Mens Beauty Salons: ಉದ್ಯಾನನಗರಿಯಲ್ಲಿ ಹೆಚ್ಚಾಯ್ತು ಮೆನ್ಸ್‌ ಬ್ಯೂಟಿ ಸಲೂನ್ಸ್‌
Mens Beauty Salons: ಇತ್ತೀಚೆಗೆ ಪುರುಷರಲ್ಲಿ ಸೌಂದರ್ಯ ಪ್ರಜ್ಞೆ ಹೆಚ್ಚಾಗುತ್ತಿರುವಂತೆ, ದೊಡ್ಡ ದೊಡ್ಡ ನಗರಗಳಲ್ಲಿ ಅದರಲ್ಲೂ ಉದ್ಯಾನನಗರಿಯಲ್ಲಿ, ಮೆನ್ಸ್‌ ಬ್ಯೂಟಿ ಸಲೂನ್‌ಗಳು ಹೆಚ್ಚಾಗುತ್ತಿವೆ. ಅವುಗಳಲ್ಲಿ, ಯಾವ್ಯಾವ ಬಗೆಯ ಬ್ಯೂಟಿ ಚಿಕಿತ್ಸೆಗಳು & ಮೇಕೋವರ್‌ಗಳು ಟ್ರೆಂಡಿಯಾಗಿವೆ? ಇಲ್ಲಿದೆ ಸಂಕ್ಷಿಪ್ತ ವರದಿ.
ಚಿತ್ರಕೃಪೆ: ಪಿಕ್ಸೆಲ್‌
ಶೀಲಾ ಸಿ ಶೆಟ್ಟಿ
Apr 19, 2025 7:00 AM
-ಶೀಲಾ ಸಿ. ಶೆಟ್ಟಿ, ಬೆಂಗಳೂರು
ಇಂದು ಸೌಂದರ್ಯ ಎಂಬುದು ಹೆಣ್ಣಿಗೆ ಮಾತ್ರ ಸೀಮಿತವಾಗಿಲ್ಲ. ಈ ವಿಷಯದಲ್ಲಿ ಪುರುಷರು ಕೂಡ ಸಮಾನತೆ ಕಂಡು ಕೊಳ್ಳುತ್ತಿದ್ದಾರೆ. ಇದಕ್ಕೆ ಸಾಕ್ಷಿ ಎಂಬಂತೆ, ಪುರುಷರ ಸೌಂದರ್ಯ ಹೆಚ್ಚಿಸುವ ಗ್ರೂಮಿಂಗ್‌ ಬ್ಯೂಟಿ ಪಾರ್ಲರ್ಸ್‌, ಜೆಂಟ್ಸ್‌ ಬ್ಯೂಟಿ ಸಲೂನ್ಸ್‌ (Mens Beauty Salons) ಹಾಗೂ ಯೂನಿಸೆಕ್ಸ್‌ ಬ್ಯೂಟಿಪಾರ್ಲರ್‌ಗಳು ಎಲ್ಲೆಂದರಲ್ಲಿ ತಲೆ ಎತ್ತುತ್ತಿವೆ. ಇನ್ನು ಫ್ರಾಂಚೈಸ್‌ ಪಡೆದ ಹೈ ಟೆಕ್‌ ಬ್ರಾಂಡೆಡ್‌ ಬ್ಯೂಟಿ ಪಾರ್ಲರ್‌ಗಳ ಸಂಖ್ಯೆಯೂ ಕಡಿಮೆಯೇನಿಲ್ಲ. ಒಟ್ಟಾರೆ, ಪುರುಷರ ಬ್ಯೂಟಿ ಕಾನ್ಶಿಯಸ್‌ ಹೆಚ್ಚಾಗುತ್ತಿರುವಂತೆ, ದಿನದಿಂದ ದಿನಕ್ಕೆ ಇವುಗಳ ಸಂಖ್ಯೆಯಲ್ಲೂ ಏರಿಕೆ ಕಂಡು ಬಂದಿದೆ ಎನ್ನುತ್ತಾರೆ ಸ್ಟೈಲಿಸ್ಟ್‌ಗಳು.
