ತಿಳಿದಿಲ್ಲ. ಇದು ನಿಜವೋ ಇಲ್ಲವೋ ಎಂಬುದೂ ಗೊತ್ತಿಲ್ಲ. ನಾನು ಸುಳ್ಳು ಹೇಳುವುದಿಲ್ಲ, ಯಾರ ಪರವಾಗಿಯೂ ನಿಲ್ಲುವುದಿಲ್ಲ" ಎಂದು ಸುನೀತಾ ಸ್ಪಷ್ಟಪಡಿಸಿದ್ದಾರೆ. ಗೋವಿಂದಾ ಅವರ ‘ದುನಿಯಾದಾರಿ’ ಚಿತ್ರವು ಅವರ ಅಭಿಮಾನಿಗಳಿಗೆ ಹೊಸ ಮನರಂಜನೆಯ ಅನುಭವವನ್ನು ನೀಡಲಿದೆ ಎಂಬ ನಿರೀಕ್ಷೆ ಎಲ್ಲರಲ್ಲಿದೆ.