Donald Trump: ಪುಟಿನ್ ಹಗಲು ಚೆನ್ನಾಗಿ ಮಾತನಾಡಿ ರಾತ್ರಿ ಬಾಂಬ್ ಹಾಕ್ತಾರೆ ಎಂದ ಟ್ರಂಪ್

ವಾಷಿಂಗ್ಟನ್: ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ (Russian President Vladimir Putin) ಹಗಲಿನಲ್ಲಿ ಚೆನ್ನಾಗಿ ಮಾತನಾಡಿ ಬಳಿಕ ರಾತ್ರಿ ಬಾಂಬ್ ಹಾಕುತ್ತಾರೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ (US President Donald Trump) ಹೇಳಿದ್ದಾರೆ. ಉಕ್ರೇನ್ (Ukraine) ಮೇಲೆ ರಷ್ಯಾ ನಡೆಸುತ್ತಿರುವ ದಾಳಿ ಬಗ್ಗೆ ವರದಿಗಾರೊಂದಿಗೆ ಮಾತನಾಡಿದ ಟ್ರಂಪ್, ರಷ್ಯಾದ ಅಧ್ಯಕ್ಷರು ಒಂದೊಂದು ಬಾರಿ ಒಂದೊಂದು ರೀತಿ ಮಾತನಾಡುತ್ತಾರೆ. ಅವರು ತುಂಬಾ ನಿರಾಶೆಗೊಂಡಿದ್ದಾರೆ. ಅವರ ಹೇಳಿಕೆಗೆ ಅರ್ಥವಿದೆ ಎಂದು ನಾನು ಭಾವಿಸಿದ್ದೆ. ಆದರೆ ಅವರು ತುಂಬಾ ಸುಂದರವಾಗಿ ಮಾತನಾಡಿ ಬಳಿಕ ರಾತ್ರಿ ಜನರ ಮೇಲೆ ಬಾಂಬ್ ಹಾಕುತ್ತಾರೆ ಎಂದರು.

ಉಕ್ರೇನ್ ಮೇಲೆ ಮಾಸ್ಕೋ ದಾಳಿ ನಡೆಸುತ್ತಿರುವುದು ಬೇಸರದ ಸಂಗತಿ. ಉಕ್ರೇನ್‌ಗೆ ಪೇಟ್ರಿಯಾಟ್ ವಾಯು ರಕ್ಷಣಾ ಕ್ಷಿಪಣಿಗಳನ್ನು ಅಮೆರಿಕ ಕಳುಹಿಸಲಿದೆ ಎಂದು ಟ್ರಂಪ್ ದೃಢಪಡಿಸಿದರು.

ಉಕ್ರೇನ್ ಗೆ ನಾವು ದೇಶಪ್ರೇಮಿಗಳನ್ನು ಕಳುಹಿಸುತ್ತೇವೆ, ಅದು ಅವರಿಗೆ ತೀರಾ ಅಗತ್ಯವಾಗಿದೆ. ಎಷ್ಟು ಎಂದು ನಿರ್ಧರಿಸಿಲ್ಲ.ಅವರಿಗೆ ರಕ್ಷಣೆ ಅಗತ್ಯವಿರುವುದರಿಂದ ಅವರಿಗೆ ಅದು ಸಿಗಲಿದೆ ಎಂದು ನ್ಯೂಜೆರ್ಸಿಯಲ್ಲಿ ಟ್ರಂಪ್ ಇತ್ತೀಚೆಗೆ ಹೇಳಿದ್ದರು. ಬಳಿಕ ಈ ಬಗ್ಗೆ ಇದೀಗ ಘೋಷಣೆಯನ್ನು ಮಾಡಿದ್ದಾರೆ.

ರಷ್ಯಾದ ಮೇಲೆ ಹೊಸ ನಿರ್ಬಂಧಗಳ ಬಗ್ಗೆ ಸುಳಿವು ನೀಡಿರುವ ಅವರು ಉಕ್ರೇನ್‌ ಮೇಲೆ ಮಾಸ್ಕೋ ನಡೆಸುತ್ತಿರುವ ಯುದ್ಧದ ಬಗ್ಗೆ ಅಸಮಾಧಾನವನ್ನು ವ್ಯಕ್ತಪಡಿಸಿದರು. ಉಕ್ರೇನ್ ಗೆ ಕಳುಹಿಸುವ ಶಸ್ತ್ರಾಸ್ತ್ರಗಳಿಗೆ ಯುನೈಟೆಡ್ ಸ್ಟೇಟ್ಸ್ ಇನ್ನು ಮುಂದೆ ಪಾವತಿ ಮಾಡುವುದಿಲ್ಲ ಎಂದ ಟ್ರಂಪ್, ಇದಕ್ಕೆ ಯುರೋಪಿಯನ್ ಒಕ್ಕೂಟ ಹಣ ನೀಡುತ್ತಿದೆ. ನಾವು ಏನನ್ನೂ ಪಾವತಿಸುತ್ತಿಲ್ಲ. ಅದು ನಮಗೆ ವ್ಯವಹಾರ ಮಾತ್ರ ಎಂದರು.

ಶಸ್ತ್ರಾಸ್ತ್ರ ವ್ಯಾಪಾರಕ್ಕೆ ಸಂಬಂಧಿಸಿ ಅಮೆರಿಕದ ನೀತಿಯಲ್ಲಿ ಹಲವು ಬದಲಾವಣೆ ಮಾಡಲಾಗಿದೆ. ಉಕ್ರೇನ್‌ಗೆ ಕಳುಹಿಸಲಾಗುವ ಮುಂದಿನ ಶಸ್ತ್ರಾಸ್ತ್ರಗಳಿಗೆ ನಾವು ಖರ್ಚು ಮಾಡುವುದಿಲ್ಲ ಎಂದು ಹೇಳಿದರು.