ಟ್ರೆಂಡಿಯಾಗಿರುವ ಪುರುಷರ ಬ್ಯೂಟಿ ಟ್ರೀಟ್‌ಮೆಂಟ್‌ಗಳಿವು
ಮೆನ್ಸ್‌ ಹೈಡ್ರೋ ಫೇಶಿಯಲ್‌, ಥರ್ಮೋ ಹಬ್‌, ಸ್ಟ್ರೀಕಿಂಗ್‌, ಫ್ರಾಪ್ಟಿಂಗ್‌ ಕ್ಯಾಪ್‌ ಟೆಕ್ನಿಕ್‌, ಗೋಲ್ಡ್‌ ಫೇಶಿಯಲ್‌, ಡೆಡ್‌ ಸೀ ಫೇಶಿಯಲ್‌ ಇಂದು ಹೆಚ್ಚು ಟ್ರೆಂಡ್‌ನಲ್ಲಿದೆ. ಈ ಚಿಕಿತ್ಸೆಗೆ ಒಳಗಾಗುತ್ತಿರುವ ಪುರುಷರ ಸಂಖ್ಯೆ ಕೂಡ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಅಂದ ಹಾಗೆ, ಟೆಕ್ಕಿಗಳು, ಮದುಮಕ್ಕಳು ಹಾಗೂ ಕಾಲೇಜು ಹುಡುಗರು ಕೂಡ ಈ ಪ್ಯಾಕೇಜ್‌ ಬ್ಯೂಟಿ ಟ್ರೀಟ್‌ಮೆಂಟ್‌ನ ಗ್ರಾಹಕರಾಗಿದ್ದಾರೆ. ಇನ್ನು, ಪ್ಯಾಕೇಜ್‌ ಹೊರತುಪಡಿಸಿದರೆ, ಹೇರ್‌ ಕಲರ್ಸ್‌, ಐಬ್ರೋ ಶೇಪಿಂಗ್‌, ಹೇರ್‌ ರಿಮೂವಿಂಗ್‌, ದಾಡಿ ಶೇಪಿಂಗ್‌, ಕಂಪ್ಲೆಕ್ಷನ್‌ ಟ್ರೀಟ್‌ಮೆಂಟ್ಸ್‌ ಹೀಗೆ ಹುಡುಗರ ಸೌಂದರ್ಯ ಹೆಚ್ಚಿಸುವ ನಾನಾ ಬಗೆಯ ಬ್ಯೂಟಿ ಟ್ರೀಟ್‌ಮೆಂಟ್‌ಗಳು ಅಲ್ಲಿನ ಲಿಸ್ಟ್‌ನಲ್ಲಿ ಹರಿದಾಡುತ್ತಿವೆ ಎನ್ನುತ್ತಾರೆ ಗ್ರೂಮಿಂಗ್‌ ಎಕ್ಸ್‌ಪರ್ಟ್‌ ರಾಕೇಶ್‌.
ಕಾಲೇಜು ಹುಡುಗರ ಕ್ರೇಜ್
ಕೂದಲ ತುದಿಯನ್ನು ಅದರಲ್ಲೂ ಬಂಚ್‌ಗಳನ್ನು ನಾಲ್ಕೈದು ಭಾಗಗಳಾಗಿ ಮಾಡಿ, ಅವುಗಳ ತುದಿಗಳನ್ನು ಮಾತ್ರ ಟ್ರಿಮ್‌ ಮಾಡಿ, ಶೇಪ್‌ ನೀಡುವ ರನ್ನಿಂಗ್‌ ಸಿಜರ್‌ ಹೇರ್‌ಕಟ್‌ ಇಂದು ಕಾಲೇಜು ಹುಡುಗರ ಲಿಸ್ಟ್‌ನಲ್ಲಿದೆ. ಎಲ್ಲದಕ್ಕಿಂತ ಹೆಚ್ಚಾಗಿ ಗೊಟ್ಟಿ ಅಥವಾ ಚಿನ್‌ ಬಿಯರ್ಡ್‌(ದಾಡಿ) ಶೇಪ್‌ ಹಾಗೂ ಕೆಜಿಎಫ್‌ ಶೈಲಿಯ ಹೇರ್‌ಕಟ್‌ ಹಾಗೂ ದಾಡಿ ಶೇಪಿಂಗ್‌ಗೂ ಇದ್ದ ಬೇಡಿಕೆ ಕಡಿಮೆಯಾಗಿಲ್ಲ! ಎನ್ನುತ್ತಾರೆ ಯೂನಿಸೆಕ್ಸ್‌ ಸಲೂನ್‌ನ ರಾಜ್‌.
ಟೆಕ್ಕಿಗಳ ಚಾಯ್ಸ್‌
ಇನ್ನು ಟೆಕ್ಕಿಗಳ ವಿಷಯಕ್ಕೆ ಬಂದಲ್ಲಿ, ಇವರೆಲ್ಲರೂ ಹೆಚ್ಚಾಗಿ ಮೊರೆ ಹೋಗುತ್ತಿರುವುದು ಮಾಡೆಲಿಂಗ್‌ ಹೇರ್‌ ಕಟ್‌ಗಂತೆ. ಅಂದ ಹಾಗೆ, ಇದರಲ್ಲೆ 20 ರಿಂದ 25 ಬಗೆಯ ಹೇರ್‌ ಕಟ್‌ಗಳಿದ್ದು, ಎಲ್ಲರೂ ಹೆಚ್ಚಾಗಿ ಇಷ್ಟ ಪಡುತ್ತಿರುವುದು, ಸೈಡ್‌ ಲಾಕ್‌, ಗ್ರೀಕ್‌ ಸೋಲ್ಡ್ಜರ್‌ ಸ್ಟೈಲ್‌, ಜೆಲ್‌ ಸ್ಟೈಲ್‌ಗಳನ್ನು ಎನ್ನುತ್ತಾರೆ ಟೆಕ್ಕಿಗಳ ಗ್ರೂಮಿಂಗ್‌ ಎಕ್ಸ್‌ಪರ್ಟ್‌ ನಿಶಾಂತ್‌.
