ಯುಎಇ ಮಹಿಳಾ ತಂಡದ 10 ಬ್ಯಾಟರ್‌ಗಳು ರಿಟೈರ್‌ ಔಟಾದರೂ ಕತಾರ್ ವಿರುದ್ದ 163 ರನ್ ಜಯ!
ಐಸಿಸಿ ಮಹಿಳಾ ಟಿ20 ವಿಶ್ವಕಪ್ ಏಷ್ಯಾ ಪ್ರದೇಶ ಅರ್ಹತಾ ಪಂದ್ಯದಲ್ಲಿ ಯುಎಇಯ 10 ಬ್ಯಾಟ್ಸ್‌ಮನ್‌ಗಳು ನಿವೃತ್ತಿ ಹೊಂದಿದರು. ಟಿ20 ಕ್ರಿಕೆಟ್‌ನಲ್ಲಿ ಇದೇ ಮೊದಲ ಬಾರಿಗೆ ಎಲ್ಲಾ ಆಟಗಾರರು ಪಂದ್ಯದ ವೇಳೆ ನಿವೃತ್ತಿ ಘೋಷಿಸಿದ್ದಾರೆ. ಆದರೂ ಯುಎಇ 163 ರನ್‌ಗಳ ಅಂತರದಲ್ಲಿ ಗೆಲುವು ಪಡೆಯಿತು.
ಯುಎಇ ತಂಡದ 10 ಬ್ಯಾಟರ್‌ಗಳು ರಿಟೈರ್‌ ಔಟ್ ಆಗಿದ್ದಾರೆ.
Ramesh Kote
May 10, 2025 11:37 PM
ನವದೆಹಲಿ: ಕ್ರಿಕೆಟ್ ಮೈದಾನದಲ್ಲಿ ನಾವು ಸಾಕಷ್ಟು ಅಚ್ಚರಿ ಫಲಿತಾಂಶಗಳನ್ನು ನಾವು ನೋಡಿದ್ದೇವೆ. ಬೌಲಿಂಗ್ ಆಗಿರಲಿ, ಬ್ಯಾಟಿಂಗ್ ಆಗಿರಲಿ ಅಥವಾ ಫೀಲ್ಡಿಂಗ್ ಆಗಿರಲಿ, ಆದರೆ ಐಸಿಸಿ ಮಹಿಳಾ ಟಿ20 ವಿಶ್ವಕಪ್ (ICC women T20 World Cup) ಏಷ್ಯಾ ಪ್ರದೇಶದ ಅರ್ಹತಾ ಪಂದ್ಯದಲ್ಲಿ ಹಿಂದೆಂದೂ ನೋಡಿರದ ಅಥವಾ ಕೇಳಿರದ ವಿಚಿತ್ರ ಘಟನೆಯೊಂದು ಸಂಭವಿಸಿದೆ. ಯುಎಇ (UAE) ಮತ್ತು ಕತಾರ್ (Qatar) ಮಹಿಳಾ ತಂಡಗಳ ನಡುವಣ ಪಂದ್ಯದಲ್ಲಿ ನಡೆದಿದೆ. ಎರಡೂ ತಂಡಗಳ ನಡುವಿನ ಈ ಪಂದ್ಯ ಬ್ಯಾಂಕಾಕ್‌ನಲ್ಲಿ ನಡೆದಿತ್ತು. ಕತಾರ್ ವಿರುದ್ಧದ ಈ ಪಂದ್ಯದಲ್ಲಿ ಯುಎಇ, ಬಿರುಗಾಳಿಯ ಆರಂಭವನ್ನು ಪಡೆಯಿತು. ಆರಂಭಿಕ ಬ್ಯಾಟ್ಸ್‌ಮನ್‌ಗಳಿಬ್ಬರೂ ಇಬ್ಬರೂ ಅಬ್ಬರಿಸಿದ್ದರು. ಆದರೆ, 16 ಓವರ್‌ಗಳು ಮುಗಿದ ನಂತರ ಏನಾಯಿತು ಎಂಬುದು ಕ್ರಿಕೆಟ್ ಇತಿಹಾಸದಲ್ಲಿ ಯಾವಾಗಲೂ ನೆನಪಿನಲ್ಲಿ ಉಳಿಯುತ್ತದೆ.
ಈ ಪಂದ್ಯದಲ್ಲಿ ಯುಎಇಯ 10 ಬ್ಯಾಟರ್‌ಗಳು ರಿಟೈರ್‌ ಔಟ್ ಆದರು. ತಂಡ ಉತ್ತಮ ಆರಂಭವನ್ನು ಪಡೆದಿದ್ದ ಸಂದರ್ಭದಲ್ಲಿ ಇದು ನಡೆದಿದ್ದು ಎಲ್ಲರಿಗೂ ಅಚ್ಚರಿ ಮೂಡಿಸಿದೆ. ಕತಾರ್ ವಿರುದ್ಧದ ಪಂದ್ಯದಲ್ಲಿ ಯುಎಇ ತಂಡ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಿರ್ಧರಿಸಿತ್ತು. ಇಶಾನ್ ಓಜಾ ಮತ್ತು ತ್ರಿತಾ ಸತೀಶ್ ತಂಡದ ಪರ ಇನಿಂಗ್ಸ್ ಆರಂಭಿಸಿದರು. ಇಶಾ 55 ಎಸೆತಗಳಲ್ಲಿ 113 ರನ್ ಸಿಡಿಸಿದ್ದರು. ತ್ರಿತಾ 42 ಎಸೆತಗಳಲ್ಲಿ 74 ರನ್ ಗಳಿಸಿದ್ದರು.