ಇದನ್ನೂ ಓದಿ: Sigandur Bridge: ಐತಿಹಾಸಿಕ ಸಿಗಂದೂರು ಸೇತುವೆ ಲೋಕಾರ್ಪಣೆ ಮಾಡಿದ ಕೇಂದ್ರ ಸಚಿವ ನಿತಿನ್‌ ಗಡ್ಕರಿ

ಪ್ರಾದೇಶಿಕ ಭದ್ರತೆಗೆ ಯುರೋಪ್ ಹೆಚ್ಚಿನ ಜವಾಬ್ದಾರಿಯನ್ನು ತೆಗೆದುಕೊಳ್ಳಬೇಕು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ ಟ್ರಂಪ್, ನ್ಯಾಟೋ ಮಿತ್ರರಾಷ್ಟ್ರಗಳ ನಡುವೆ ಜವಾಬ್ದಾರಿ ಹಂಚಿಕೆಯ ಅಸಮತೋಲನದ ಬಗ್ಗೆ ಅವರು ಮಾತನಾಡಿದರು. ಆದರೆ ಯುರೋಪಿಯನ್ ಒಕ್ಕೂಟ ಟ್ರಂಪ್ ಅವರ ಹೇಳಿಕೆಗೆ ಯಾವುದೇ ರೀತಿಯ ಪ್ರತಿಕ್ರಿಯೆಯನ್ನು ನೀಡಿಲ್ಲ.

ಅಮೆರಿಕದ ವಿಶೇಷ ರಾಯಭಾರಿ ಉಕ್ರೇನ್‌ಗೆ ಪ್ರವಾಸ ಮಾಡಲಿದ್ದು, ಈ ನಡುವೆ ಟ್ರಂಪ್ ವಾಷಿಂಗ್ಟನ್‌ನಲ್ಲಿ ನ್ಯಾಟೋ ಕಾರ್ಯದರ್ಶಿ ಜನರಲ್ ಮಾರ್ಕ್ ರುಟ್ಟೆ ಅವರನ್ನು ಭೇಟಿಯಾಗಲಿದ್ದಾರೆ ಎನ್ನಲಾಗಿದೆ.

ಯುದ್ಧ ಕೊನೆಗೊಳಿಸಿಯೇ ಸಿದ್ದ ಎನ್ನುತ್ತಿದೆ ಯುಎಸ್

ಮೂರು ವರ್ಷಗಳಿಂದ ಉಕ್ರೇನ್ ಮೇಲೆ ದಾಳಿ ನಡೆಸುತ್ತಿರುವ ಮಾಸ್ಕೋ ಈ ಬಾರಿ ತನ್ನ ದಾಳಿಗಳನ್ನು ಹೆಚ್ಚಿಸಿದೆ. ಎರಡು ರಾಷ್ಟ್ರಗಳ ನಡುವಿನ ಯುದ್ಧ ಕೊನೆಗೊಳಿಸಲು ಯುಎಸ್ ನೇತೃತ್ವದಲ್ಲಿ ನಡೆದ ಮಾತುಕತೆಗಳು ಫಲ ನೀಡಿಲ್ಲ.

ಯುಎಸ್ ಸೆನೆಟರ್‌ಗಳು ಭಾನುವಾರ ಟ್ರಂಪ್‌ಗೆ ರಷ್ಯಾ ವಿರುದ್ಧ ಬಳಸಲು "ಸ್ಲೆಡ್ಜ್ ಹ್ಯಾಮರ್" ನಿರ್ಬಂಧಗಳನ್ನು ನೀಡುವ ದ್ವಿಪಕ್ಷೀಯ ಮಸೂದೆ ಬಗ್ಗೆ ಪ್ರಸ್ತಾಪ ಮಾಡಿದರು. ಈ ನಿರ್ಬಂಧ ಮಸೂದೆಯು ಪುಟಿನ್ ಅವರ ಆರ್ಥಿಕತೆ ಮತ್ತು ಪುಟಿನ್ ಯುದ್ಧ ಯಂತ್ರವನ್ನು ಬೆಂಬಲಿಸುವ ಎಲ್ಲಾ ದೇಶಗಳ ಮೇಲೆ ಕ್ರಮ ಕೈಗೊಳ್ಳಲು ಅವಕಾಶ ನೀಡುತ್ತದೆ ಎಂದು ರಿಪಬ್ಲಿಕನ್ ಸೆನೆಟರ್ ಲಿಂಡ್ಸೆ ಗ್ರಹಾಂ ತಿಳಿಸಿದ್ದಾರೆ.

ರಷ್ಯಾಕ್ಕೆ ಸಹಾಯ ಮಾಡುವ ಯಾವುದೇ ದೇಶದ ಮೇಲೆ ಶೇ. 500ರಷ್ಟು ಸುಂಕಗಳನ್ನು ವಿಧಿಸುವ ಸಾಧ್ಯತೆ ಇದೆ. ಇದರಲ್ಲಿ ಚೀನಾ, ಭಾರತ, ಬ್ರೆಜಿಲ್‌ನಂತಹ ದೇಶಗಳು ಸೇರಿವೆ. ಇದು ನಿಜವಾಗಿಯೂ ಈ ಯುದ್ಧವನ್ನು ಕೊನೆಗೊಳಿಸಲು ಅಧ್ಯಕ್ಷ ಟ್ರಂಪ್‌ಗೆ ಇರುವ ಸ್ಲೆಡ್ಜ್ ಹ್ಯಾಮರ್ ಆಗಿದೆ ಎಂದು ಗ್ರಹಾಂ ಹೇಳಿದರು.