ಥರ್ಮಲ್‌ ಮೈಕ್ರೋ ವೇವ್‌ ರನ್ನರ್‌ ಟ್ರೀಟ್‌ಮೆಂಟ್‌
ಕೂದಲು ಉದುರುತ್ತಿದೆ ಎಂದಾಕ್ಷಣ ಅದನ್ನು ಉಳಿಸಿಕೊಳ್ಳಲು ಇಲ್ಲವೇ ಬೆಳೆಸಿಕೊಳ್ಳಲು ಸಾವಿರಾರು ರೂ. ಬೆಲೆ ತೆರಲು, ಇಲ್ಲವೇ, ನೀರಿನಂತೆ ಹೊಳೆ ಹರಿಸಲು ಟೆಕ್ಕಿಗಳು ಸಿದ್ಧರಿದ್ದಾರೆ. ಅದರಲ್ಲೂ ಇತ್ತೀಚೆಗೆ ಪರಿಚಿತವಾಗಿರುವ ಥರ್ಮಲ್‌ ಮೈಕ್ರೋ ವೇವ್‌ ರನ್ನರ್‌ ಟ್ರಿಟ್‌ಮೆಂಟ್‌ಗೆ ಪುರುಷರು ಮುಗಿ ಬೀಳುತ್ತಿದ್ದಾರಂತೆ. ಅಂದ ಹಾಗೆ, ಕೂದಲು ಉದುರಿರುವ ಸ್ಥಳದಲ್ಲಿ ಯಂತ್ರದ ಸಹಾಯದಿಂದ ರಂಧ್ರಗಳನ್ನು ಮುಕ್ತಗೊಳಿಸಿ ಮತ್ತೊಮ್ಮೆ ಕೂದಲು ಬೆಳೆಯುವಂತೆ ಮಾಡಬಲ್ಲ, ಈ ಅತ್ಯಾಧುನಿಕ ಟ್ರೀಟ್‌ಮೆಂಟ್‌ 10 ರಿಂದ 15 ಸಿಟ್ಟಿಂಗ್ಸ್‌ಗಳಲ್ಲಿ ಮುಗಿಯುವುದು ಮಾತ್ರವಲ್ಲ, ಬರಡು ಭೂಮಿಯಲ್ಲೂ ಫಸಲು ಬೆಳೆಯಬಹುದು ಎಂಬುದನ್ನು ತೋರಿಸುತ್ತಿದೆಯಂತೆ ಎನ್ನುತ್ತಾರೆ ಅನುಭವಸ್ಥರೊಬ್ಬರು.
ಈ ಸುದ್ದಿಯನ್ನೂ ಓದಿ | Trends Footwear: ಟ್ರೆಂಡ್ಸ್ ಫುಟ್‌ವೇರ್‌ 'ಪವರ್ ಪ್ಲೇ' ಸ್ಪರ್ಧೆ; ವಿಜೇತರಿಗೆ ಕ್ರಿಕೆಟ್ ಪಂದ್ಯ ವೀಕ್ಷಿಸಲು ಜೋಡಿ ಟಿಕೆಟ್, ಗಿಫ್ಟ್ ವೋಚರ್!
ಮೆನ್ಸ್‌ ವೆಡ್ಡಿಂಗ್‌ ಪ್ಯಾಕೇಜ್‌
ಮದುಮಗನ ವೆಡ್ಡಿಂಗ್‌ ಪ್ಯಾಕೇಜ್‌ನಲ್ಲಿ, ತಲೆಕೂದಲಿಂದಿಡಿದು ಪಾದದವರೆಗೂ ನೀಡುವ ಟ್ರೀಟ್‌ಮೆಂಟ್‌ಗಳಲ್ಲಿ ಪೆಡಿಕ್ಯೂರ್‌, ಮೆನಿಕ್ಯೂರ್‌, ಬಾಡಿ ಸ್ಕ್ರಬ್‌, ಫೇಶಿಯಲ್‌, ಕ್ಲೆನ್ಸಿಂಗ್‌, ಬ್ಲೀಚಿಂಗ್‌ ಸೇರಿದಂತೆ ನಾನಾ ಸೌಂದರ್ಯ ಚಿಕಿತ್ಸೆಗಳಿವೆ. ಒಟ್ಟಾರೆ, ಇದನ್ನು ವೆಡ್ಡಿಂಗ್‌ ಗ್ರೂಮಿಂಗ್‌ ಪ್ಯಾಕೇಜ್‌ ಎನ್ನಲಾಗುತ್ತದೆ. ಒಂದಿಪ್ಪತ್ತು ಸಾವಿರ ರೂ.ಗಳು ಜೇಬಲ್ಲಿದ್ದರೆ, ಎಂಥವರೂ ಸುಂದರಾಂಗ ಆಗಬಹುದು ಎನ್ನುತ್ತಾರೆ ಸಲೂನ್‌ ಮ್ಯಾನೇಜರ್‌ ಮೋಹನ್‌.
(ಲೇಖಕಿ: ಫ್ಯಾಷನ್ ಪತ್ರಕರ್ತೆ)