IPL 2025: ಬೆಂಗಳೂರಿಗೆ ಸುರಕ್ಷಿತವಾಗಿ ಆಗಮಿಸಿದ ಆರ್‌ಸಿಬಿ ಆಟಗಾರರು!
ಈ ಇನಿಂಗ್ಸ್‌ನಲ್ಲಿ ಆಡಿದ್ದು 16 ಓವರ್‌ಗಳು ಮಾತ್ರ. ಆದರೆ ಇದಾದ ನಂತರ ಯುಎಇ ತಂಡದ ಎಲ್ಲಾ ಆಟಗಾರರು ಪ್ಯಾಡ್‌ಗಳನ್ನು ಧರಿಸಿ ಬೌಂಡರಿಯ ಬಳಿ ನಿಂತರು. ಮೊದಲು ಇಶಾ ಓಜಾ ರಿಟೈರ್‌ ಔಟ್ ಆದರು, ನಂತರ ತ್ರಿತಾ ಕೂಡ ರಿಟೈರ್‌ ಔಟ್ ಆಗಿ ಪೆವಿಲಿಯನ್‌ಗೆ ಮರಳಿದರು.
ಇಬ್ಬರೂ ಆರಂಭಿಕರು ನಿರ್ಗಮಿಸಿದ ತಕ್ಷಣ, ಒಬ್ಬರ ನಂತರ ಒಬ್ಬರು ಬ್ಯಾಟ್ಸ್‌ಮನ್‌ಗಳು ಕ್ರೀಸ್‌ಗೆ ಬಂದು ನಿವೃತ್ತಿ ಹೊಂದಿದ ನಂತರ ಪೆವಿಲಿಯನ್‌ಗೆ ಮರಳಿದರು. ಇಡೀ ತಂಡವು ಆಲೌಟ್ ಆಗುವವರೆಗೂ ಇದು ಮುಂದುವರಿಯಿತು. ಈ ರೀತಿಯಾಗಿ, ಯುಎಇಯ 10 ಆಟಗಾರರು ಖಾತೆ ತೆರೆಯದೆಯೇ ಔಟಾದರು. ಔಟಾದ ಯಾವುದೇ ಬ್ಯಾಟರ್ ಒಂದೇ ಒಂದು ಎಸೆತವನ್ನೂ ಆಡಿರಲಿಲ್ಲ. ಈ ಮೂಲಕ ಯುಎಇ ತಂಡ 16 ಓವರ್‌ಗಳಲ್ಲಿ 192 ರನ್‌ಗಳಿಗೆ ಆಲೌಟ್ ಆಯಿತು. ನಂತರ ಗುರಿ ಹಿಂಬಾಲಿಸಿದ ಕತಾರ್ ಕೇವಲ 29 ರನ್‌ಗಳಿಗೆ ಆಲೌಟ್ ಆಯಿತು, ಇದರಿಂದಾಗಿ ಯುಎಇ ಪಂದ್ಯವನ್ನು 163 ರನ್‌ಗಳ ಅಂತರದಲ್ಲಿ ಗೆದ್ದು ಬೀಗಿತು.
IPL 2025: ʻಇನ್ನುಳಿದ ಪಂದ್ಯಗಳನ್ನು ಇಂಗ್ಲೆಂಡ್‌ನಲ್ಲಿ ಆಡಿಸಿʼ-ಬಿಸಿಸಿಐಗೆ ಮೈಕಲ್‌ ವಾನ್‌ ಸಲಹೆ!
ಯುಎಇ ಆಟಗಾರರು ನಿವೃತ್ತಿ ಹೊಂದಲು ಕಾರಣವೇನು?
ಇಲ್ಲಿನ ವಿಷಯವೆಂದರೆ ಯುಎಇ ಮತ್ತು ಕತಾರ್ ನಡುವಿನ ಪಂದ್ಯದ ಸಮಯದಲ್ಲಿ ಮಳೆ ಬರುವ ಸಾಧ್ಯತೆ ಇತ್ತು. ಇನಿಂಗ್ಸ್‌ನಲ್ಲಿ ಇನ್ನೂ 4 ಓವರ್‌ಗಳು ಉಳಿದಿದ್ದವು. ಏಕೆಂದರೆ ಐಸಿಸಿ ನಿಯಮಗಳ ಪ್ರಕಾರ ಟಿ20 ಕ್ರಿಕೆಟ್‌ನಲ್ಲಿ ಇನಿಂಗ್ಸ್ ಡಿಕ್ಲೇರ್ ಮಾಡಲು ಸಾಧ್ಯವಿಲ್ಲ. ಇಂಥಾ ಪರಿಸ್ಥಿತಿಯಲ್ಲಿ, ಯುಎಇಯ ಎಲ್ಲಾ ಆಟಗಾರ್ತಿಯರು ನಿವೃತ್ತಿಯಾಗಲು ನಿರ್ಧರಿಸಿದ್ದರು. ಇದರಿಂದಾಗಿ ಪ್ರಥಮ ಇನಿಂಗ್ಸ್ ಬೇಗ ಮುಗಿಯಿತು. ಇದಕ್ಕಾಗಿಯೇ ಕತಾರ್ ತಂಡ ಮಳೆಗೂ ಮುನ್ನ ಬ್ಯಾಟ್‌ ಮಾಡಲು ಮೈದಾನಕ್ಕೆ ಬಂದಿತು.